Uruganda rutonora umuceri (SODAR) rwafunzwe kubera kutishyura imisoro

Yanditswe na
Kuya 24 Ugushyingo 2017 saa 01:24
Yasuwe :
0 0

Uruganda rutonora umuceri rwitwa SODAR rukorera mu Karere ka Rusizi, rwafunzwe kuri uyu wa Gatanu kubera ibirarane by’imisoro.

Umuyobozi w’uru ruganda, Ndagijimana Laurent mu kiganiro yagiranye na IGIHE , yatangaje ko amakuru y’ifungwa ry’uruganda ahagarariye yari atarayamenyeshwa.

Yavuze ko ahubwo hari urubanza rw’ubujurire bari bafitanye n’Ikigo cy’Igihugu gishinzwe imisoro n’Amahoro ku bijyanye n’ibi birarane by’imisoro.

Ndagijimana yavuze ko mu rubanza rwa mbere SODAR yari yatsinze RRA nyuma yo kuruca imisoro kandi rutaragombaga kuyitanga nk’uko byagenwaga n’itegeko rigenga iby’imisoro n’amahoro.

Iri tegeko ryagenaga ko ibikomoka ku buhinzi bitatunganyijwe bidatanga umusoro ku nyongeragaciro.

RRA yaje kujurira n’iteka rya Minisitiri rigena ibijyanye n’imitunganyirize y’umusaruro ukomoka ku buhinzi rirahinduka bigeze mu mwaka wa 2016, hasohoka irindi rivuga ko ibikomoka ku buhinzi byatunganyijwe ari ibyahinduye isura byari bifite n’agaciro kabyo kakiyongera.

Ibi bikiba mu mpera za 2016, uru ruganda ngo rwakorewe igenzura na RRA rucibwa imisoro iranishyurwa, bigeze mu kwezi kwa karindwi uyu mwaka ruhagarika gukomeza gutanga uyu musoro, nk’uko byatangajwe na Gashonga Rwiririza uhagarariye Ikigo cy’Igihugu gishinzwe imisoro n’amahoro mu ntara y’Iburengerazuba.

Gashonga yakomeje asobanura ko kugeza ubu SODAR yishyuzwa miliyoni zigera kuri 94 z’amafaranga y’u Rwanda n’izindi zisaga 40 zigikorerwa igenzura.

Nubwo RRA yatsinzwe urubanza yaburanaga na SODAR ikanajurira ngo uruganda ntibyagombaga kurubuza kwishyura ibirarane by’imisoro rugategereza ko ruzatsinda burundu maze amafaranga rwatanze rukayasubizwa.

Gashonga yongeyeho ko uru ruganda rufunzwe mu gihe cy’iminsi 30 ariko ko ba nyirarwo baramutse bishyuye ibirarane by’imisoro rwahita rufungurwa ariko iramutse ishize batishyuye imitungo yarwo ishobora gutezwa cyamunara.

Uruganda rwafunzwe kubera ibirarane by'imisoro

Niba ushaka kuduha inkuru waduhamagara kuri 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza