UR yahigitse izindi kaminuza mu mwitozongiro w’ibijyanye n’amategeko

Yanditswe na Iradukunda Serge
Kuya 29 Kamena 2019 saa 11:55
Yasuwe :
0 0

Kaminuza y’u Rwanda yegukanye umwanya wa mbere ihigitse izindi Kaminuza n’amashuri makuru yo mu Rwanda, yigisha amategeko, mu irushanwa ryo kuburana ku mategeko y’ubutaka n’umutungo.

Moot Court Competition ni umwitozongiro ufasha abanyeshuri kwitoza uko baburana, abanyeshuri bigabanyamo amatsinda ubundi bakaburana ku ngingo runaka.

Icyiciro cya nyuma cy’uyu mwitozo cyabereye mu cyumba cy’urukiko rw’Ikirenga, aho Kaminuza y’u Rwanda yatsinze Kaminuza ya Kigali (UOK) nyuma yo gutsinda izindi kaminuza bahuye mu byiciro byabanje.

Iri rushanwa rigamije kuzamura ubushobozi bw’abanyeshuri biga amategeko mu Rwanda, ryateguwe Umuryango uharanira amahoro n’uburenganzira bwa muntu mu karere k’ibiyaga bigari, Initiatives for Peace and Human Rights (IPHR), umuryango utanga ubufasha mu bijyanye n’amategeko ku batishoboye batabasha kwiyishyurira izi serivisi ku nkunga ya USAID.

Kaminuza zahatanaga harimo Kaminuza yigenga ya Kigali (ULK), Kaminuza y’Abalayiki b’Abadivantisite (UNILAK), ishuri rikuru ry’ubumenyi ngiro rya INES, Kaminuza ya Kigali (UOK) na Kaminuza y’u Rwanda (UR).

Umuyobozi Mukuru wa IPHR, Dr Elvis Mbembe Binda, avuga ko iri rushanwa rifasha abanyeshuri gukora ubushakashatsi ku bijyanye n’ibyo biga.

Ati “Bifasha abanyeshuri gukora ubushakashatsi, kuko bagira n’umwitozo bandika tukawuha amanota. Ibi bitera abanyeshuri imbaraga zo gukora ubushakashatsi”.

Mutesi Patricia umwe mu banyeshuri bari bahagarariye Kaminuza y’u Rwanda, muri iri rushanwa yavuze ko nk’abanyeshuli uyu mwitozongiro ubafitiye akamaro.

Ati “Iki gikorwa cyitwemerera gushyira ibyo twize mu mategeko tukabishyira mu ngiro kuko turaza tukaburana ikindi bidufasha gutinyuka urukiko”.

Iri rushanwa ryari risanzwe rihuza kaminuza zo mu karere bikaba ari ubwa mbere ribaye ku rwego rw’igihugu rihuza kaminuza zo mu Rwanda gusa.

Kaminuza y'u Rwanda yahigitse izindi kaminuza mu mwitozongiro w'amategeko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza