Kwamamaza

UR ku isonga muri kaminuza zose mu Rwanda,Jomo Kenyatta iherekeza izindi

Yanditswe kuya 5-10-2016 saa 10:24' na Rabbi Malo Umucunguzi


Kaminuza y’u Rwanda (UR) yahize izindi kaminuza n’amashuri makuru akorera mu Rwanda mu 2015, hagendewe ku bushakashatsi bwakozwe n’Inama y’Igihugu y’Amashuri Makuru na Kaminuza mu Rwanda, HEC.

Uru rutonde rwasohotse muri Kanama uyu mwaka, rugaragaraho amashuri makuru na za kaminuza 29 mu manota yatanzwe ku 1000, rurangajwe imbere na Kaminuza y’u Rwanda ifite amanota 592.42; igakurikirwa na Kaminuza yigenga ya Kigali, ULK, ifite 583.21.

Ku mwanya wa gatatu haza Kaminuza y’Abadivantisitiri ya Afurika yo Hagati, AUCA, ifite 535.08, Kaminuza yigenga y’Abalayiki b’Abadivantisiti ba Kigali, INILAK iza ku mwanya wa kane n’amanota 509.24 naho INES Ruhengeri ikaza ku mwanya wa gatanu n’amanota 496.73.

Mu myanya itanu y’inyuma haza Ruli Higher Institute of Health Sainte Rose De Lima, iri ku mwanya wa 25 n’amanota 253.1, Nyagatare School of Nursing & Midwifery ya 26 n’amanota 238.67, Premier Ecde Teachers College ya 27 n’amanota 236.81, Kibogora Polytechnic ya 28 n’amanota 232.37 na Jomo Kenyatta University of Agriculture and Technology ya 29 n’amanota 171.

Uko Kaminuza n'Amashuri Makuru mu Rwanda bikurikiranye

Ibyangendeweho mu gutanga amanota

HEC ivuga ko muri iyi Isi y’iterambere igihugu gikeneye abaturage bafite ubumenyi buhagije, cyane ko ubukungu bw’ibihugu bisaba ubumenyi bufatika kugira ngo bubashe kugera ku yindi ntera.

Uru rutonde rwagendeye ku isuzumwa ryakozwe hagendewe ku bisubizo kaminuza zatanze ubwazo ku bibazo zohererejwe harebwa mu ngingo enye zinyuranye.

Iyi raporo ivuga ko “Impamvu y’uru rutonde ari ukugira ngo ibiteganywa mu burezi bw’amashuri makuru bigaragarire abafatanyabikorwa binafashe mu buryo bwo guhatana mu Mashuri Makuru.”

“HEC yahisemo gukora urutonde rw’amashuri makuru nk’igikorwa cy’ingenzi kuko kizafasha mu buryo amashuri makuru ahagaze ugereranyije n’andi, hashingiwe ku bipimo runaka. Ibiva muri iri piganwa bimenyesha abafatanyabikorwa ireme ry’uburezi amashuri makuru atanga hagendewe ku mwanya ahagazeho.”

1. Ibikorwa remezo

Iki cyiciro cyagenewe amanota 230, atangwa harebwa ibikorwa remezo byaba inyubako n’ibyifashishwa mu kwiga, umubare w’ibyumba by’amashuri, amashami n’umubare w’abanyeshuri bahabwa amacumbi n’ibindi.

Hari kandi ibijyanye n’isomero, umubare w’ibitabo, ibinyamakuru byo mu gihugu na mpuzamahanga, internet, mudasobwa, kuba abanyeshuri babasha kohereza imikoro yabo mu ikoranabuhanga n’ibindi.

2. Abarimu, n’ubushakashatsi

Amasomo atangirwa muri Kaminuza, ubushakashatsi n’ibindi byahawe amanota 350, aho HEC ivuga ko ireme ry’uburezi muri kaminuza rishingira ku bushobozi bw’abarimu bayigishamo.

Hanarebwa ku bunararibonye bafite, abafite impamyabumenyi z’ikirenga, PhD, ingufu bashyize mu kwandika ibitabo, gukora ubushakashatsi, inyandiko kaminuza isohora n’ibindi.

3. Integanyanyigisho n’imyigishirize

Abanyeshuri bakirwa n’integanyanyigisho zikoreshwa byagenewe amanota 150, hagasuzumwa uko abanyeshuri bakirwa, niba hari isuzumwa bakora mbere yo gutangira muri kaminuza, isuzuma n’ivugururwa ry’integanyanyigisho kuko byose ari ingenzi mu kujyanisha amasomo n’ibikenewe ku isoko.

Harebwa kandi niba hari porogaramu z’amasomo zihatangirwa n’ubundi bumenyi bwubaka abanyeshuri.

4. Imikoranire ya kaminuza n’ibindi bigo

Ni icyiciro cyagenewe amanota 270, aho hagiye harebwa umubare w’abanyeshuri bahabwa imirimo mu bigo byaba ibyo mu gihugu na mpuzamahanga.

Harebwe niba nka kaminuza ishobora gutumira ibigo bitandukanye bigakoresha ibizamini abanyeshuri baba bari gusoza amasomo, hakarebwa imishahara abanyeshuri barangije muri iyo kaminuza bahabwa n’imikoranire ya kaminuza n’andi mashuri.

Buri kimwe muri ibi byagenderwagaho cyagiye kigabanywamo ibibazo bitandukanye, byohererezwa amashuri makuru na za kaminuza zitanga ibisubizo, nyuma bisesengurwa n’impuguke mu burezi.

Kuva kuya 17 kugeza kuya 29

Mount Kenya University iyoboye Kaminuza z’Abanyamahanga

Muri iyi raporo Mount Kenya University (MKU) iza ku mwanya wa 11, ikaba iyoboye Kaminuza z’Abanyamahanga nka Sinhgad Technical Education Society iza ku mwanya wa 18, The Open University of Tanzania iri ku mwanya wa 22, Mahatma Gandhi University iri ku mwanya wa 24 na Jomo Kenyatta University (JKUAT) iri ku mwanya wa 29.

MKU ifite amanota 380 ku 1000, ikaba ifite amanota 88 mu bijyanye n’ibikorwa remezo, 87 mu bijyanye n’abarimu n’izindi porogaramu z’amasomo, 75 ku buryo bwo kwakira abanyeshuri naho mu gukorana n’ibindi bigo n’amashuri ikagira 129.

JKUAT iza inyuma y’izindi n’amanota 171, hakaba na Kaminuza zitatanze amakuru yuzuye zirimo iyitiriwe Mahatma Gandhi, Kaminuza ya Ruli, Ishuri ry’Abavuzi n’Ababyaza rya Nyagatare na Kibogora Polytechnic, ari nayo mpamvu hari aho zifite zeru.

Kaminuza y'u Rwanda niyo iyoboye uru rutonde
Kaminuza yigenga ya Kigali, ULK, ni iya kabiri n'amanota 583.21 ku 1000

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved