Kwamamaza

UR mu ihurizo ryo kwishyuza abayizemo bayifitiye umwenda wa miliyari 1,6 Frw

Yanditswe kuya 3-10-2016 saa 20:55' na Philbert Hagengimana


Mu bihangayikishije Kaminuza y’u Rwanda harimo no kwishyuza abarangije muri Koleji zitandukanye ziyigize, bahawe impamyabumenyi bakayigendana umwenda wa miliyari 1,6 bose hamwe.

Ubwo hahuzwaga Amashuri makuru na Kaminuza ngo habeho Kaminuza y’u Rwanda igizwe na Koleji icyenda, hanahujwe umutungo ndetse n’amadeni, yaba ayo kwishyura ndetse n’ayo kwishyurwa.

Aho ni ho haturutse umwenda wa miliyari 1,6 wagaragajwe muri Raporo y’umugenzuzi mukuru w’imari ya Leta mu 2014/2015, watumye Kaminuza y’u Rwanda itumizwa ngo isobanurire Komisiyo y’Inteko Ishinga Amategeko, Umutwe w’Abadepite, ishinzwe gukurikirana imicungire y’imari n’umutungo wa leta (PAC).

Ubwo yitabaga kuri uyu wa mbere tariki ya 3 Ukwakira, PAC yabajije ubuyobozi bwa Kaminuza y’u Rwanda igiteganywa nyuma y’aho ibigo byahujwe bigifite amadeni angana na miliyari 1.6, akomoka ku banyeshuri batishyuye kandi bararangije bakanahabwa impamyabumenyi zabo.

Kuri ibi, Depite Kankera Marie Josée yahise agira ati “Tujya twumva abana bavuga ko bangiwe gukora ibizamini kuko batishyuye, abo bandi bo bagiye babona ibizamini bate?”

Pudence Rubingisa, Umuyobozi ushinzwe imari muri Kaminuza y’u Rwanda yabwiye Abadepite ko ikibazo cy’amadeni mu bigo 9 (Koleji) byahujwe, ari cyo kiri kuri gahunda ya Kaminuza ndetse kikaba kigeragezwa umunsi ku wundi ngo gikemuke.

Rubingisa yagize ati “Ni amadeni amaze igihe, guhera mu 2006, hamwe usanga umuntu yararangije ndetse twaranamuhaye impamyabumenyi ye kandi tukimufite mu bitabo nk’udufitiye ideni, hari hamwe byagaragaye.”

Icyakora ngo icyo kibazo kirimo gukemuka kuva ubwo hashyiriweho gahunda yo kwishyuza, yiswe “Recovery policy”, hakiyongeraho no kukijyanisha n’imihigo ya buri mukozi wa Kaminuza nk’abafite icungamari mu nshingano, aho baba bagomba no gushyiramo ingamba z’uburyo ayo mafaranga agomba kugaruzwa.

Rubingisa yakomeje avuga ko hanabayeho kwandikira abafitiye umwenda Kaminuza bawumenyeshwa ngo bishyure, bamwe bakawemera ariko hakaba n’abawuhakanye, bityo ngo harimo kurebwa uburyo icyo kibazo cyakemurwa hakurikijwe iyo ‘Recovery Policy’.

Icyakora ngo hari n’aho bagerageza uburyo bwose bushoboka ngo ayo mafaranga yishyurwe bikananirana, ayo akaba agomba gukurwa mu bitabo nk’uko biteganywa n’iyo ‘Recovery policy’.

Kaminuza ifite ikoranabuhanga ryayifasha ariko ntirikoreshwa

Depite Kankera Marie Josée, Umwe mu bagize PAC yavuze ko Kaminuza y’u Rwanda ifite ikoranabuhanga “Software”, ryaguzwe akayabo ka miliyari 1.67, zongeweho miliyoni 144 zo kuryongerera ubushobozi (Upgrade), hakiyongera kuba ryarishyurwaga buri mwaka amafaranga miliyoni 138 yo kuyitaho (Mantainance).

Nyamara ngo Kaminuza ifite ikibazo cya Database (nk’ububiko tugenekereje mu Kinyarwanda), ari na ho haturuka ibibazo mu icungamari, mu gucunga abakozi ndetse no mu itangwa ry’amasoko.

Inyubako Ubuyobozi bukuru bwa Kaminuza y'u Rwanda bukoreramo

Mu gutanga ibisobanuro, Rubingisa yavuze ko iyo ‘Software’ bamaze kuyongerera ubushobozi, kuko iyo bakoresha ari iy’iyahoze ari Kaminuza Nkuru y’u Rwanda (NUR), yari ifite ubushobozi bwo kwakira abanyeshuri 10.000, none ubu ikaba ifite ubwo kwakira 33,000.

Yakomeje avuga ko harimo ibice bimwe bikora neza, nko kuba abanyeshuri biyandikisha kuri Internet (Online), ati “ndetse icyiza ubu twabihuje na REB na BRD, umunyeshuri ajyamo akiyandikisha akuzuza n’amasezerano y’inguzanyo.”

Rubingisa yakomeje agira ati “Aho twabonye ibyo tudakeneye twabwiye uwayihaye NUR ko tutazabyishyurira, kuko ni inzira ndende. Twaravuze ngo reka tubanze igice ‘Component’ cy’abanyeshuri, dukurikizeho icy’abakozi, ariko izo tudakeneye, twarazihagaritse ntabwo tuzishyurira.”

Depite Kankera yahise agira ati “Kuki mutazikoresha kandi muzikeneye? Mwatumije ibyo mudakeneye?”

Rubingisa yasubije ko bazihagaritse umwaka ushize, ati “Impamvu tutazikoresha nko mu icungamari turacyakoresha ‘sage pastel’, tukabona ko twapanga kwimukira muri iyo yindi mu gihe tuzaba twiteguye guhita tuyikoresha.”

Ikoranabuhanga ryabafasha gucunga abakozi ndetse no mu masoko ya Leta ho ngo barihagaritse kuko bari bafite irindi bakoresha ryitwa ‘IBPS’, ari na cyo cyatumye babanza guhugura abakozi mbere yo kwihutira gukoresha iryo rindi babaye bahagaritse.

Depite Kankera yakomeje agaragariza Kaminuza y’u Rwanda ko kuba iryo koranabuhanga ridakoreshwa byaba ari yo ntandaro y’ibibaza mu guhuza ibikorwa by’Ubwanditsi bwa Kaminuza n’ishami ry’imari, ibyo bigatuma yibaza impamvu bahagaritse ikoranabuhanga bari bakeneye aho kurijyanisha n’ibigezweho ngo barikoreshe.

Kuri icyo kandi, Depite Nkusi Juvenal yahise abaza niba uwaguze iryo koranabuhanga mu 2010 yaragendeye ku busesenguzi butari bwo, ku buryo bagiye kugura ibyo batabanje kureba niba bizakenerwa.

Rubingisa yakomeje asobanura ko hari raporo y’Umugenzuzi mukuru w’imari ya Leta yagaragaje ko hari ikoranabuhanga ryishyurwa akayabo kandi ridakoreshwa, aho hakaba ari ho ubuyobozi bwahereye bufata icyemezo cy’uko ikoranabuhanga ridakenewe rigahagarikwa, ariko irikenewe rigakoreshwa mu buryo bwuzuye.

Ikinyuranyo mu mafaranga Kaminuza yakabaye yinjiza n’ayanditse mu bitabo

Ikindi kibazo gihuriweho na Koleji zose za Kaminuza y’u Rwanda nk’uko PAC yabitangaje, ni icyo guhuza inyandiko z’amafaranga batanga biyandikisha n’izindi ngwate (Cautions) zitandukanye, amafaranga yakagombye kwinjira ugendeye ku mibare ntaho ahuriye n’ayandikwa mu bitabo by’ibaruramari.

Rubingisa yasobanuye ko harimo kurebwa uburyo bakorana na Banki ngo icyo gikemuke burundu, kuko zijya zibabwira ko bihenze gusohora izo mpapuro (Printing) zose abanyeshuri baba bishyuriyeho ngo bazizanire Kaminuza, izibike nk’inyemezabwishyu.

Pudence Rubingisa, Umuyobozi wa Kaminuza y'u Rwanda wungirije ushinzwe imari n'ubutegetsi

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved