UNHCR nta cyizere cy’uko impunzi z’Abarundi ziri mu Rwanda zazasubira iwabo vuba

Yanditswe na Philbert Girinema
Kuya 3 Ugushyingo 2016 saa 08:10
Yasuwe : XX
0

Nyuma y’amezi 18 Abarundi batangiye guhungira mu Rwanda, Ishami ry’Umuryango w’Abibumbye ryita ku mpunzi (UNHCR) ryatangiye kuvana izi mpunzi mu mahema zikayaha inzu zubatse mu nkambi ya Mahama iruta izindi mu Rwanda.

Imibare igaragaza ko kugeza kuwa 9 Nzeli iyi nkambi yari icumbikiye Abarundi 50233, UNHCR ikavuga ko nazo batiteguye ko zishobora gusubira iwabo mu mezi 12 ari imbere.

Kuva Perezida Pierre Nkurunziza yakwiyamamariza manda ya gatatu bigateza imvururu no gushaka kumuhirika ku butegetsi, byatumye abasaga 311,956 bava mu byabo ndetse 81565 bahungira mu Rwanda.

Gusa nyuma y’igihe gisaga umwaka n’igice, impunzi z’Abarundi ziracyahungira mu Rwanda buri munsi nubwo biri ku gipimo gito.

Umuyobozi Ushinzwe amakuru muri UNHCR mu Rwanda, Erika Fitzpatrick, yabwiye IBTimes UK ko hari gushakwa uburyo bwo kwita kuri izi mpunzi mu buryo burambye.

Ati "Ikibabaje ni uko impunzi zihunga kubera amakimbirane ntabwo twazifata nk’iz’igihe gito ku buryo tutavuga ngo zizamara igihe runaka mu Rwanda, ariko kizaba kiri hejuru y’amezi atandatu abarirwa amahema y’ingoboka. Ubu rero turi kureba uburyo burambye kandi bwiza kurushaho bwo kwita ku mibereho y’abo bantu.’’

"Iyo ugiye kuba mu ihema, ni ibintu wakora muri mpera z’icyumweru kimwe, kandi kuribamo ntabwo ari cyo kintu cyiza kuri iyi Isi, tekereza kuba nta yandi mahitamo ufite ukagera aho ubana mu ihema n’umuryango wawe, amezi atandatu akarangira n’umwaka ugashira. Abantu bakeneye uburyo bwiza kandi bubaha umutekano,’’

Fitzpatrick yavuze ko UHNCR iri kubaka umushinga w’ibikorwa uzafasha izi mpunzi n’abaturage b’aho hafi ungana na miliyoni $206, harimo kubaka amashuri n’amavuriro azafasha impunzi n’abaturage b’ako gace.
UNHCR kandi ngo iri kubaka uruganda rw’amazi ruzafasha agace muri rusange, cyane ko Intara y’Iburasirazuba iherereyemo inkambi ya Mahama ihura n’ikibazo cy’izuba ryinshi n’amazi adahagije.

U Rwanda ruheruka gutangaza ko nyuma y’ibirego by’u Burundi ko u Rwanda rwaba rwinjiza mu gisirikare bamwe mu mpunzi no rukanabaha imyitozo ngo bazasubire guhungabanya umutekano w’u Burundi, rugiye gushaka ikindi gihugu kizabakira.

Gusa UNHCR iteganya ko umunsi izi mpunzi zizumva zitekanye aribwo zizasubira mu gihugu cyazo, ku buryo kuba batahuka uyu munsi ataricyo gihangayikishije.

Inkambi ya Mahama
Umwe mu bana ateruye umuvandimwe we mu nkambi ya Mahama

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza