Unity Club irizihiza imyaka 20 izirikana Ubunyarwanda nk’inkingi y’iterambere

Yanditswe na Kanamugire Emmanuel
Kuya 29 Ukwakira 2016 saa 07:49
Yasuwe : XX
0

Umuryango Unity Club ‘Intwararumuri’ wifatanyije n’abaturage bo mu mudugudu wa Taba, akagari ka Bukomeye, Umurenge wa Mukura mu Karere ka Huye, mu gikorwa cy’umuganda rusange wo gutera ibiti by’imbuto mu mudugudu w’icyitegererezo watujwemo abacitse ku icumu n’incike za Jenoside yakorewe Abatutsi mu 1994.

Uyu muganda wakozwe kuri uyu wa Gatandatu tariki 29 Ukwakira, mu rwego rw’ibikorwa byateganyije na Unity Club bijyanye no kwizihiza Yubile y’imyaka 20 bamaze baharanira iterambere rirambye rishingiye ku bumwe bw’Abanyarwanda.

Mu mudugudu wabereyemo umuganda ni hamwe umuryango Unity Club ugizwe n’abahoze muri Guverinoma, abayirimo n’abo bashakanye ufite ibikorwa.

Wahatuje ababyeyi 16 bagizwe incike na Jenoside bitwa Impinganzima, kuri ubu ukaba urimo kuhubaka izindi nzu zizatuzwamo abandi babyeyi 100.

Hatewe ibiti bya avoka 150, hacukurwa imiyoboro y’amazi ndetse abakecuru b’incike bahabwa n’umubyizi mu murima wabo.

Umwe mu bagize Unity Club, Dr. Monique Nsanzabaganwa, yabwiye itangazamakuru ko iki gikorwa cy’umuganda kiri mu rwego rwo gukomeza guharanira iterambere rirambye ry’abatuye uwo mudugudu.

Yagize ati “Iki gikorwa cyabaye mu rwego rwo guharanira ko ubumwe nk’inkingi y’iterambere rirambye riva mu magambo rikajya mu bikorwa.”

Umuryango Unity Club uharanira gushyigikira ubumwe bw’Abanyarwanda ariko bihereye mu bayobozi ubwabo. Hibandwa ku kurebera hamwe icyo ubumwe buvuze mu gihugu ariko hanatekerezwa ku ngaruka kubura ubumwe byateye.

Dr. Nsanzabaganwa yavuze ko mu myaka 20 uwo muryango wishimira ko wabaye intwararumuri nk’abayobozi bayobora igihugu n’abo bashakanye, bakaba umwe hagati yabo kugira ngo bajye kwigisha banatange ubuhamya bw’ibintu bifitemo kandi babaho.

Yagize ati “Iyi yari intego ya mbere kandi twishimira ko twayigezeho kuko yahuje abayobozi bari baturutse imihanda yose, bafite ibikomere bitandukanye ariko bafite inshingano yo kubaka igihugu.”

Ibi byiyongeraho ihuriro ngarukamwaka rihuza abayobozi batandukanye bakaganira ku bibazo biri mu muryango nyarwanda, ibikibangamiye ubumwe, igihango, hagamijwe kuguma kwikebuka nk’abayobozi ngo bamenye aho berekeza igihugu.

Ihuriro ry’uyu mwaka rizaba kuwa 3-4 Ugushyingo 2016, rifite insanganyamatsiko igira iti “Ubunyarwanda, ikirezi twambaye.”

Dr.Nsanzabaganwa yashimangiye ko ari umwanya wo kugaragaza ko ubunyarwanda ari wo mutima wa Unity Club no kwerekana ko bazi neza ko igihugu ari ikirezi bazi ko cyera.

Yagize ati “Tuzi ko ari ikirezi cyera, tuzi icyo byatumariye n’uko birimo kubaka uru Rwanda. Raporo nyinshi zigaragaza intambwe ishimishije igihugu kimaze gutera, byose bishingiye ku bumwe kandi tubutakaje twaba dutaye ikirezi.”

Unity Club ifite ibikorwa bigamije kuba umusemburo w’ibisubizo cyane cyane ibishingiye ku bibazo byatewe n’ingaruka zo kubura ubumwe. Hari umudugudu wa Impinganzima uri i Huye, umudugudu uri Nyamagabe, uri i Rubavu watujwemo abana b’imfubyi muri gahunda ya Tubarerere mu muryango.

Abagize Unity Club ubwo bari mu ihuriro rya karindwi
Monique Nsanzabaganwa, Visi Perezida wa Unity Club

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza