Urubyiruko rwahawe umwihariko mu kwizihiza umunsi mpuzamahanga w’amahoro

Yanditswe na Evariste Nsengimana
Kuya 19 Nzeri 2018 saa 12:17
Yasuwe :
0 0

Buri wa 21 Nzeri, u Rwanda rwifatanya n’Isi yose mu kwizihiza umunsi mpuzamahanga w’amahoro, watangiye kwizihizwa mu 1981.

Kuri iyi nshuro Isi yihaye insanganyamatsiko igaruka ku ‘Uburenganzira ku mahoro, isabukuru y’imyaka 70 ku burenganzira bwa muntu.’ Gusa u Rwanda rwongeraho umwihariko ugira uti ‘Imitekerereze isesengura’.

Mu kiganiro n’itangazamakuru cyo kuri uyu wa Kabiri, Komisiyo y’Igihugu y’Ubumwe n’Ubwiyunge (NUR) n’umuryango Never Again Rwanda, basobanuye ko urubyiruko ruzahabwa umwihariko mu kwizihiza uyu munsi mpuzamahanga w’amahoro.

Umunyamabanga Nshingwabikorwa wa NUR, Fidèle Ndayisaba, yavuze ko uyu mwaka bahisemo uburyo bw’ibiganiro byibanda ku rubyiruko, kugira ruzakure rwiyumvamo ubudahangarwa.

Yasobanuye ko byagiye bigaragara ko urubyiruko rwifashishwa mu bikorwa bisenya amahoro, atanga urugero mu Rwanda, rwijanditse muri Jenoside yakorewe abatutsi mu 1994 ndetse ko n’ahandi ku Isi.

Ati “Niyo mpamvu dusanga dukwiye kwita ku rubyiruko. Ku kuzirikana ku mahoro, rwitaweho cyane.”

Kuri ubu abafatanyabikorwa ba NURC, bari gufasha urubyiruko hirya no hino mu gihugu kumva uruhare rufite kugira ngo igihugu kigire umudendezo n’impamvu yabyo.

Ibi binyura mu bukangurambaga bwo kurukangurira kwirinda ibiyobyabwenge byugarije Isi bitaretse n’u Rwanda, ihohoterwa rukorerwa rikarurenga rikagera no ku bana n’ibindi.

Ndayisaba avuga ko umwana watewe inda, bimwangiriza ubuzima bikamwicira ahazaza, akaba ikibazo ku muryango no ku gihugu, bikabangamira amahoro.

Ati “Ubona bibabaje. Mu byo tuzirikana muri uyu mwaka twongera guhamagarira urubyiruko gutekereza kugira ngo bashobore kwirinda, tugahamagarira n’abakuru gutekereza kugira ngo birinde kwangiza urubyiruko.”

Uretse icyo kibazo urubyiruko ruzigisha kwirinda harimo kwishora mu bwiyahuzi n’ubuhezanguni nubwo mu Rwanda bidakabije.

Ibi biganiro biteganyirijwe urubyiruko, ku wa 21 Nzeri muri Kigali Serena Hoteli, aho bizitabirwa n’urubyiruko 400 ruhagarariye bagenzi barwo mu turere twose n’inzego zitandukanye z’ubuyobozi.

Kuri uyu munsi, bazatanga ibitekerezo n’ibibazo birwugarije bishobora kubangamira amahoro.

Umunyamabanga Nshingwabikorwa wa NUR, Fidèle Ndayisaba, yavuze ko uyu mwaka bahisemo uburyo bw’ibiganiro byibanda ku rubyiruko, kugira ngo ruzakure rwiyumvamo ubudahangarwa
Umuyobozi mukuru wa Never Again Rwanda, Dr. Joseph Ryarasa Nkurunziza

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza