Urubyiruko rwitabiriye Itorero Indangamirwa rwasuye Ingoro y’Urugamba rwo guhagarika Jenoside

Yanditswe na Thamimu Hakizimana
Kuya 28 Nyakanga 2019 saa 10:00
Yasuwe :
0 0

Urubyiruko rugera kuri 698 rwitabiriye icyiciro cya 12 cy’Itorero Indangamirwa, mu Kigo cy’imyitozo ya Gisirikare i Gabiro mu karere ka Gatsibo, basuye Ingoro y’Urugamba rwo guhagarika Jenoside iherereye ahari Inteko Ishinga Amategeko ku Kimihurura.

Kuva mu 2008 iri torero ryitabirwa n’urubyiruko ruba cyangwa rwiga mu mashuri makuru na za Kaminuza mu mahanga n’abitegura kujya kwigayo, ndetse na bagenzi babo barangije amashuri yisumbuye mu Rwanda bagize amanota meza mu bizamini bya Leta.

Kuri uyu wa Gatandatu ubwo bamwe muri uru rubyiruko 698 rwasuraga iyi Ngoro y’Urugamba rwo guhagarika Jenoside, rwabwiye IGIHE ko rwahungukiye ibintu byinshi birimo indangagaciro z’ubunyarwanda, gukunda Igihugu, kumenya amateka y’uburyo igihugu cyabohowe n’ibindi.

Bukuba Ikirezi Ernestine wiga mu Buhinde, yavuze ko yahigiye ubutwari bwo kwitangira igihugu cye.

Yagize ati “ Nungutse byinshi birimo indangagaciro z’ubutwari, kwihangana no kwitangira Igihugu byaba ngombwa ukanakimenera amaraso nk’uko ababyeyi bacu na bakuru bacu babigenje.”

Yongeyeho ko yishimiye gusura iyi Ngoro Ndangamateka y’Urugamba rwo guhagarika Jenoside, aboneraho gushishikariza urundi rubyiruko kujya ruyisura kugira ngo rurusheho kumenya amateka yaranze igihugu.

Kwitonda Alfred usoje umwaka wa Gatandatu w’amashuri yisumbuye mu Karere ka Gisagara , yagize ati “ Byadushimishije kuko twarushijeho gusobanukirwa n’amateka yaranze igihugu cyacu arimo uburyo Jenoside yateguwe n’uburyo Inkotanyi zayihagarikije.”

Umuyobozi wungirije w’Itorero ry’igihugu, Lt Col, Migambi Désire, yavuze ko kuba urubyiruko rusura y’amateka y’urugamba rwo guhagarika Jenoside, birufasha byinshi mu kurushaho kumenya amateka yaranze u Rwanda.

Yagize ati “ Iyo bahageze basobanurirwa uko urugamba rwo kwibohora rwatangiye kugeza igihe Jenoside yakorewe abatutsi mu 1994 ingabo za RPF zayihagarikije ku buryo birushaho kubafasha kumenya amateka no kugira indangagaciro z’ubunyarwanda, no kumenya za kirazira zitandukanye.”

Yongeyeho ko kujya mu Itorero ry’Igihugu ari ngombwa cyane ku rubyiruko kuko ruhigira amasomo menshi arimo amateka yo kubohora igihugu, ay’uburere mboneragihugu n’ay’ubwirinzi,indangagaciro n’andi.

Biteganyijwe ko uru rubyiruko rusazosa itorero tariki 7 Kanama 2019.

Basobanuriwe amateka y'uburyo Igihugu cyabohowe
Uru rubyiruko rwishimiye kumenya uburyo Jenoside yahagaritswe n'ingabo zari iza FPR Inkotanyi
Kwitonda Alfred usoje umwaka wa Gatandatu w’amashuri yisumbuye mu Karere ka Gisagara yavuze ko yarushijeho kumenya uko u Rwanda rwabohowe
Bukuba Ikirezi Ernestine wiga mu Buhinde, yavuze ko yahigiye ubutwari bwo kwitangira igihugu cye
Umuyobozi wungirije w’Itorero ry’Igihugu, Lt Col Migambi Désire, yavuze ko kuba urubyiruko rusura y’amateka y’urugamba rwo guhagarika Jenoside, birufasha byinshi mu kurushaho kumenya amateka yaranze u Rwanda.
Abari mu itorero ry’Indangamirwa bishimiye gusura Ingoro Ndangamateka y’Urugamba rwo guhagarika Jenoside
Bamwe mu rubyiruko rwiga mu mahanga bitabiriye itorero

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza