Urukiko rwatesheje agaciro cyamunara yo kugurisha umutungo wa DN International

Yanditswe na Habimana James
Kuya 8 Kanama 2019 saa 09:53
Yasuwe :
0 0

Abantu bari baratanze ibikoresho cyangwa bakagura inzu za sosiyete DN International, ubu bari mu byishimo nyuma y’aho urukiko rutegetse ko cyamunara yagombaga gukorwa na Banki ya KCB ku mutungo w’iyi sosiyete ihagarikwa.

Abantu basaga 75 bahaye ibikoresho n’abaguze inzu za Sosiyete DN International bari baritabaje inkiko, nyuma y’uko iyo sosiyete ibambuye n’inzu baguze zigafatirwa.

Sosiyete DN International yatangiye gukorera mu Rwanda mu 2008, aho yari kubaka umudugudu witwa Green Park Villas uherereye i Rusororo mu 2011, gusa Umuyobozi wayo, Nathan Lloyd yahise ahunga.

Yahunze nyamara hari abantu bari baramaze kugura inzu, ndetse hari n’abishyuye miliyoni 55 Frw nk’igiciro mbumbe cya buri inzu, ariko batarahabwa inyandiko zibemerera ko izo nzu ari izabo.

Uyu muyobozi yagiye atishyuye umwenda wa miliyari 1.5 z’amafaranga y’u Rwanda yari abereyemo KCB, ntiyishyura n’abagiye bamukopa ibikoresho byo kubaka.

Ibi byatumye iyi banki ifatira inzu zari zimaze kubakwa ititaye ku bantu bari barazifashe ndetse baranatangiye kuzishyura.

Urukiko rukuru rw’ubucuruzi mu kwezi gushize, rwatesheje agaciro cyamunara yagombaga gukoreshwa na KCB kuri izo nzu zo muri Green Park Villas.

Muri iyi cyamunara yakozwe mu 2015, KCB Rwanda yagurishije uyu mutungo hagamijwe kugaruza amafaranga yari yaragurije DN International.

Ubu noneho abacamanza batesheje agaciro iyi cyamunara nyuma yo kubona ko inzu zimwe zagurishijwe muri cyamunara, zitari mu byo iyi sosiyete yari yarashinganishije muri KCB, kandi ko amategeko yo guteza cyamunara atubahirijwe.

Iki cyemezo cyishimiwe mu buryo bukomeye n’abari baratanze ibikoresho byabo muri DN International ndetse n’abari baramaze kugura aya mazu.

Bavuze ko bibaha amahirwe ya kabiri yo kugaruza amafaranga yabo bari barashoye muri uyu mushinga.

Umwe muri aba ni Francis Bayingana wagize ati “Iki cyemezo gisobanuye ko KCB ifitiwe umwenda nk’abandi bose DN International ibereyemo umwenda, mu gihe inzira z’amategeko zikomeje, abafitiwe umwenda bose ubu bagiye kugira icyo babona ku mutungo wa DN hashingiwe ku gishoro cya buri wese muri uyu mushinga.”

Bayingana yabwiye The New Times ko bashaka ko ikibanza izo nzu zari zubatseho kigurishwa kugira ngo abatanze amafaranga yo kwishyura inzu n’abatanze ibikoresho bagaruze amafaranga yabo.

Yasobanuye ko baregera amafaranga y’u Rwanda asaga miliyoni 780 kuko DN International itigeze yishyura ikintu na kimwe yaba abarindaga umutekano, abamuhaye amabati n’abamuhaye sima.

Vedaste Mugemanyi uhagarariye DN International, yavuze ko bakiriye neza iki cyemezo, ko kibaha amahirwe yo kongera kugira umutungo wasizwe n’iyi sosiyete, ukaba wagurishwa bityo hakishyurwa abo bari bareyemo amadeni.

Ntabwo biramenyekana niba KCB igiye kujurira iki cyemezo.

Urukiko rwatesheje agaciro cyamunara yo kugurisha umutungo wa DN International

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza