Urubyiruko rw’u Rwanda rwasangije bagenzi babo ba Afurika uko bakwikura mu bibazo bya politiki

Yanditswe na Iradukunda Serge
Kuya 22 Nyakanga 2019 saa 07:41
Yasuwe :
0 0

Urubyiruko rw’u Rwanda ruba mu mitwe ya politiki itandukanye rwasangije bagenzi babo baturutse mu bindi bihugu bya Afurika ubunararibonye ku kwirinda no gukumira ibikorwa by’ihohoterwa rishingiye ku matora na politiki muri rusange.

Ni mu nama y’iminsi itatu yateguwe n’Ikigo mpuzamahanga cy’ubufasha muri demokarasi n’amatora (IDEA), iri kubera mu Rwanda, aho ihuza urubyiruko ruri mu mashyaka ya politiki atandukanye mu bihugu bya Afurika.

Rurimo kwiga ku bibazo bitandukanye babona muri politiki z’ibihugu byabo ndetse n’uruhare rw’urubyiruko mu bikorwa bibi cyangwa byiza bibera mu bihugu byabo.

Umuyobozi wa gahunda y’amashyaka ya politiki muri Ghana, Ewald Quaye Garr, yagaragaje ko ibihugu bya Afurika bikwiye kwigira kuri gahunda y’u Rwanda yo kwishakamo ibisubizo.

Ati “U Rwanda rufite uburyo bwiza bwabafashije kurenga ibibazo bahuye nabyo imyaka 25 ishize kandi ubwo buryo babukuye mu muco wabo no mu byo bafite. Ibindi bihugu nabyo bikwiye kwishakamo icyo bafite mu muco bakagikoresha mu mpinduka bashaka batiriwe bakura ibisubizo ahandi”.

Mu guhitamo ibihugu bizitabira iyi nama ari byo Cameroun, Ghana, Zimbabwe, Guinee Conakry hagendewe ku bifite amatora mu myaka mike iri imbere.

Ku ruhande rw’urubyiruko rw’u Rwanda, Elysee Twizerimana wari uhagarariye ishyaka riharanira Demokarasi no kurengera ibidukikije mu Rwanda (Green Party), yavuze ko urubyiruko rwa Afurika rukwiye kwigira ku bibazo u Rwanda rwanyuzemo n’uburyo byabonewe ibisubizo.

Ati “Mbere Jenoside yakorewe abatutsi mu 1994 twari tumeze nk’ibi bihugu, haba ubutegetsi bubi bwari buriho nk’uko babivuga iwabo ubu, haba ibibazo by’iringaniza mu mashuri. Ni ibibazo twaciyemo ariko ubungubu twabishakiye ibisubizo ubu icyo turi kubigisha ni uburyo nabo bava muri ibi bibazo”.

Akomeza agira ati “Hari uburyo bw’uburezi budaheza iwabo ibyo ntibihaba ndetse bakiga no gusaranganya ubutegetsi n’andi mashyaka nk’uko bimeze mu Rwanda”.

Umuyobozi wa gahunda muri IDEA Kayitare Frank, yavuze ko bahisemo ko iyi nama yabera mu Rwanda kuko ari igihugu cyatanga isomo ku bikorwa b’ibi n’ibyiza by’urubyiruko.

Ati “Impamvu twahisemo ko ibera mu Rwanda ni uko mu Rwanda urubyiruko rufite amateka amwe mabi n’andi meza, aho rwagize uruhare mu bikorwa byo gusenya igihugu no mu bwicanyi mu gihe cya Jenoside yakorewe abatutsi mu 1994 ariko hakaba n’urubyiruko rwitanze nanone mu buryo bugaragara mu guhagarika jenoside. Ikindi ni uko na nyuma ya Jenoside mu Rwanda urubyiruko rufite inshingano zikomeye”.

Iyi nama iri kubera mu Rwanda izasozwa taliki ya 25 Nyakanga bikaba byitezwe ko izafasha urubyiruko mu kwirinda gukoreshwa mu bikorwa bibi bya politiki.

Urubyiruko rwagize umwanya wo kuganira ku bibazo bya politiki biri mu bihugu baturukamo
Bamwe mu bari mu rubyiruko rwaje ruhagarariye Cameroun
Uhagarariye itsinda ry'u Rwanda amurikira abandi uburyo bishatsemo ibisubizo
Ewald Quaye Garr waturutse muri Ghana yagaragaje ko ibindi bihugu nabyo bikwiye kwishakamo ibisubizo
Itsinda ryari rihagarariye u Rwanda muri iyi nama basangije abandi uburyo bwo kwishakamo ibisubizo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza