Kwamamaza

Urujijo ku isimbuzwa rya Christophe Bazivamo muri EALA

Yanditswe kuya 21-09-2016 saa 11:12' na Rabbi Malo Umucunguzi


Nyuma yo kugirwa Umunyamabanga Mukuru wungirije mu Muryango wa Afurika y’u Burasirazuba (EAC), Depite Christophe Bazivamo aheruka kwegura mu Nteko Ishinga amategeko y’uyu muryango (EALA), aho yari akuriye Komisiyo y’Ubuhinzi, Ubukerarugendo n’Imitungo Kamere.

Nyuma yo kurahirira inshingano nshya mu Bunyamabanga bwa EAC, Perezida wa EALA Daniel Fred Kidega, yemeje ko umwanya wa Bazivamo nta muntu ukiwurimo, ndetse ko yabimenyesheje Inteko Ishinga Amategeko y’u Rwanda ku buryo biteganyijwe ko hazatorwa undi uzarangiza manda yari asigaje.

Bazivamo yatorewe kwinjira muri EALA ku itariki 13 Kamena 2011 asimbuye Dr Pierre Damien Habumuremyi icyo gihe wari wagizwe Minisitiri w’Uburezi, umwanya yavuyeho aba Minisitiri w’Intebe akaza gusimburwa na Anastase Murekezi.

Mu 2012 yatangiye indi manda y’imyaka itanu igomba kurangira muri Kamena 2017, bivuze ko yeguye manda ye isigaje amezi agera ku munani.

Ingingo ya 22 y’Itegeko n°15/2012 ryo kuwa 03/05/2012 rigena itora ry’abadepite b’u Rwanda muri EALA, iteganya ko gusimbura Umudepite w’u Rwanda muri EALA bikorwa iyo avuye mu mwanya we asigaje nibura umwaka umwe kugira ngo manda ye irangire.

Iyo ngingo ifite igika kigira kiti “Gusimbura Umudepite w’u Rwanda muri EALA bikorwa iyo avuye mu mwanya we asigaje nibura umwaka umwe kugira ngo manda ye irangire. Inzira zakoreshejwe kugira ngo abe Umudepite w’u Rwanda muri EALA ni na zo zikoreshwa kugira ngo asimburwe.”

“Umudepite usimbuye Umudepite w’u Rwanda watakaje umwanya we muri EALA arangiza igice cya manda gisigaye cy’uwo asimbuye.”

Ubwo bazivamo yinjiraga muri EALA bwa mbere, yari atsinze Theogene Karinamaryo wigeze kuba Burugumesitiri w’iyitwaga Komini Kanombe, aho mu badepite n’abasenateri 91 bari mu cyumba cy’Inteko Ishinga Amategeko, 83 batoye Bazivamo abandi 8 bagatora Karinamaryo.

Ni bande basigaye bahagarariye u Rwanda

Nk’uko itegeko rigena itora ry’abadepite b’u Rwanda muri EALA rikomeza ribigaragaza, Umuryango FPR Inkotanyi n’Imitwe ya politiki yishyize hamwe nayo bigiramo abadepite bane naho PL, PSD, Urubyiruko, Abagore n’Abafite ubumuga bakagira umudepite umwe umwe.

FPR ifitemo Martin Ngoga, Hajabakiga Mugorenejo Patricia na Rwigema Pierre Céléstin, hagasigara umwanya wa Christophe Bazivamo weguye.

PL ifite Odette Nyiramirimo, PSD ikagira Dr. Francois Xavier Kalinda, Urubyiruko ruhagarariwe na Ndikuryayo Straton, abagore bahagarariwe na Nyirahabineza Valerie mu gihe abafite ubumuga bahagarariwe na Dr. James Ndahiro.

Komisiyo y’amatora ntiramenyeshwa

Umunyamabanga Nshingwabikorwa wa Komisiyo y’Igihugu y’Amatora, Charles Munyaneza, yabwiye IGIHE ko kugeza uyu munsi bataramenyeshwa ko hari amatora yo gusimbuza Bazivamo azakorwa, ariko ko n’iyo babimenyeshwa bigomba kugendana n’amategeko.

Yagize ati ‘‘Kugeza ubu twe ntabwo twagira icyo tubivugaho kuko ntabwo biratugeraho. Abo muri EALA bagomba kwandikira Perezida w’Inteko Ishinga Amategeko w’aha, nawe akabisuzuma, akareba n’ayo mategeko, akabona kubitumenyesha babonye ko ari ngombwa ko asimburwa.’’

‘‘Natwe twabyumvise gutyo ko byasabwe ariko ibyo kuba asimburwa twe ntabwo baratumenyesha nka komisiyo y’amatora kuko iyo bitugezeho natwe tureba ibijyanye n’ayo mategeko, birashoboka ko nabo baba bakibisuzuma.’’

Ubusanzwe umudepite uvuye muri EALA asimburwa ate?

Itegeko rigena ko umudepite atakaza umwanya muri EALA iyo inzego zagize uruhare mu kumushyiraho zisanze ‘atacyujuje ibyangombwa’; ahamagariwe undi murimo ufitiye igihugu akamaro; agize uburwayi butuma adashobora gukomeza imirimo yatorewe byemejwe n’akanama k’abaganga; yaguye cyangwa apfuye.

Uwo mudepite byemewe kumusimbuza iyo avuyemo ‘‘asigaje nibura umwaka umwe kugira ngo manda ye irangire’’, kandi inzira zakoreshejwe kugira ngo abe Umudepite w’u Rwanda muri EALA ni na zo zikoreshwa kugira ngo asimburwe”, kandi uwinjiyemo ‘‘arangiza igice cya manda gisigaye cy’uwo asimbuye.’’

Ibyiciro byemerewe gutanga abakandida bishyikiriza Komisiyo y’Igihugu y’Amatora lisiti n’imyirondoro y’abakandida hagendewe ku mibare yagenwe, FPR-Inkotanyi n’imitwe ya politiki yishyize hamwe nabo batanga abakandida umunani, ibindi byiciro bigatanga babiri babiri.

Iyo Komisiyo y’amatora imaze kubasuzuma, ishyikiriza Perezida wa Sena na Perezida w’Umutwe w’Abadepite lisiti yemejwe kandi ikagenera kopi Perezida wa Repubulika na Perezida w’Urukiko rw’Ikirenga.

Itora rikorwa mu gihe kitarenze iminsi irindwi lisiti igejejwe kuri izo nzego, kandi itora rigakorwa hari nibura bitatu bya gatanu by’abagize buri mutwe w’Inteko Ishinga Amategeko.

Kwiyamamaza bikorwa ku munsi w’itora, abakandida bagahabwa igihe cyo kwiyamamaza kingana, umukandida utowe akaba uwabonye nibura amajwi ahwanye na kimwe cya gatatu cy’amajwi y’abatoye bose.

Iyo hari abanganyije amajwi, itora risubirwamo hagati yabo, urushije undi amajwi ku matora ya kabiri ni we uba utowe, bakongera kunganya hagakoreshwa tombola hakoreshejwe impapuro zanditseho Yego cyangwa Oya.

Ubwo Bazivamo yashimirwaga na Perezida Kagame nyuma yo kurahirira inshingano z'Umunyamabanga Mukuru Wungirije wa EAC

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 26 September 2016
Copyright © 2009 -2014 - IGIHE Ltd - All Rights Reserved