Kwamamaza

Umwarimu muri Kaminuza yatanze ikirego ku masezerano ya EPA u Rwanda rwasinye

Yanditswe kuya 17-11-2016 saa 07:15' na Cyprien Niyomwungeri


Umwarimu wigisha amategeko muri Kaminuza ya Iringa muri Tanzania yaregeye urukiko rw’Umuryango wa Afurika y’Iburasirazuba, arusaba ko rwahagarika ibihugu byo mu muryango wa Afurika y’Iburasirazuba, ntibisinye amasezerano y’ubufatanye mu bucuruzi n’Umuryango w’Ubumwe bw’u Burayi (EPA).

Amasezerano ya EPA afatwa nk’azoroshya ubucuruzi n’ubufatanye mu iterambere hagati ya EAC na EU, harimo no gukuraho imisoro ku bicuruzwa bikorerwa mu bihugu bigize iyo miryango yombi.

Nkuko Daily News ibitangaza, Castro Pius Shirima, arashaka ko urukiko rwa EAC rufite icyicaro i Arusha rutambamira isinywa ry’ariya masezerano ku bindi bihugu bitarayasinya, nubwo u Rwanda na Kenya byo byamaze kuyasinya muri Nzeri uyu mwaka.

Mu kirego cye kizatangira gusuzumwa mu cyumweru gitaha, Shirima asaba ko Uganda, Tanzania, u Burundi na Sudani y’Epfo bikwiye kwirinda gusinya ku masezerano ya EPA kuko arimo ingaruka nyinshi ku bukungu bw’akarere.

Agira ati “Gushyira umukono ku masezerano nk’ariya k’u Rwanda na Kenya binyuranyije n’amasezerano n’intego z’umuryango wa EAC”.

Yanasabye urukiko ko rutegeka Umunyamabanga Mukuru wa EAC, Liberat Mfumukeko, kuba ahagaritse ibiganiro ku bucuruzi n’umuryango w’ubumwe bw’u Burayi kugeza iki kirego gikemuwe.

Mu cyumweru gishize Inteko Ishinga Amategeko ya Tanzania yanze ko iki gihugu gishyira umukono kuri ariya masezerano ku mpamvu zirimo kuba ashobora gusubiza inyuma umugambi wacyo wo guteza imbere inganda.

Birasaba ko ibihugu byose bya EAC bisinya kuri ariya masezerano kugira ngo ashyirwe mu bikorwa nk’uko byemeranyije, cyane ko azaba ari isoko ry’akarere aho kuba igihugu ukwacyo. Ibi bisobanuye ko hagize igihugu kimwe cya EAC kitayasinya, atakubahirizwa.

Iki kirego cyije mu gihe habura ukwezi kumwe ngo ubuyobozi bw’umuryango buhurire i Arusha bufata icyemezo ku masezerano ya EPA.

U Rwanda rwasinye amasezerano ya EPA mu mezi abiri ashize

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved