00:00:00 IGIHE NETWORK KN KINYARWANDA EN ENGLISH FR FRANCAIS

UR yahaye impamyabumenyi abasaga ibihumbi umunani barimo abahawe PhD

Yanditswe na Akayezu Jean de Dieu
Kuya 27 Kanama 2021 saa 11:48
Yasuwe :
0 0

Kaminuza y’u Rwanda yahaye impamyabumenyi abanyeshuri 8,908 barangije mu byiciro bitandukanye bya kaminuza barimo batanu bahawe impamyabumenyi y’ikirenga, PhD ari na zo nyinshi zitanzwe muri iyi Kaminuza ku nshuro ya mbere.

Umuhango wo gutanga izi mpamyabumenyi wabaye kuri uyu wa 27 Kanama 2021, muri Kigali Conference & Exhibition Village [Camp Kigali] witabirwa na Minisitiri w’Uburezi, Dr Uwamariya Valentine, abayobozi mu nzego zitandukanye zirimo na Kaminuza y’u Rwanda.

Umuyobozi Mukuru wa Kaminuza y’u Rwanda, Prof Lyambabaje Alexandre, yasabye abasoje amasomo kuzaharanira gukomeza kuba ab’ingirakamaro ku miryango yabo, igihugu cyabo ndetse bakibuka ko Kaminuza y’u Rwanda ikibakeneye.

Ati “Nk’uko igihugu, inshuti, ababyeyi n’abavandimwe bitanze kugira ngo mushobore kwiga, mugiye hanze mutazaba abantu bahora mu maganya y’ibyo mutashoboye gukora ahubwo mu bushobozi mufite mukore ibishoboka byose kugira ngo igihugu cyacu, ibihugu duturanye n’Isi muri rusange bitere imbere.”

Mu barangije amashuri harimo batanu barangije icyiciro gihanitse cya Kaminuza, PhD, harimo kandi 385 barangije icyiciro cya Gatatu cya Masters, mu gihe 7.796 barangije icyiciro cya Bachelor.

Hari kandi abantu 467 barangije icyiciro cya A1, abandi 255 bize muri porogaramu n’ibyiciro bitandukanye.

Minisitiri w’Uburezi, Dr Uwamariya Valentine yashimye abarangije amashuri umuhate bagiye bagaragaza nubwo bize mu bihe bigoye byo guhangana n’icyorezo cya Covid-19.

Yanashimiye ababyeyi, abibutsa ko igihugu kibakeneye mu gukomeza kuba hafi y’aba bana.

Ati “Tubashimiye ko mwabyaye neza, mukarerera igihugu neza none umusaruro ukaba ugaragaye, ariko na none turacyabakeneye. Iyi ni intangiriro.”

Yavuze ko igishimishije kuri aba banyeshuri basoje amasomo ari uko bize mu buryo bw’ikoranabuhanga ku buryo byafashije UR kwimakaza ikoranabuhanga mu bikorwa byayo byose.

Minisitiri Dr Uwamariya yibukije abarangije ko ari bwo urugendo rutangiye, bityo bakwiye gufungura amaso bakareba icyo gukora harimo kwihangira imirimo.

Ati “Uyu munsi barishimye ariko nyuma y’ukwezi bazaba batangiye gutaka ngo babuze akazi, ni yo mpamvu mvuga ko ari urugendo, harimo gushaka akazi bagahabwa n’abandi cyangwa bo bagerageza kwishyira hamwe bagahanga imirimo. Ndagira ngo bumve ko aho bagiye bamenye ko aribwo bategerejweho umusaruro.”

Yakomeje agira ati “Bamaze imyaka ine, ab’ubuvuzi bo biga n’imyaka itandatu, urumva baba barize ibintu byinshi, bageze mu gihe cyo kureba ngo ibyo nize byamarira iki? Nabikoresha iki? Ni yo mpamvu mvuga ngo ni urugendo, bizagaragarira mu bikorwa bazakora ni bwo tuzamenya koko ko bize.”

Karasira Dan Tumusiime wigaga ibijyanye n’ubuvuzi, akaba ari na we uhagarariye abarangije amashuri yavuze ko nubwo bayarangije ariko bahuye n’ibihe bikomeye by’icyorezo cya Covid-19, ariko ku bufatanye n’ubuyobozi bwa UR babasha kubyitwaramo neza.

Ati “Kuva Covid-19 yaza, abantu bahinduye uburyo bw’imyigire bakoresha ikoranabuhanga, hari aho byakunze n’aho bitakunze, twarategereje Covid-19 igabanya ubukana, turagenda twiga ibyari bisigaye ariko twishimiye ko uyu munsi birangiye.”

Yakomeje agira ati “Ntabwo twicaye, bamwe twaramanutse tujya gufatanya n’abandi mu rugamba rwo guhanga na Covid-19. Ibi ni byo bizakomeza kuturanga muri iki gihe turangije kwiga.”

Ibigo by’icyitegererezo bya UR byatangiye kwera imbuto

Mu 2017, ni bwo mu Rwanda binyuze muri Kaminuza y’u Rwanda [UR], hashyizweho ibigo bine by’icyitegererezo byigisha amasomo atandukanye bikanakora ubushakashatsi ku rwego rw’icyiciro cya gatatu ndetse n’igihanitse bya Kaminuza (Masters na PhD).

Ibi bigo by’Icyitegererezo mu Burezi Nyafurika [African Centers of Excellence], ni umushinga mugari watewe inkunga na Banki y’Isi aho muri rusange mu Rwanda hashyizwe bine birimo icyigisha ibijyanye n’ikoranabuhanga rya internet ariko ikoresha ibintu bitandukanye [African Center of Excellence in Internet of Things, ACEIoT].

Mu banyeshuri batanu bahawe PhD kuri uyu wa Gatanu barimo batatu barangije muri ibi bigo, ibintu Kaminuza y’u Rwanda igaragaza ko ari intambwe nziza yo kwishimira.

Prof Lyambabaje ati “Ibi bigo byihariye byigisha ku rwego rwa Masters na PhD ku mafaranga igihugu cyacu cyagujije muri Banki y’Isi kugira ngo dutangire kwigisha abanyeshuri bacu muri icyo cyiciro. Ubu rero biragaragaza ko kaminuza irimo kubaka ubushobozi bwo kwigisha, ubu harangije batanu ariko mu mwaka utaha bazaba ari benshi kurushaho.”

Yakomeje agira ati “Turizera ko umwaka utaha hazarangiza abandi benshi kandi hariya niho havamo abafite bwa bushobozi twifuza bwo mu rwego rwo hejuru, kuza kwigisha abandi muri kaminuza no guteza imbere ubushakashatsi.”

Ubusanzwe kohereza umuntu kwiga PhD mu mahanga, ni ibintu bihenze cyane ko uretse kuba kwishyura amafaranga aba ari menshi kuko ushobora gusanga hari nk’aho bishyura $30,000, ibi bikiyongeraho n’ikiguzi cyo kubaho ku muntu uri kuyiga cyane ko bishobora kumara imyaka igera ku munani.

Minisitiri w’Uburezi, Dr Uwamariya Valentine yavuze ko iyi ntambwe ishimishije kuko ahanini n’ubushakashatsi baba bakora usanga ari ubushingiye ku bibazo igihugu gifite bityo bakaba bashaka ibisubizo byabyo.

Ati “PhD irahenda, nk’abantu biga za siyansi ushobora gusanga nko ku mwaka bimutwara amadorali ibihumbi 100 kubera n’ubushakashatsi aba akora, iyo bakoreye hano rero hari ikiguzi kivaho, icya mbere ubuzima aba asanzwe abamo ni bwo akomeza kubamo noneho ikiguzi gitangwa rero kikaba icyo gukora ubushakashatsi.”

Yongeyeho ati “Ikindi cyisumbuyeho, abenshi kugira ngo bakorere hano, bakora ubushakashatsi bagendeye ku bibazo igihugu gifite, buriya hari igihe abantu bajya kwiga hanze, umwarimu akakujyana mu byo afitemo inyungu binajyanye n’uko icyo gihugu giteye. Ariko abakorera PhD hano bareba ibibazo biri mu gihugu, ku buryo n’ibivuye mu bushakashatsi byagirira inyungu igihugu.”

Umuhango wo gutanga impamyabumenyi wabaye hifashishijwe ikoranabuhanga aho abanyeshuri bahagarariye abandi, abayobozi bakuru ba UR ndetse na Minisitiri w’Uburezi bari bateraniye muri Camp Kigali, mu gihe abandi bakurikiye uyu muhango kuri televiziyo y’igihugu.

Ni nyuma kandi yo kumara hafi imyaka ibiri bategereje ibi birori kuko icyorezo cya Covid-19, cyatumye abanyeshuri batarangiriza igihe cyari cyarateganyijwe n’ingengabihe ya UR ndetse uretse kuba baragiye bamara igihe amashuri afunze, hanabayeho kwiga hifashishijwe ikoranabuhanga.

Ni ku nshuro ya Karindwi Kaminuza y’u Rwanda ishyize ku isoko ry’umurimo abanyeshuri bashya nyuma y’uko ihujwe n’andi mashuri makuru na kaminuza bya leta arindwi.

Ibirango birimo ibendera ry'u Rwanda n'irya UR bitambagizwa mbere y'umuhango wo gutanga impamyabumenyi
Minisitiri Uwamariya ubwo yari akurikiranye umuhango wo gutanga impamyabumemyi muri UR
Prof Lyambabaje akurikiranye umuhango wo gutanga impamyabumenyi muri UR, umuhango wabaye mu buryo budasanzwe kubera icyorezo cya Covid-19
Abanyacyubahiro batandukanye bitabiriye uyu muhango wo gusoza amasomo ku banyeshuri basaga ibihumbi umunani
Abanyeshuri basoje amasomo barahira mbere yo guhabwa impamyabumenyi
Abitwaye neza kurusha abandi mu masomo bashimiwe
Prof Lyambabaje Alexandre, yasabye abasoje amasomo kuzaharanira gukomeza kuba ab’ingirakamaro ku miryango yabo
Minisitiri Uwamariya yasabye abasoje amasomo kwifashisha ubumenyi bahawe bateza imbere igihugu
Abitabiriye bose basabye abasoje amasomo gufasha u Rwanda gutera imbere

Amafoto: Mucyo Regis


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .