Umwe mu bavoka bashinjwa kwaka ruswa bayitirira abacamanza yafunzwe by’agateganyo iminsi 30

Yanditswe na Evariste Nsengimana
Kuya 17 Nyakanga 2017 saa 03:19
Yasuwe :
0 0

Urukiko Rwisumbuye rwa Nyarugenge rwategetse gufunga by’agateganyo iminsi 30 Umunyamategeko Nyiramikenke Claudine ushinjwa kwaka ruswa abo ababuranira ababwira ko azayiha abacamanza.

Ubushinjacyaha bw’Urwego rw’Umuvunyi ni bwo bwareze Me Nyiramikenke Claudine ureganwa n’undi munyamategeko Nkanika Alimas ariko we utaragezwa imbere y’ubutabera ngo aburane ku ifunga n’ifungurwa ry’agateganyo.

Urukiko rwavuzuze ko rwafashe icyemezo ko Me Nyiramikenke afungwa by’agateganyo rushingiye ku kuba hari ibimenyetso bikomeye bimushinja, hagendewe kuri raporo yakozwe ku iyumvirizwa rya telefone ye asaba iyo ruswa.

Urukiko rwavuze ko hagikenewe gukora iperereza kandi aramutse arekuwe hari impungenge ko yaribangamira, yotsa igitutu abatangabuhamya.

Ku wa 13 Nyakanga 2017 ubwo yari imbere y’umucamanza, Me Nyiramikenke w’imyaka 52 ari kuwme n’abavoka batatu yahakanye icyaha cya ruswa ashinjwa, akavuga ko ubushinjacyaha buri kumuharabika.

Ubushinjacyaha bwavuze ko Me Nyiramikenke yakoze ibyo byaha kuva mu matariki atandukanye y’ukwezi ku Ugushyingo 2016 kugeza ku itariki 3 Gashyantare 2017, aho yagiye yaka abakiriya be amafaranga ababwira ko ari ayo gufasha gutanga ruswa ku bacamanza ngo bazoroshye urubanza.

Bumushinja kwitwaza ko umugabo we ari umucamanza ndetse ko nawe aziranye n’abacamanza benshi ku buryo yababwiraga ko ibihano byabo bizoroha.

Ubushinjacyaha bwavuze ko kuwa 19 Ukuboza 2016 uyu munyamategeko yabwiye umukiriya we witwa Murenzi ko yamaze kubonana n’umucamanza ngo bazahure hanyuma baganire birambuye.

Tariki 9 Mutarama yabajijwe n’umugabo witwa Mbyayingabo aho dosiye ye igeze, avuga ko agiye kubiganiraho n’umugabo we, amusaba ko yazazana amafaranga ku wa Mbere, mbere y’uko urubanza rutangira.

Ubushinjacyaha bwakomeje kugaragaza ibyo bimenyetso ariko Nyiramikenke mu kwiregura yahakanye ibyaha byose aregwa. Yavuze ko ibyo yaganiraga n’abakiriya be ngo bamuhe amafaranga ari ay’igihembo yabaga abaka nka Avoka, agashimangira ko ntaho bihuriye na ruswa.

Yasabye Ubushinjacyaha kugaragaza ikimenyetso cyaba kigaragaza ko ari ruswa kuko ngo iyo iba ruswa hakabaye hagaragara uwayitanze n’uwayihawe bombi bagafatwa kimwe nk’uko amategeko abiteganya.

Yavuze ko amajwi bavuga ko bumvirije bakabaye bayazanye mu rukiko bakayagaragaza ndetse nawe bakayamwumvisha akumva koko ko ari we, ko wenda bataba baramuhimbiye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza