Kwamamaza

Urukiko rwo muri Amerika rugiye kwemeza aho Umwami Kigeli V azatabarizwa

Yanditswe kuya 25-11-2016 saa 10:52' na Rabbi Malo Umucunguzi


Urukiko rwo muri Leta ya Virginia muri Leta Zunze Ubumwe za Amerika, byitezwe ko kuwa 3 Mutarama 2017 rushobora gufata umwanzuro ntakuka w’ahazatabarizwa umugogo w’Umwami Kigeli V Ndahindurwa, uheruka gutangira muri Leta Zunze Ubumwe za Amerika.

Kigeli V wategetse u Rwanda kuva kuwa 28 Nyakanga 1959 kugera ahiritswe ku butegetsi kuwa 28 Mutarama 1961 yatanze mu ijoro ryo kuwa Gatandatu rishyira ku Cyumweru tariki 16 Ukwakira 2016, afite imyaka 80 y’amavuko.

Gusa umuryango we uri mu Rwanda wifuje ko yatabarizwa mu gihugu yavukiyemo ndetse biza gutangazwa ko iyo mihango izabera i Nyanza mu Majyepfo y’u Rwanda, ariko ababanaga na Kigeli V mu Mujyi wa Oakton muri Virginia, bavuga ko umugogo we udashobora kuzanwa mu Rwanda kuko ubwe yasize abyanze, cyane ko atabashije gutaha mu buryo yifuzagamo.

Itsinda ry’umuryango we ryagiye muri Amerika kugerageza inzira z’ibiganiro, ariko kumvikana birananirana kugeza ubwo hitabazwa urukiko rw’aho aho yatangiye.

Nk’uko Radio Ijwi Rya Amerika yabitangaje, itangazo ryatanzwe n’umuryango wa Kigeli V uhagarariwe na Christine Mukabayojo, Kigeli abereye se wabo, rigira riti “kuva babiri gusa mu bavandimwe bawo, batambamiye icyifuzo cy’umuryango wacu, byabaye ngombwa ko twitabaza inkiko zo muri Amerika aho yatangiye, nk’uko amategeko yaho abiteganya.”

Kuwa Gatatu tariki 23 Ugushyingo, urukiko rwo muri Fairfax County muri Virginia rwasuzumye icyo kibazo, rumaze kubona ko impande zombi zihagarariwe n’ababunganira mu nkiko, rufata icyemezo ko abatangabuhamya bose bamenyeshwa, bakazumvwa n’urukiko kuwa 3 Mutarama 2017, hakabona gufatwa umwanzuro.

Gusa umuryango wa Kigeli wo ukomeza gushimangira nta shiti ko umwami azatabarizwa mu Rwanda.

Abari kumwe na Kigeli V bavuga ko hakomejwe imihango itandukanye yo kumusezeraho mu cyubahiro, mbere y’uko hafatwa umwanzuro ntakuka w’aho agomba gutabarizwa n’uburyo bizakorwamo.

Mu gihe bamwe mu muryango wa Kigeli bashyigikiye ko atabarizwa muri Amerika kimwe n’ababanaga nawe, banatangaje ko hari ahantu babonye ho kumutabariza hajyanye n’imyemerere ya Kiliziya Gatolika, nubwo bemera ko umugogo we ’ushobora kuzazanwa mu Rwanda mu kindi gihe’.

Aba ni nabo basaba inkunga yo gushyigikira ibikorwa byo guharanira ko Kigeli V atabarizwa hanze y’u Rwanda, banasaba inkunga yo kumutabariza, ibintu umuryango wa Kigeli V muri rusange wamaganiye kure, nubwo byose bigomba gutegereza umwanzuro w’urukiko.

Kuwa 31 Ukwakira 2016, Muri Kiliziya ya Mutagatifu Athanasius muri Virginia habereye misa yo gusezera ku mwami

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved