Urubyiruko rwo mu bihugu 14 bya Afurika rwakuye isomo ku rwibutso rwa Gisozi

Yanditswe na Jean Pierre Tuyisenge
Kuya 28 Nzeri 2016 saa 07:27
Yasuwe : XX
145 72

Urubyiriko rwaturutse mu bihugu 14 byo ku mugabane w’Afurika rwavuze ko rwakuye isomo ku rwibutso rwa Jenoside yakorewe Abatutsi ruri ku Gisozi, ryo kuyirwanya aho ari ho hose, nyuma yo gusobanurirwa amateka mabi yaranze u Rwanda mbere y’umwaka wa 1994.

Uru rubyiriko rwaje kwigira ku Rwanda gahunda ya Youth Connect yo muri Minisiteri y’Urubyiruko n’Ikoranabuhanga, ifasha guhuza urubyiruko n’abafatanyabikorwa baba babasha kubateza imbere, bagejejwe ku Rwibutso rwa Jenoside rwa Gisozi rubabazwa n’uburyo Abatutsi bishwe ntacyo bazira.

Colislie Tfwala waturutse muri Swaziland yavuze ko akibona ibyabaye mu Rwanda ahakuye isomo adateze kuzibagirwa mu mateka ye.

Yagize ati “Ibyo mbonye byakozwe muri Jenoside yakorewe Abatutsi mu mwaka wa 1994, birababaje kandi biteye agahinda. Gusa bimbereye isomo ryo kuba ngiye gukora uko nshoboye nkirinda icyatera Jenoside ku mugabane wanjye wa Afurika.”

Uru rubyiruko ruvuga ko amateka yaranze u Rwanda akwiye kubera urugero Afurika n’Isi muri rusange.

William Furaha, Umuyobozi muri Minisiteri y’Urubyiruko n’Ikoranabuhanga ushinzwe gukurikirana ibikorwa bya Youth Connect, yatangarije IGIHE ko bashimye kuzana urubyiruko rwo mu bindi bihugu ku rwibutso kugira ngo bamenye ko ibyo bakora bakwiye kurwanya Jenoside kuko isenya ibyo bagezeho.

Yagize ati “ Nyuma yo kubasobanurira uko u Rwanda rwageze kuri gahunda ya Youth Connect, twahisemo kubazana hano kuko urubyiruko ni rwo rwagize uruhare runini mu ishyirwa mu bikorwa rya Jenoside yakorewe abatutsi, ni na bo bagize uruhare mu kuyihagarika. Ibi turagira ngo bakore ariko barwanya icyabacamo ibice.”

Urubyiruko ruri mu Rwanda rwaturutse mu bihugu bya Burkina Faso, Repubulika Iharanira Demokarasi ya Congo, Congo, Ghana, Cameroon, Lesotho, Swaziland, Guinee Equatorial, Misiri, Sierra Leone, Uganda, Sao Tomé-et-Principe, Zimbabwe, na Liberia.

Jenoside yakorwe Abatusti mu Rwanda yaguyemo abasaga miliyoni mu gihe cy’amezi atatu gusa. Urwibutso rwa Gisozi rushyinguyemo imibiri isaga ibihumbi 250 y’Abatutsi bazize Jenoside mu 1994.

Basobanuriwe uko Jenoside yakozwe
Bunamiye inzirakarengane za Jenoside

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE