Urubyiruko rwahize kurwanya abaharabika u Rwanda binyuze ku mbuga nkoranyambaga

Yanditswe na Jean Pierre Tuyisenge
Kuya 29 Nzeri 2016 saa 11:18
Yasuwe :
0 0

Ubwo hamurikwaga ku mugaragaro ibyavuye mu mihigo y’urubyiruko y’umwaka 2015-2016 no guhiga iy’umwaka wa 2016-2017, ibyo abahuzabikorwa barwo bahize, harimo no gukoresha imbuga nkoranyambaga za twitter na facebook bahangana n’abaharabika u Rwanda.

Iyo mihigo yahizwe n’urubyiruko rwo mu Turere 30 ku wa 23 Nzeri 2016, ikubiye mu byiciro bitatu aribyo :Iterambere ry’ubukungu, imibereho myiza, n’imiyoborere myiza, harimo n’umuhigo wo gufungura no gukoresha imbuga nkoranyambaga za twitter na facebook.

Uwanyirigira Clarisse, Umuhuzabikorwa w’Inama y’Igihugu y’urubyiruko ku rwego rw’Igihugu, yagize ati “Hazafungurwa imbuga 30 za Twitter na Facebook mu Turere twose, zigamije gusigasira ibyagezweho mu gihugu cyacu kandi twarabitangiye tubigeze kure.”

Uyu muyobozi atera umwete urubyiruko wo gukoresha imbuga nkoranyambaga bagaragaza ibyiza u Rwanda rwagezeho, bityo ababigoreka bakabura aho bamenera.

Kamanzi Ernest, Umuhuzabikorwa w’Inama y’Igihugu y’Urubyiruko mu Karere ka Kamonyi, ntasobanya na Uwanyirigira.

Yagize ati “Tugiye gushyiramo imbaraga cyane mu gukoresha imbuga nkoranyambaga, turwanya bano bantu bagenda baharabika igihugu cyacu, tuzabarwanya biciye mu ikoranabuhanga, aho twiyemeje ko tugiye gushyiraho ‘Twitter’ na ‘Facebook’ by’Akarere ka Kamonyi, ndizera ko zizatanga umusaruro.”

Perezida Kagame nawe yigeze gukomoza kuri ibi

Perezida Kagame ubwo yasozaga icyiciro cya gatatu cy’Itorero ry’abanyeshuri bahagarariye abandi muri za Kaminuza cyitwa ’Intagamburuzwa’, ku wa 11 Nzeri 2016, yagize icyo avuga ku mbuga nkoranyambaga.

yagize ati “Ubahagarariye kare yigeze kuvuga ikintu cya social media (imbuga nkoranyambaga), umuntu ashobora kuba umwe gusa cyangwa babiri muri mwe, bagakoresha ikoranabuhanga risigaye ririho, bigasa nk’aho abavugira mwese, kandi atari byo, cyangwa se akarwanya ibyo mutekereza, mukora, mushaka mwese, ku buryo bigaragara nk’aho koko ari we watsinze. Uzi aho bituruka? Ni ukuvuga ngo yakoresheje uburyo bumwe buri wese muri mwe ashoboye gukoresha, ariko we yabikoresheje mwe ntimwabikoresheje.”

Bamwe mu bitabiriye Inama y’Igihugu y’Umushyikirano yabaye ku nshuro ya 13 yateranye ku matariki ya 21-22 Ukuboza 2015, bagaragaje ko urubyiruko rukwiriye gukoresha imbuga nkoranyambaga rukerekana ukuri ku bibera mu Rwanda.

Bagaragaje ko mu Banyarwanda miliyoni 12 hataburamo ibihumbi 12 byajya ku mbuga nkoranyambaga bikagira uruhare mu gutanga amakuru y’impamo no kunyomoza ibinyoma.

Minisitiri w’Urubyiruko n’Ikoranabuhanga, Jean Philbert Nsengimana yavuze ko Abanyeshuri bo muri Kaminuza “Intagamburuzwa”, bahize umuhigo wo kuzuza miliyoni y’ingabo zirwanira mu rubuga rw’itangazamakuru.

Yagize ati “Dufite Abanyarwanda bagera kuri miliyoni 8,5 bafite telefoni zigendanwa,abo bose rero ntihaburamo miliyoni ishishikarizwa kuvuga ibibera mu Rwanda. Tubijeje ko uru rugamba twiteguye kurutsinda kuko ni umuhigo duhuriyeho n’abandi benshi.”

Imbuga nkoranyambaga, ni imwe mu ntwaro ikunze gukoreshwa na bamwe bagoreka amateka bapfobya, bakanahakana Jenoside yakorewe Abatutsi.

Urubyiruko rwahize guhangana n'abapfobya ibyo u Rwanda rwagezeho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza