Umwana wabyawe mu buryo bw’ikoranabuhanga azandikwa kuri nde?

Yanditswe na Uwishyaka Jean Louis
Kuya 25 Ugushyingo 2016 saa 08:58
Yasuwe :
0 0

Biragoye kumva ko umugore yabyaye umwana ariko akaba atitwa uwe. Gusa siyansi yerekana ko bishoboka mu gihe byagizwemo uruhare n’ikoranabuhanga.

Ubwo buryo bushya bwo kororoka hakoreshejwe ikoranabuhanga biciye mu guhuza intanga buzwi nka IVF (In Vitro Fertilization), buremewe mu Rwanda, bivuze ko nta gitangaza kirimo kubona umugore runaka atwise inda akayibyara ariko umwana akitwa uw’undi muryango kuko intanga zakoreshejwe atari ize.

Ubwo buryo bwemerwa mu itegeko rishya No 32/2016 ryo ku wa 28/8/2016 rigenga abantu n’umuryango, riherutse gushyirwaho risimbura iryari risanzweho nº 42/1988 ryo ku wa 27 Ukwakira 1988 ryahinduwe nyuma y’imyaka 28 rikoreshwa mu Rwanda.

Nk’uko umugore atwita ndetse akabyara umwana hahujwe intanga zitarimo ize, ngo n’igihe cyo kumwandikisha, uwo mugore ntacyo azaburana kuri uwo mwana.

Minisitiri w’Ubutegetsi bw’Igihugu, Francis Kaboneka, ubwo yagiranaga ikiganiro n’itangazamakuru ku itangizwa ry’ukwezi kwahariwe irangamimerere, yagize ati “Ikoranabuhanga ririmo riratera indi ntambwe, ushobora kuvuga uti ‘nyirakanaka yanze gutwita kubera ko biri bumuvune, bikamubuza gukora akazi, agiye gukodesha nyirakanaka ngo amutwarire iyo nda’. Hari amasezerano burya aba yabaye aba avuga y’uko wowe uri ku kiraka cyo gutwita wamara kubyara, nyir’umwana araza yandikishe umwana wowe wamubyaye bakwishyure birangire. Amasezerano yemeza ko atari umwana wawe. Iri tegeko rirabyemera.”

Biciye mu masezerano umusore runaka ashobora kugirana n’umukobwa batabana akamusaba ko amutwitira, umwana ashobora kwandikwa k’ubyifuza muri bombi, bitewe n’amasezerano bagiranye.

Uburyo bwo kororoka hakoreshejwe ikoranabuhanga biciye mu guhuza intanga bwatangiye mu Rwanda mu mwaka wa 2014, maze muri Kanama 2015, bwa mbere mu Rwanda butanga umusaruro kuko ari bwo havutse imfura zabwo mu ivuriro rimwe riri i Kigali.

Inkuru bifitanye isano:Bwa mbere mu Rwanda havutse abana hifashishijwe ikoranabuhanga rihuza intanga

Minisitiri Kaboneka avuga ko umwana wavutse mu buryo bw'ikoranabuhanga yandikwa ku mubyeyi bitewe n'ubwumvikane bagiranye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza