Umwe mu mishinga yari yaradindijwe n’ibifi binini ugeze ku iherezo

Yanditswe na Philbert Girinema
Kuya 31 Kanama 2016 saa 07:05
Yasuwe :
0 0

Ikaragiro rya Mukamira riherereye mu Karere ka Nyabihu ryari rimaze imyaka isaga itanu ryubakwa kuri ubu ryaruzuye, akaba ari umwe mu mishinga byavugwaga ko wadindiye kubera abayobozi bagaragayeho uruhare ruswa cyangwa ababikoze nkana.

Mu mwiherero wa 12 w’abayobozi bakuru bafashe umwanzuro wa mbere ko hagiye gukorwa urutonde rw’imishinga ya Leta yose yadindiye, kugira ngo ikorweho iperereza ababigizemo uruhare babihanirwe.

Kudindira kw’iyi mishinga ngo ntibyatewe n’ikibazo cy’amikoro kuko amafaranga yo kuwurangiza nk’uko byasobanuwe na Alphonsine Mirembe, wari Umuyobozi w’Ibiro bya Minisitiri w’Intebe, mu kiganiro n’abanyamakuru nyuma y’umunsi umwe uyu mwiherero urangiye.

Kudindira kw’imirimo yo kubaka ikaragiro rya Mukamira, byagize ingaruka zitandukanye ku borozi bo mu Murenge wa Mukamira.

Muyango Jean Damascene ni umwe mu borozi waganiriye na IGIHE wagize ati “Kuba iri karagiro ridakora byatugizeho ingaruka zitandukanye kubera ko tutabona aho tugurisha umukamo wacu.”

Mukamasabo Rose nawe ni umworozi avuga ko “iri karagiro rimaze imyaka irenga itanu ryubakwa iyo riza kuba ryaruzuye twari kuba tubona aho tugurisha umukamo bigatuma akajagari ko kugurisha amata magendu gacika.”

Umuyobozi Mukuru wungirije Ushinzwe Ubworozi mu Kigo cy’igihugu cy’ubuhinzi n’ubworozi (RAB), Dr Kanyandekwe Christine, mu kiganiro n’abanyamakuru cyabaye tariki ya 24 Kanama 2016, yavuze ko iki kibazo kigiye gucyemuka.

Yagize ati “Mukamira Dairy yarubatswe, ibikoresho byose bicyenewe bimaze kugeramo, ubu ikiriho gikorwa na Minisiteri ndetse n’abandi bafatanyabikorwa n’ibijyanye n’uburyo rizacungwa.”

Dr Kanyandekwe yakomeje avuga mu gihe kitarambiranye iri karagiro rya Mukamira rizatangira kubyazwa umusaruro rikongera umusaruro w’amata.

Mu mwaka wa 2015, u Rwanda rwohereje mu mahanga toni ibihumbi 50 z’amata na toni ibihumbi bibiri bya fromage, byinjiza miliyoni imwe n’ibihumbi 200 by’amadolari.Uyu musaruro ariko ngo uracyari hasi ugereranyije n’uko byifuzwa n’abafite ubworozi mu nshingano.

Indi nkuru wasoma: Ibifi binini byadindije nkana imishinga ya Leta byakuweho amaboko

Umuyobozi Mukuru Wungirije Ushinzwe Ubworozi mu kigo cy'igihugu cy'Ubuhinzi n'Ubworozi 'RAB', Dr Kanyandekwe Christine

[email protected]


Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza