Undi muyobozi muri FDLR yafatiwe mu Burasirazuba bwa RDC

Yanditswe na Philbert Girinema
Kuya 25 Ukwakira 2016 saa 08:37
Yasuwe :
0 0

Col.Habyarimana Mucebo Sofuni, ushinzwe ubutasi mu mutwe w’abarwanyi ba FDLR, yatawe muri yombi mu Burasirazuba bwa Repubulika Iharanira Demokarasi ya Congo (RDC).

Maj. Guillaume Ndjike, umwe mu bavugizi b’Ingabo za Leta ya Congo (FARDC) yemeje ko Col.Habyarimana wari ushinzwe ibikorwa by’ubutasi mu bayobozi bukuru bwa FDLR, ko yafashwe ku cyumweru tariki ya 23 Ukwakira i Kiwanja mu Karere ka Rutshuru ni mu birometero nka 75 mu majyaruguru ya Goma.

L e Figaro dukesha iyi nkuru yanditse ko itabwa muri yombi rya Col. Habyarimana ryanemejwe n’Umuryango Uharanira guteza imbere amahoro, ukwishyira ukizana n’uburenganzira bwa muntu (Cepadho), ukorera muri Kivu y’Amajyaruguru.

Uwo muyobozi mu mutwe w’abarwanyi ba FDLR ni umwe mu bashakishwa n’ubutabera mpuzamahanga ndetse n’ubw’u Rwanda, kubera ibyaha bya Jenoside, dore ko uwo mutwe washinzwe n’abasize bahekuye u Rwanda mu 1994, bagera muri RDC bagakomeza gukora ibyaha byibasiye inyokomuntu, aho bakekwaho kugaba ibitero ku baturage bigahitana abatari bake.

Aha havugwa nk’icyahitanye abaturage b’abasivile mu duce twa Kamananga ahitwa Bunyakiri muri Kivu y’Amajyepfo tariki ya 14 Gicurasi 2013, aho abantu 32 bishwe nk’uko byemejwe na Maj. Guillaume NDjike nyuma y’ifatwa rya Maj.Sabimana muri Kanama uyu mwaka.

Col.Habyarimana afashwe akurikira Maj.Sabimana Iraguha Patrick alias Mugisha Vainqueur, wari umuyobozi w’abarinda Sylvestre Mudacumura, uyu akaba umuyobozi mukuru w’umutwe wa FDLR.

Ifatwa rya Col.Habyarimana ribaye kandi nyuma y’aho Perezida Joseph Kabila wa RDC, abonanye na Perezida Paul Kagame i Rubavu ku wa Gatanu tariki 12 Kanama, aho yavuze ko ibikorwa byo kurwanya FDLR bizakomeza igihe cyose izaba ikiri ku butaka bwa Congo.

Ubwo yari abibajijweho n’Umunyamakuru, Perezida Kabila yasubije ati “FDLR, ni ikibazo kimaze igihe kirekire. Ubu tuvugana, hari ibikorwa bikomeje byo kuyirwanya bimaze imyaka itatu. Nta gihe twashyizeho ibyo bikorwa bizamara, kubera ko dutekereza ko iherezo yabyo rizaterwa n’igihe ikibazo kizarangirira. Ibyo bishatse kuvuga ko, igihe FDLR izaba igihari, ibikorwa byo kuyirwanya bizakomeza.”


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza