Urukiko rwategetse ko R Kelly akomeza gufungwa

Yanditswe na Muvunyi Arsène
Kuya 17 Nyakanga 2019 saa 11:19
Yasuwe :
0 0

Urukiko rwategetse ko umuririmbyi R Kelly akomeza gufungwa by’agateganyo mu gihe ategereje kuburanishwa ku byaha byo gukinisha abana filime z’ubusambanyi.

Kuri uyu wa Kabiri nibwo R Kelly yagejejwe imbere y’urukiko yambaye imyenda iranga imfungwa anaziritse iminyururu ku maguru.

Mu rukiko hari abakobwa babiri bari mu bo ashinjwa gusambanya bari bagiye kumva uru rubanza. Byari binateganyijwe ko baganira n’itangazamakuru ariko byahindutse ku munota wanyuma.

Joyceln Savage na Azriel Clary n’ubu babanaga na R Kelly atarafungwa biteguye kumushinjura.

Ubushinjacyaha bwasabye ko akomeza gufungwa kuko ari ikibazo kuri sosiyete yaba agiyemo cyane cyane abana b’abakobwa.

Bwavuze ko kandi ashobora gutera ubwoba abatangabuhamya cyangwa agatuma bahindura imvugo zabo.

Bugendeye ku kuba mu mashusho bwabonye agaragaza uyu mugabo ari gusambana n’abana b’abakobwa kandi iki cyaha kikaba ari ryo zingiro ry’ibiri gukorwaho iperereza, busanga kurekura R Kelly akagenzurwa hakoreshejwe ikoranabuhanga cyangwa agafungirwa mu rugo bitizewe neza.

Uwunganira mu mategeko R Kelly, Steven Greenber, yavuze ko umukiliya we akwiye kurekurwa akaburana ari hanze kuko adashobora gucika.

Yavuze ko yambuwe ibyangombwa bye by’inzira bivuga ko ntaho yabona ahera afata indege ahunga.

Greenberg kandi yavuze ko R Kelly atigeze yanga kwitaba ubutabera agendeye ku manza zose yagiye aburana kuva mu 2008, bityo ko nta mpungenge bakwiye kumugiraho.

Indi mpamvu yatangiyeho icyizere cy’uko R Kelly atatoroka ni uko kuri ubu nta mafaranga na make afite, ndetse n’inzu abamo ari uko yari yarayishyuye kugeza mu Ukuboza.

Ku mpamvu z’uko aramutse arekuwe yabangamira abana b’abakobwa, Greenberg yavuze ko ibyaha umukiliya we ashinjwa ari ibyakozwe mu myaka yo mu 1990 kandi nta cyemeza ko kuri ubu yabikora.

Nyuma yo kumva impande zombi, umucamanza yanzuye ko R Kelly akomeza gufungwa kuko ukekwaho icyaha cyo gukinisha abana amashusho y’urukozasoni agomba kuburana afunze.

R Kelly yatawe muri yombi mu cyumweru gishize nyuma y’ibirego byatanzwe n’ubushinjacyaha bwa leta ya New York na Illinois.

Ikirego cyo muri Leta ya Illinois gikubiyemo ibyaha by’ubugambanyi mu kwakira amashusho y’urukozasoni, kwakira amashusho y’urukozasoni, gukora amashusho y’urukozasoni y’abana, gukoresha abana bato imibonano mpuzabitsina n’ubugambanyi mu kwihisha ubutabera.

Ikigero cyo muri New York gikubiyemo ibyaha byo gukoresha ku gahato imibonano mpuzabitsina abana, gushimuta, gukoresha imirimo y’agahato no gucuruza abagore muri Leta za Illinois, Connecticut, California na New York.

Abakobwa bavugwaho gusambanywa na R Kelly biyemeje kumushinjura
Urukiko rwemeje ko R Kelly akomeza gufungwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza