Umwuzukuru wa Rugamba Sipiriyani yahishuye byinshi kuri Sekuru

Yanditswe na Uwiduhaye Theos
Kuya 8 Kanama 2019 saa 03:05
Yasuwe :
0 0

Umwuzukuru wa Rugamba Sipiriyani witwa Tania Rugamba wiga muri Amerika muri Kaminuza ya Nebraska-Lincoln yavuze byinshi azi kuri sekuru.

Uyu mukobwa uvuka ku mfura ya Rugamba yitwa Rugamba Olivier mu kiganiro na IGIHE yahishuye uburyo yakunze muzika abikesha sekuru ndetse n’uburyo indirimbo ye yise Ntumpeho yamuhinduye mu bitekerezo.

Uyu mukobwa w’imyaka 22, ni umuhanzi ushaka kubikora by’umwuga. Amaze gukora indirimbo ebyiri, imwe niyo yashyize hanze yitwa Freedom, indi ni iyo amaze guhimba ivuga kuri Sekuru.

Umva indirimbo y’uyu mwuzukuru wa Rugamba

Ivuga kuri sekuru yitwa ‘Umurage w’urukundo’ yahuriyemo na Ngarambe François Xavier, yagize igitekerezo agihaye Ngarambe ntiyatinzamo arabyemera barayikora ikaba izajya hanze vuba.

Kimwe mu bimushengura harimo kuba ataragize amahirwe yo guhura na sekuru kuko yavutse hashize imyaka itatu yitabye Imana.

Ati “Ntabwo nigeze ngira amahirwe yo guhura na Rugamba Sipiriyani ndetse n’umuryango kuko njye navutse mu 1997 yaritabye Imana mu 1994. Papa niwe mukuru mu bana ba sogokuru we yitwa Rugamba Olivier. We n’abandi batatu nibo babashije kurokoka Jenoside yakorewe Abatutsi.”

Arakomeza ati “Iyo tuganiriye ambwira ko kugira ngo bamenye ko iwabo bitabye Imana yabibwiwe na murumuna wabo wari wasigaye Kimihurura aho babaga. Icyo gihe bicwa we yabashije kurokoka. Niwe wababwiye iyo nkuru bo bari bakiri i Butare we na murumuna we witwa Dorcy Rugamba, barababara cyane ni nayo mpamvu bahise bahungira mu bindi bihugu.”

Mu byo Tania akura kuri se no ku bandi bavuga sekuru harimo kuba yari umuntu uhambaye cyane, yajyaga guhanga akajya ahitaruye ngo hatagira umuvangira.

Ati “Papa ambwira ko sogokuru yari umuntu uhambaye ndetse si nawe gusa n’abandi bagenda babimbwira barimo Abapadiri, Ababikira […] yabereye ababyeyi abana benshi, yari umuhanga mu bintu byinshi. Ngo iyo yajyaga guhanga yabaga ari ahantu ha wenyine. Iyo yabaga ari mu nganzo warabimenyaga. We n’ikintu cyitwa inganzo ntabwo wari kubyivangamo.”

Kuva muri Nzeri 2015 hatangiye urugendo rwo kugira Rugamba Sipiriyani n’umugore we Daforoza abahire hasuzumwa imirimo ya gitwari n’impumuro y’ubutagatifu byagaragaye mu buzima bwabo.

Umwuzukuru wabo avuga ko kuri we ari ikintu gikomeye kuko ubutwari bwa sekuru busobanuye byinshi mu mibereho ye.

Ati “Kuba ari gusabirwa kujya mu batagatifu kuri njye ni ikintu gikomeye cyane. Ntabwo ari ikintu umuntu abona buri gihe binaza ari inshingano ku bintu ugomba kuzakora kugira ngo uzatere ikirenge mu cye.”

Mu bihangano bya Rugamba Sipiriyani icya mbere uyu mwuzukuru we akunda ni ‘Ntumpeho’, indirimbo irimo amagambo akomeye asaba abantu kwirinda imico mibi, bayibona ku bandi bakayigendera kure.

Incamake kuri Rugamba Sipiriyani

Rugamba Sipiriyani yari Umusizi, umwanditsi w’ibitabo. Ni umwe mu bahanzi b’Abanyarwanda bahitanywe na Jenoside yakorewe Abatutsi mu 1994, ibihangano bye bikaba ari umurage ukomeye yasigiye Abanyarwanda.

Rugamba yavukiye mu yahoze ari Komine Karama, ubu ni mu Karere ka Nyamagabe mu 1935. Yize amashuri ye mu Rwanda, mu Burundi ndetse no mu Bubiligi, aho yakuye impamyabumenyi y’ikirenga mu by’amateka.

Yize amashuri abanza muri Paruwasi ya Cyanika, ayisumbuye ayiga mu Iseminari nto ya Kabgayi, akomereza muri Nkuru ya Nyakibanda. Yaje kujya muri Kaminuza ya Bujumbura aharangiriza icyiciro cya mbere cy’amashuri makuru, nyuma abona kujya mu Bubiligi muri Kaminuza ya Louvain aho yaje gukura impamyabumenyi y’ikirenga mu by’amateka.

Rugamba yaje gukunda umukobwa witwa Mukangiro Saverina, akaba yaramuhimbiye imitoma myinshi amurata imico n’uburanga. Uretse ko uyu mukobwa yaje kwicwa aroshywe mu mazi mu 1963, ibi bikaba byaramubabaje cyane, ariko yaje kwishumbusha undi witwaga Mukansanga Daforoza wari ubereye nyina wabo wa wundi wa mbere.

Ni kuri izo nshuti ze ebyiri Rugamba yatangiriyeho guhimba ibisigo. Nyuma Rugamba yashakanye na Mukansanga Daphrose.

Uyu muhanzi kandi yanashinze itorero Amasimbi n’Amakombe riririmba indirimbo zisingiza Nyagasani ndetse zinigisha ku buzima busanzwe.

Yakoze imirimo itandukanye muri Leta, ariko mu myaka ye ya nyuma yaje gukurwa mu kazi igihe kitageze, kubera ko atihanganiraga akarengane ako ariko kose, akabyamagana abicishije mu nganzo ye.

Rugamba yapfuye azize Jenoside yakorewe Abatutsi muri Mata 1994, akaba we na Mukansanga, umugore we, bari barabyaranye abana 10, muri Jenoside bapfanye n’abana babo batandatu, ubu hasigaye abana bane.

Ikiganiro IGIHE yagiranye na Tania Rugamba

Video: Muhumuza Simeon


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza