UNICEF igiye gufatanya na Sorwathe guteza imbere imibereho y’abana mu Majyaruguru

Yanditswe na Kanamugire Emmanuel
Kuya 26 Ugushyingo 2016 saa 07:41
Yasuwe :
0 0

Ishami ry’Umuryango w’Abibumbye ryita ku bana, Unicef, rigiye gufatanya n’uruganda rw’icyayi rwa Sorwathe mu gutanga uburezi ku bana bato hagamijwe imbonezamikurire yabo no guteza imbere uburezi bwabo mu turere twa Rulindo na Gicumbi.

Ni nyuma y’amasezerano y’ubufatanye yashyizweho umukono hagati y’izi nzego zombi kuri uyu wa Gatanu tariki 25 Ugushyingo 2016.

Umuyobozi ushinzwe ubufatanye n’ibindi bigo muri Unicef Rwanda, Albertine Uwimana, yavuze ko ayo masezerano azareba abana n’imiryango yabo haherewe ku bakiri mu nda kugeza ku bafite imyaka itandatu, ku ikubitiro bakazarebwa abagore bakorera Sorwathe n’abana babo, hadasigaye abaturiye ibikorwa by’urwo ruganda.

Ati “Muzi ko nko mu cyayi hakoramo ababyeyi benshi. Abo babyeyi usanga bafite abana, batwite cyangwa bonsa. Aho rero turashaka yuko ibyo bigo bikoresha ababyeyi bibaha uburyo bwiza bwo kurera abana, umubyeyi asige umwana kubera ko agomba gushaka amafaranga, ariko ntamusige adafite umurera.’’

Sorwathe imaranye igihe gahunda yo guteza imbere uburezi cyane bw’abana b’incuke, ikaba imaze kubaka amashuri ane mu karere ka Gicumbi na Rulindo, afasha abana bagera kuri 400 kugeza uyu munsi.

Uwimana yakomeje agira ati “Unicef izaba ishinzwe kubaka ubushobozi bw’ababyeyi, bw’abakozi ba Sorwathe, bw’abahagarariye abategarugori, kugira ngo bamenye uburyo bwo kurera abana neza. Hanyuma Sorwathe izaba ishinzwe gushyiraho serivisi zifasha abana n’ababyeyi mu iterambere, cyane cyane izo serivisi zo kubigisha, iz’imbonezamikurire y’abana bato, ndetse ikaduha abandi tuzahugura kugira ngo bamenye uko bafata abana batoya”.

Yavuze ko Sorwathe ikwiye kubera urugero ibindi bigo by’abikorera kugira ngo bateze imbere uburenganzira bw’umwana binyuze muri gahunda y’imbonezamikurire y’abana bato, ndetse gahunda zabo zikagera no ku bana bari munsi y’imyaka itatu.

Umuyobozi wa Sorwathe, Rohith Peiris, yavuze ko uru ruganda rw’icyayi rwashinzwe mu 1972, rukora akazi karenga ubucuruzi kakagera no mu kwita ku mibereho y’abakozi uruganda rukoresha kimwe n’abaturiye ibikorwa byarwo.

Ati “Twizera ko abana ari imbaraga z’ahazaza ku rwego rw’abikorera; kandi kubafasha gukura neza ni ukurera abakiliya bo mu gihe kiri imbere n’abaturage bafite ubushobozi.’’

Rohith yavuze ko Sorwathe yubatse amashuri ane rimwe rifite agaciro ka miliyoni 10 Frw, ikagira intego yo kubaka ishuri rimwe buri mwaka, hakiyongeraho gutanga igikombe cy’igikoma kuri buri mwana ku munsi.

Umuyobozi wa UNICEF mu Rwanda, Ted Maly, yavuze ko u Rwanda rwateye intambwe mu kwita ku mibereho n’uburezi by’umwana, ndetse ngo Isi yihaye intego ko abana bose bazaba bagira uburenganzira ku marerero n’uburezi bubanziriza amashuri y’inshuke bitarenze 2030, mu Rwanda hakubakwa ikigo mbonezamikurire nibura muri buri mudugudu.

Umuryango Imbuto Foundation usanganwe gahunda nk’izo, wahaye ikaze ubu bufatanye ndetse uvuga ko bashobora kwigira ku byiza bimaze gukorwa muri urwo rwego.

Umuyobozi wungirije w’uyu muryango, John Ntigengwa, yagize ati “Mu byo tumaze kubona, kubaka ubushobozi bw’ababyeyi ni ingenzi cyane. Turashishikariza ko ubwo buryo bwashyirwamo imbaraga kuko ari nabyo burambye cyane.’’

Umuyobozi wungirije wa Imbuto Foundation, John Ntigengwa(ibumoso),Umuyobozi wa Sorwathe, Rohith Peiris n'Umuyobozi wa UNICEF mu Rwanda, Ted Maly bashyira umukono ku masezerano

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244