Kwamamaza

Urubyiruko rwasabye NAEB kutarurenza ingohe mu mamurikagurisha mpuzamahanga

Yanditswe kuya 26-11-2016 saa 08:22' na Hagengimana Philbert


Urubyiruko rukora ubucuruzi bushamikiye ku buhinzi rwibumbiye mu ihuriro (Rwanda Youth in Agribusiness Forum-RYAF) rwasabye Ikigo cy’Igihugu gishinzwe kohereza mu mahanga ibikomoka ku buhinzi mu Rwanda (NAEB) kutazongera kururenza ingohe igihe hakenewe abitabira amamurikagurisha mu mahanga.

Buri mwaka abikorera mu Rwanda bitabira amamurikagurisha mpuzamahanga abera mu bindi bihugu, bakabasha kunguka ubumenyi n’amasoko, bigatuma ubucuruzi bwabo burushaho kwaguka.

Icyakora ayo mahirwe ngo si aya buri wese, ahubwo urutonde rw’abitabira ayo mamurikagurisha ruhora ari rumwe nk’uko Dieudonné Twahirwa Diego, Umuyobozi wungirije wa RYAF, yabikomojeho mu nama yahuje urwo rubyiruko n’abafatanyabikorwa barwo yabaye kuri uyu wa Gatanu tariki ya 25 Ugushyingo 2016, agasaba ko NAEB itakongera kubarenza ingohe.

Yagize ati “NAEB ni umufatanyabikorwa wacu ariko impamvu biriya nabikomojeho ni ikintu cyakabaye gikosorwa. Mwabonye ko imbogamizi twagaragaje ari ukugera ku masoko yizewe, adatenguha ngo ahindagure ibiciro buri kanya, ayo nta kuntu wayageraho utitabira amamurikagurisha mpuzamahanga. Rero usanga NAEB nk’ikigo kibishinzwe, bahorana urutonde rutajya ruhinduka.”

Akomeza avuga ko ibyo bituma hari abitabira ayo mamurikagurisha bakagaruka babonye andi masoko, kandi n’ayo basanganywe batarabasha kuyahaza, ndetse ubumenyi bungukiyeyo ntibabusangize abatarashoboye kwitabira, ibyo bigatuma bibaza impamvu hadashakwa andi maraso mashya hibanzwe ku rubyiruko rushobora no guhugura bagenzi babo.

Umuyobozi Mukuru Wungirije wa NAEB, Sandrine Urujeni yatangaje ko icyifuzo cy’urwo rubyiruko cyakiriwe, gusa ngo hari bamwe mu bari basanzwe bakorana.

Yagize ati “Ubundi bariya na bo ni abashoramari, bagenda muri uwo murongo. Tureba abo dukorana, bafite icyo bajyanye ku isoko, ubundi tukaborohereza. Ni yo mpamvu twavugaga tuti ibyo birashoboka, kandi hari n’abo dukorana. Kuko ari abashoramari turabatera umwete, nibamara kugera ku rwego rwisumbuye, tuzakorana rwose nta kibazo.”

Mu nama RYAF yahuriyemo n’abafatanyabikorwa bayo barangajwe imbere n’Ishami rya Loni rishinzwe ubuhinzi n’ibiribwa ku Isi (FAO) nk’umuterankunga mukuru, Umunyamabanga wa Leta muri Minisiteri y’Ubuhinzi n’Ubworozi ushinzwe Ubuhinzi, Nsengiyumva Fulgence, yatangaje ko Guverinoma y’u Rwanda yiteguye gushyigikira urwo rubyiruko muri byose.

Ati “Mu izina rya Minisiteri y’Ubuhinzi, ndagira ngo nshimangire ubushake bwo gufasha byuzuye RYAF, kugira ngo izabashe kugera ku ntego zayo.”

Yakomeje asaba abagize RYAF kwita no ku rubyiruko rwo mu cyaro kuko runakora ubuhinzi ari rwinshi, bakarufasha guhinga kinyamwuga kandi bagamije kwihaza ndetse no kwagura ubucuruzi.

RYAF ni ihuriro ry’urubyiruko rukora ubucuruzi bushamikiye ku buhinzi n’ubworozi, igizwe n’abanyamuryango 1228, barimo abahinzi, aborozi, abongerera agaciro umusaruro ukomoka ku buhinzi n’ubworozi, abatanga ibisubizo bishingiye ku ikoranabuhanga mu buhinzi, abatanga ubundi bumenyi, inyongera musaruro n’ibindi.

Uhereye ibumoso, Umuyobozi wa RYAF, Jean Baptiste Hakizimana, Umunyamabanga wa Leta muri MINAGRI ushinzwe Ubuhinzi, Nsengiyumva Fulgence n'uhagarariye FAO
Bamwe mu baterankunga, n'abafatanyabikorwa ba RYAF
Umuyobozi wa RYAF, Jean Baptiste Hakizimana
Abitabiriye inama bafata ifoto y'urwibutso

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 2 Ukuboza 2016
Copyright © 2009 -2014 - IGIHE Ltd - All Rights Reserved