Ururimi rw’amarenga rugiye kongererwa ingufu mu kwigishwa mu mashuri

Yanditswe na Jean Pierre Tuyisenge
Kuya 21 Mata 2017 saa 10:58
Yasuwe :
0 0

Minisiteri y’Uburezi yatangaje ko igiye gushyiraho inkoranyamagambo ikubiyemo ururimi n’ibimenyetso bikoreshwa n’abafite ubumuga, bikazigishwa mu mashuri yose yo mu Rwanda.

Iyi gahunda yatangajwe n’Umunyamabanga wa Leta muri Minisiteri y’Uburezi ushinzwe amashuri y’Incuke, abanza n’ayisumbuye, Isaac Munyakazi, kuri uyu wa Kane tariki ya 20 Mata 2017, ubwo yari yitabye Komisiyo y’Imibereho Myiza y’Abaturage mu Nteko Ishinga Amategeko, kugira ngo asubize bimwe mu bibazo bahuye nabyo mu ngendo basuyemo ibigo birererwamo abana bafite ubumuga.

Yavuze ko itegurwa ry’iyo nkoranyamagambo rishingiye ku kuba mu buzima busanzwe abantu bafite ubumuga bwo kutumva no kutavuga bakunze kujya ahantu ntibahisange kuko abo bahasanga batajya bumvikana nabo mu rurimi.

yagize ati “ Ni ikibazo gikomeye kandi dukeneye ko cyihuta kuko kitareba abarimu gusa, agubwo kireba n’abandi mu buzima busanzwe kuko ari mu buvuzi, ari mu bucamanza , uyu munsi umuntu ufite ubumuga iyo akoresheje amarenga yumvwa na nde? Yumvikana ate? Ese uwo yeretse ikibazo akoresheje amarenga arabyumva? Ibyo rero birareba n’izindi nzego zitandukanye.”

Yongeyeho ati “ Niyo mpamvu inzego zicaranye uyu munsi kugira ngo dushyireho inkoranyamagambo izifashishwa noneho mu kwigisha ari abafite ubumuga, ari n’abatabufite kugira ngo bizaguke Abanyarwanda bose nibahura n’umuntu ufite ubumuga babe bamubwira bakoresha amarenga yumva, nabo bagakoresha amarenga ku buryo uwo ari we wese yabumva."

Ku bufatanye bwa MINEDUC, Minisiteri y’Umuco na Siporo, Inteko Nyarwanda y’Umuco n’Ururimi n’Inama y’Igihugu y’Abafite Ubumuga, batangiye gukora iyo nkoranyamagambo izasohoka mu mpera za 2017, igahita ishyirwa mu mfashanyigisho.

Ubusanzwe muri Koleji y’Uburezi yo muri Kaminuza y’u Rwanda harimo ishami ryo kwigisha ururimi rw’amarenga, gusa hari hakiri imbogamizi zo kuba amarenga akoreshwa ari ayo ku rwego mpuzamahanga, hakaba hagiye gukorwa ayo mu Kinyarwanda gusa.

MINEDUC ikoresha amafaranga ari hagati ya miliyoni 200 na 300 ku mwaka agenerwa gahunda zo guhugura abarimu bigisha abafite ibyo bakenera byihariye (Special Needs), ikaba itangaza ko iyo ngengo y’imari izongerwa kugira ngo birusheho kugenda neza.

Umunyamabanga wa Leta muri MINEDUC ushinzwe amashuri y'incuke, abanza n'ayisumbuye, Isaac Munyakazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244