Urubanza rwa Seyoboka rwasubitswe

Yanditswe na Philbert Girinema
Kuya 7 Mutarama 2017 saa 09:41
Yasuwe : XX
0

Jean Claude Seyoboka ukekwaho uruhare muri Jenoside yakorewe abatutsi wazanywe mu Rwanda akuwe muri Canada umwaka ushize, kuwa Gatanu tariki 6 Mutarama 2016 yagejejwe imbere y’ubutabera asaba ko yagumana umwunganizi yari afite kuva yazanwa mu Rwanda.

Uregwa yagejejwe mu rukiko rwa Gisirikare i Nyamirambo, aho ubushinjacyaha bwongereye iminsi y’agateganyo kuko 30 yari yahawe yarangiye iperereza ritarangiye.

Mbere y’uko ubushinjacyaha bugeza ku nteko iburanisha ibyo bushinja Seyoboka wahoze ari umusirikare, uregwa yasabye urukiko ko yagumana umunyamategeko batangiranye urubanza kuva yagezwa mu Rwanda.

Yavuze ko yandikiye urukiko rwa gisirikare ngo rumwishyurire umwunganizi we Nkundabatware Albert ariko ngo urugaga rw’abavoka rwamuzaniye utishyurwa witwa Channy Uwimana.

Uyu mugabo wari mu ngabo za EX-FAR, yabwiye urukiko ko afite umunyamategeko batangiranye urubanza ariko urugaga rw’abavoka rukaba rwamushyiriyeho utishyurwa, ibintu yateye utwatsi.

Yagize ati “ Ndasaba ko uru rubanza rwasubikwa kugira ngo mbanze numvikane n’umwunganizi nashyiriweho n’urugaga rw’abavoka. Ndatekereza ko urubanza rwazambera rwiza ndamutse ngumanye Albert Ngirabatware, uzi urubanza rwanjye kuva rutangiye.”

Uregwa avuga ko mbere y’uko azanwa mu Rwanda, mu masezerano Leta y’u Rwanda yagiranye na Canada ari uko agomba kuzahabwa umwunganizi yishyurirwa na Leta avuga ko nta mpamvu abona yatuma ahabwa utishyurwa.

Ubushinjacyaha ntibwemeranya nawe ndetse buvuga ko Seyoboka atari mu cyiciro cy’abazanywe mu Rwanda nk’abandi kuko ngo we yirukanwe na Canada, buvuga ko yagenewe umwunganizi kuko we yatangaje ko atishoboye.

Itegeko rigenga imanza z’abakekwaho ibyaha baba baroherejwe n’ubutabera bwo hanze, barimo n’aboherejwe n’Urukiko Mpuzamahanga Mpanabyaha rwashyiriweho u Rwanda , rivuga ko abakekwaho ibyaha bagomba kugenerwa abunganizi bishyurwa na Leta.

Umushinjacyaha wa gisirikare, Capt Kayiranga Kayihura yavuze ko ibyo Seyoboka akora bigamije gutinza nkana urubanza. Ati “ Ni uburyo bwo gutinza urubanza ku bushake, ibisabwa byose byasuzumwe neza kandi byarubahirijwe kuva muri Canada kugera mu Rwanda, ndetse n’Urugaga rw’Abavoka rwamugeneye umwunganizi, kereka gusa nagaragaza ko adashoboye, nta mpamvu tubona yo kumusimbuza.”

Nyuma yo kumva ibyavugwaga n’impande zombi, Maj Gerard Muhigirwa wari uyoboye inteko iburanisha yahise arwimurira ku itariki 27 Mutarama 2017. Urukiko rukaba rwasabye uregwa kugaragaza ibimenyetso byerekana ko yemerewe umwunganizi wishyurwa na leta.

Jean Claude Seyoboka w’imyaka 50 avuka mu Karere ka Nyarugenge mu Mujyi wa Kigali. Ubushinjacyaha bumukurikiranyeho ibyaha bya jenoside n’ibyibasiye inyokomuntu.

Bumurega ko yabikoreye i Kigali aho yari umusirikare mu ngabo zahoze ku butegetsi bwa Perezida Juvenal Habyarimana gusa byose arabihakana.

Seyoboka ashinjwa no kuba yarakoze inama zateguraga zikanashishikariza abantu gukora Jenoside, izwi cyane ni iyabaye kuwa 21 Mata 1994 yateguye igitero cyagiye kwica Abatutsi bari bahungiye ahitwa kuri CELA ‘Centre d’etudes des Langues Africaine’, aho bukeye bwaho abarenga 72 bishwe.

Mu 1996 nibwo Seyoboka yagiye muri Canada ahabwa sitati y’ubuhunzi ariko iza gukurwaho bitewe n’uko nyuma byaje kugaragara ko mu myirondoro yatanze hari ibyo yagiye abeshya birimo no kuba ataravuze ko yari umusirikare ufite ipeti rya Sous- Lieutenant mu ngabo za Ex-FAR.

Ahagana saa sita na 40 z’ijoro zo ku wa 18 Ugushyingo 2016, nibwo yageze mu Rwanda akuwe muri Canada aho yari yarahungiye.

Seyoboka aganira na Me Ngirabatware mu rukiko rwa gisirikare kuri uyu wa Gatanu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza