Umwanditsi Ilibagiza yakomoje ku bya kiliziya Bikira Mariya yasabye ko zizubakwa i Kibeho

Yanditswe na IGIHE
Kuya 22 Ugushyingo 2017 saa 06:53
Yasuwe :
0 0

Ilibagiza Immaculée, umwanditsi ukomoka mu Rwanda ariko akaba atuye muri Leta Zunze Ubumwe za Amerika, yagarutse ku butumwa bureba Abanyarwanda Bikira Mariya yatangiye i Kibeho mu gihe cy’amabonekerwa ndetse asobanura ibya Kiliziya yasabye ko zizamwubakirwa kuri ubu butaka butagatifu.

Ku ya 13 Ugushyingo 2017, IGIHE yabagejejeho igice cya mbere cy’amabonekerwa y’i Kibeho mu nkuru igira iti “Umwanditsi Ilibagiza wigeze kubonana na Papa, yavuye imuzi Amabonekerwa ya Kibeho”.

Mu Ukwakira uyu mwaka, Mukamazimpaka Nathalie, umwe mu bakobwa batatu babonekewe na Bikira Mariya i Kibeho, yamaganye uko Abanyamerika bagiye kubaka Kiliziya yasabwe n’Umubyeyi avuga ko bunyuranyije n’ubutumwa bahawe.

Ubutumwa Bikira Mariya yahaye abo yabonekeye bushimangira ko Kiliziya izamwubakirwa izagirwamo uruhare n’abakunda Kirisitu baturutse impande zose gusa Mukamazimpaka we yatangaje ko ibyo Abanyamerika bashaka gukora bitaye ku iterambere gusa ariko binyuranyije n’ibyo Bikira Mariya yasabye.

Mu gice cya kabiri, Ilibagiza yagarutse kuri Kiliziya, Bikira Mariya yasabye ko izubakwa kuri ubu butaka butagatifu bwa Kibeho.

Ikiganiro kirambuye

IGIHE: Ni ubuhe butumwa bwihariye bureba u Rwanda n’Abanyarwanda Bikira Mariya yatanze ubwo yabonekeraga abakobwa b’i Kibeho?

Ilibagiza: Mu birebana n’u Rwanda, Bikira Mariya yavuze ko igihugu cyacu cyagombaga kugira ibibazo bikomeye, nitutagarukira Imana. Ku ya 15 Kanama 1982, yaje arira, yerekana abantu bicana, batemana n’imihoro. Abereka ibyobo byuzuye abantu bapfuye n’imigezi y’amaraso yuzuye abatawemo.

Ati “Nimudahinduka, mugiye kugwa mu rwobo.” Yatubwiraga ko nitwumva inama aduha, tugasenga, tugakundana, tukihana, ko ibyo bibi bitazaba. Hari n’aho twumvise umukobwa ubonekerwa abwira Bikira Mariya ati “Nzabibwira umukuru w’igihugu.” Twaje kumenya ko mu byo yamusabye, harimo gucyura impunzi z’Abatutsi zari zarangiwe gutaha mu Rwanda, asaba ko babacyura mu mahoro n’ubushake, amubwira ko azamurinda icyo atinya cyose. Ibyo ntibyakozwe, ntekereza ko yavugaga Jenoside yaje kuba mu 1994.

Yavugaga ko mu mitima y’abantu benshi harimo inzangano n’amashyari ariko agashimangira ko uko bizagenda kose, Imana itatererana iki gihugu, cyatuwe umutima we ‘Kirisitu Umwami’. Mu butumwa bundi bwatanzwe, Bikira Mariya yasabye ko bamwubakira Chapelles, Kiliziya ebyiri, inini n’intoya.

IGIHE: Ni gute Bikira Mariya yasabye kubakirwa Kiliziya i Kibeho ndetse ni iki yazivuzeho?

Ilibagiza: Bikira Mariya yatangiye gusaba ko bamwubakira izo Kiliziya kuva amabonekerwa agitangira. Abivuga kenshi nk’ubundi butumwa imbere y’abantu bose. Yazihaye n’amazina imbere y’abantu ibihumbi byinshi, imwe asaba ko izitwa “Iyegeranya ry’Abatatanye”. Avuga ko indi izitwa “Ububabare Burindwi bwa Bikira Mariya”.

Igitangaje rero, ahantu henshi ku isi Bikira Mariya yiyerekanye, yasabaga ko bamwubakira Kiliziya, ariko mu Rwanda ni aha kabiri mu mateka azwi yerekanye ikibanza azishakamo, atanga n’ibipimo by’uko zizaba zingana. Ahandi ni kiliziya yitwa “Our Lady of the Snows”, “Bikira Mariya w’Urubura”, i Roma mu Butaliyani.

Abakunzi ba Bikira Mariya bumvako yasuye u Rwanda akanasaba Kiliziya, akanerekana aho bazamwubakira, birabashimisha cyane, bakanifuza kumufasha kuzubaka, bishimira kumva ko bazaba bamufashije uko abyifuza, atari ugukekeranya. Ni umugisha ukomeye, kandi ibi bizahora byibukwa mu mateka y’isi, kera twese twarapfuye, uko izi Kiliziya yatangiye n’uko zaje.

IGIHE: Ese Bikira Mariya yaba yarerekanye aho izo Kiliziya zizajya n’ibipimo byazo?

Ilibagiza: Yabibwiye ababonekerwa baganira, ukumva umukobwa asubiyemo ati “Nzabwira Musenyeri ko ushaka ko bakubakira Kiliziya hano.” Hari igihe uwitwa Marie Claire yabwiye Bikira Mariya ngo abiga iby’amabonekerwa bamutumye ngo ababarize ati “Ko dufite Kiliziya nyinshi hano i Kibeho, ntiwahitamo izo tugutunganyiriza ugakoresha izo?” Bikira Mariya abatumaho no kuri Musenyeri ko ashaka Kiliziya nshya zizaba urwibutso rwuko yadusuye iwacu mu Rwanda. Aza kongera kubaza ati “Ese ushaka ko tuzubaka he? abasubiza ko azishaka aho yiyerekanaga.

Mu rindi bonekerwa ryabereye hanze, yabwiye Nataliya ati “Ngwino nkwereke aho nshaka ko banyubakira, nkwereke n’uko zingana.” Aramumanura, amucisha mu bantu, amuzengurutsa aho azishaka, uko zingana, akagenda atera intambwe. Abigaga amabonekerwa n’abaturage baramukurikira, bakagenda bashyira ibimenyetso aho ateye intambwe. We ngo yabonaga ari muri izo Kiliziya, abona uko zubatse, abona n’amashusho arimo. Akajya abwira Bikira Mariya ko ataziko hari umuntu washobora kubaka atyo, kuko ari nziza cyane. Bikira Mariya we amusaba ko azasoza ubutumwa bw’ibyo yabonye, nabo bakazagerageza uko bashoboye nk’abantu bakurikije ibyo yababwiye.

Musenyeri aza gutuma Marie Claire kuri Bikira Mariya, ngo avuye mu nama n’abandi basenyeri ati “Ko ushaka ko tukubakira Kiliziya nini, nziza gutyo, ariko kandi turi abakene tuzavana he amafaranga?”

Bikira Mariya abasubiza ko ntawe azasaba gukoresha umutungo we bwite muri bo, ahubwo icyo abifuzaho ari ukugira ubushake n’urukundo byo kumufasha, bakabitangaza. Ababwira ko agira abana benshi ku isi bazamufasha, kandi abibutsa ko Umwana we Yezu ashobora byose, batazagira ubwoba bw’aho ibizayubaka bizava.

IGIHE: Kiliziya yubatswe i Kibeho iri mu zo Bikira Mariya yavuze?

Ilibagiza: Hari Kiliziya nto ihari ubu, yubatswe by’agateganyo, bayubatse vuba na vuba hari umu-cardinal wari waje kwemeza ibya Kibeho aturutse i Roma mu 2001. Nyakwigendera Musenyeri Misago wari ukuriye Kibeho, yavuze ko yakoze ibyo ashoboye, ngo uzamusimbura na we azakomeze ubutumwa, avuga ko we ari bwo bushobozi yari afite.

IGIHE: Ubusabe bwo kubaka Kiliziya bwatanzwe na Bikira Mariya busigasirwa gute ngo buri Musenyeri wese uyoboye Kibeho abumenye?

Ilibagiza: Musenyeri Hakizimana Célestin ni we ubu ukuriye Kibeho, unayishinzwe, arabizi ni ibintu byanditse, buriya afite impapuro z’abigaga amabonekerwa kandi si ibya kera cyane, ntibyabaye mu ibanga, byavugiwe mu ruhame, abari bahari bivugwa baracyariho benshi, abashatse yababona. No mu bantu bifuza gufasha Bikira Mariya kuri ziriya kiliziya, nta gikorwa nta n’ikizakorwa atagihaye uruhushya. Ni Musenyeri, ni we utanga uruhushya ku birebana na Kibeho byose.

IGIHE: Ko numva ibyo ari umugisha kandi ari ubutumwa bukomeye buturutse mu ijuru, imbogamizi zatumye bitinda ni izihe? Kuki bitarakorwa?

Ilibagiza: Imbogamizi ni Kiliziya yazimenya neza, ariko Musenyeri Ce Célestin amaze igihe gito, kandi yageze kuri byinshi. Hari umwubatsi w’Umunyamerika, usanzwe yubaka Kiliziya, we n’umuryango we, bakunda Bikira Mariya cyane, kandi nziko baganira na we kenshi. Ntacyo akora bataganiriye, atabiherewe urushya. Yari yaranahuye na Musenyeri Misago kera, ashakako amufasha, ariko aza kwitaba Imana bataragira aho bagera.

Uwo mugabo kandi, yahuye n’abigaga amabonekerwa, arasobanuza, ahura na Natalia wabonekewe aramwereka, anamusobanurira uko yabonaga zubatse n’ibyarimo, kandi bahuye kenshi, bafata amashusho y’aho yamweretse n’amafoto. Ikindi kandi cyumvikana ni ukuzabona amafaranga, ariko na byo Bikira Mariya yasezeranije ko azayabona nitwemera kugira umutima wo kumufasha.

IGIHE: Mu minsi ishize Natalia uri mu babonekewe aherutse kuvuga ko Abanyamerika bashaka gusiba ibimenyetso no kudakurikiza ibyavuzwe, ibyo waba ubizi?

Ilibagiza: Narabyumvise ariko ntekereza ko niba koko yarabivuze, nta wamwumvise nabi, hari uwaba yaramuhaye amakuru atari yo, kuko njyewe ibyo nabonye, uwo mugabo yashushanyije, kandi yeretse Musenyeri, ni ibyo Natalia we ubwe yamwiyerekeye guhera mu 2008 babonana bwa mbere, kandi babonanye kenshi.

Uwo mugabo aho muherukira, we bimutera ibyishimo bidasanzwe kumva ko ari gukorera Bikira Mariya ibyo ashaka, nta gihembo yasabye, nta kindi yifuza, usibye gushimisha Bikira Mariya ibyo yamukoreye n’umuryango we no gukorera ijuru.

IGIHE: Ibyo bimenyetso se Bikira Mariya yasize, batifuza ko bisibangana ni ibihe? Ni iki yabivuzeho?

Ilibagiza: Icyo nzi, nta muntu wifuza gusiba ibimenyetso bya Kibeho kandi ari byo bituma abantu benshi bahagana. Nkurikije ibyo nabonye bishushanyije n’uko numvise, Musenyeri mbona ko yifuza cyane kugarura ibimenyetso. Aho abakobwa baryamaga (dortoir) yabonekewemo bwa mbere, bavugaga ko bayigumisha uko yari iri, ni ikimenyetso gikomeye, ahubwo bakayisura na yo nk’amateka ya Kibeho.

Podium aho abo bakobwa babonekerwaga, ubu barayisenye, ariko ahubwo Musenyeri n’uwo mwubatsi, bashaka ko izaba ihari na yo, igasaswamo ishinge, uko byagendaga mu gihe cy’ibonekerwa. Uyu mwubatsi asanzwe yubaka kiliziya, ni umukirisitu Gatolika wubaha ukwemera kwe, wubashye n’Abanyarwanda n’umuco wacu cyane.

IGIHE: Hari Abanyamerika bashaka gutanga amafaranga yo kubaka Kiliziya yategetswe na Bikira Mariya, ibyo hari icyo ubiziho?

Ilibagiza: Bikira Mariya yajyaga avuga ati “Bana banjye nimumfashe.” Akanongera ati “Abana banjye si mwe gusa n’abo mu isi yose.” Numva ko rero Kiliziya zizubakwa n’abakunda Bikira Mariya bose bo ku isi hose, abo mu Rwanda n’ahandi hose, bagaterateranya, uwifite agatanga menshi. Abanyamerika benshi nagiye nzana i Kibeho, bakunda Imana pe, bashaka gufasha nabo, ariko kandi ntibatekereza ko Kiliziya izabitirirwa.

Nkunda gutumirwa kuvuga ku bitabo nanditse, kandi aho ngeze mbabwira ubutumwa kwa Bikira Mariya wa Kibeho, kuko yabidusabaga ngo tuzamufashe kubwamamaza. Abo nabibwiye bagiye baza n’i Kibeho, baturuka impande zose, Amerika, Australia, u Bwongereza, Brazil, Argentine, Mexique, Canada n’ahandi bose iyo bamenye ibyo Bikira Mariya yasabye, bantuma kuri Musenyeri bati “igihe uzatanga uruhushya rwo gutangira, natwe uzatubwire twifashirize Bikira Mariya, dukorere ijuru. ” Abandi bakanambwira bati “Kuva twamenya Bikira Mariya wa Kibeho, tuvuga ishapule y’ububabare kandi yadukoreye ibitangaza”.

U Rwanda rugira amahirwe kuba rwarasuwe n’umubyeyi w’Ijuru, rwitegure n’abashyitsi batagira ingano iriya Kiliziya niyubakwa. N’ubu ikibabuza no kubura aho barara, icyo bazarya,… umuhanda utameze neza kandi barengaho bakaza.

IGIHE: Hari abavuga ko Abanyamerika bishakira ubucuruzi no kunguka mu gushora amafaranga mu kubaka Kiliziya, ibyo nta mpungenge byatera?

Ilibagiza: Narabyumvise, navuga ko ari no gusebanya kuvuga gutyo. Gukora ubucuruzi ntabwo ari bibi, burakenewe ngo abantu babone icyo barya, icyo banywa, imodoka bagendamo. Ariko gukeka ko abashaka kubaka Kiliziya hari ibindi bashaka, utababajije, utabihagazeho ntabwo ari byiza. Bikira Mariya ntiyakwishimira amagambo nk’ayo.

Ariko nk’uko navuze, abo numva bashaka gufasha Bikira Mariya, bose barashaka kubikorana urukundo, bakorera ijuru. Twese turashishikaye ngo icyo Umubyeyi Bikira Mariya yifuje kizabeho, icyo Imana ishaka kibeho, kandi yatubwiye ko aho ari na shitani iba ihari. Nta kiza kirangira kitaruhije, abantu batacyibabariyemo.

Kibeho nitera imbere, abaturage bazabona akazi, abakene bazabona aho baryama hatunganye, bazabona icyo bambara. Abahasura bazabona aho barara n’icyo barya n’aho bivuza, ibyo byose ni ibintu byiza. Ahubwo ndasenga ngo abazi gukora ubucuruzi butandukanye bazajye i Kibeho, babuhashyire.

Iyo ugiye ahandi Bikira Mariya yasuye nka za Lourdes, Fatima, haba hari ibintu byose, aho ugura ibitabo, amashapule, aho ugura umwenda igihe uwukeneye, restaurant ku bashatse kurya, mbese ibikenewe byose kandi bifasha abantu birahari. Ibyo byose mbona ko ari umugisha w’Imana tugomba kwishimira aho kubinegura. Wenda muri abo bakora ubucuruzi bagifite imitima iri kure y’Imana bazumva ubutumwa bahinduke.

IGIHE: Nk’umwanditsi wanditse ku mateka wanyuzemo by’umwihariko ubwicanyi bwakorewe umuryango wawe ,muri Jenoside yakorewe Abatutsi, wabayeho ute, amasomo wasangiza abantu ni ayahe?

Ilibagiza: Nihishe ku muturanyi w’Umupasiteri w’Abaporoso, ampishanya n’abandi bakobwa barindwi. Ubwiherero yaduhishemo bwari bufite metero imwe kuri imwe n’igice. Njya kuva iwacu Data yampaye ishapule aba ariyo yonyine mpungana. Uwaduhishe nza kumusaba Bibiliya arayimpa. Amezi atatu twamaze twihishe narasenze cyane ngahera mu gitondo nkavuga ishapule, ngasoma iyo Bibiliya kugera nijoro.

Muri uko kubabara rero no gusenga namenye Imana kurushaho. Nabonye ko inyigisho Bikira Mariya yaduhaye i Kibeho ari ukuri, zaramfashije. Kwihangana, kubabarira, kwibuka ko na Yezu yapfuye azira ubusa, kandi nta cyamubujije kuba Imana kandi yarababariye. Nabonye ko ubuzima bwo ku isi ari bugufi, ariko ibikorwa byiza by’urukundo umuntu akora ku isi, ari byo bimuherekeza nyuma y’urupfu, bikamukingurira irembo ry’ijuru. Twihatire gukora neza rero ni byo bya ngombwa, Imana ntiba mu ijuru gusa, iba muri twe, ibona byose.

Ndangije nifuriza uzasoma ibi wese, umugisha w’Umubyeyi Bikira Mariya; namusaba ngo na we azabere intumwa uwo Mubyeyi mu buryo ashoboye, yibutse abantu gukunda Imana, kuyubaha no gukundana hagati yacu.

Immaculée Ilibagiza yasazwe n’ibyishimo ubwo yahuraga na Papa Francis aho yatangaje ko byari bimwe mu bihe byiza yagize mu buzima bwe
Ilibagiza ari kumwe na bamwe mu bihaye Imana akunda kuzana gusura Kibeho bagasobanurirwa amateka yaho
Ilibagiza ni umwe mu bagize uruhare kugira ngo abanyamerika babe bagiye kubaka i Kibeho Kiliziya yasabwe na Bikira Mariya
Ilibagiza yanditse ibitabo bigera ku icumi harimo ibivuga kuri Jenoside yakorewe Abatutsi nk’umwe mu bayirokotse, yandika n’ibindi bivuga kuri Bikira Mariya nk’umwana wakuze amukunda

Abanyamerika bagiye kubaka Kiliziya yasabwe na Bikira Mariya abonekera abakobwa i Kibeho


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza