Umwana w’imyaka 17 yacitse Pasiteri wari umutwaranye n’abandi kubacuruza

Yanditswe na Mathias Hitimana
Kuya 16 Mata 2015 saa 06:29
45 31

Umuhungu w’imyaka 17 yatahutse mu Rwanda amahoro nyuma yo gucika umugabo ukekwaho ibyaha byo gucuruza abantu wabikoraga yitwaje ko ari Pasiteri w’idini rya gikirisitu.

Uwo muhungu yagarutse mu Rwanda afashijwe na Polisi y’u Rwanda ifatanyije na Ambasade y’u Rwanda mri Uganda yakoze iperereza ku mpamvu uwo mwana w’umuhungu ariyo, ikaba yaranashyizeho gahunda y’uburyo uwo mwana yatahuka mu Rwanda agashyikirizwa umuryango we.

Polisi y’u Rwanda n’iya Uganda ziri gukorera hamwe mu iperereza ry’uwo Pasiteri waba yaragize uruhare muri ibyo bikorwa.

Iryo perereza kandi rigamije kugarura mu Rwanda abandi bana batwawe mu buryo bwo gucuruzwa bakekwaho kuba bafitwe n’uwo mu Pasiteri waba akiri muri Uganda.

Umuvugizi wa Polisi y’igihugu, CSP Celestin Twahirwa, yabwiye abanyamakuru, tariki ya 15 Mata 2015, ko uwo mwana w’umuhungu yatwawe mu Kuboza umwaka ushize, ari kumwe n’abandi bana umunani, babambutsa umupaka mu buryo bunyuranije n’amategeko babajyana muri Uganda.

Yakomeje agaragaza ko Pasiteri yabeshye uwo mwana w’umuhungu n’abandi bana bari kumwe nawe ko abajyanye muri Uganda mu masengesho. Baramwizeye.

CSP Twahirwa “Bageze mu gihugu cya Uganda, Pasitoro yari afite umugambi wo kubandikisha nk’impunzi muri UNHCR kugira ngo nibabona ubuhungiro mu bihugu by’i Burayi, azabacuruze cyangwa abakoreshe mu bikorwa bitandukanye binyuranije n’amategeko birimo uburaya n’imirimo y’agahato.”

Nyuma y’uko nta kigaragaza ko bazaguka mu Rwanda, uwo mwana w’umuhungu yagize amakenga ku byo Pasiteri yari yababwiye. Yafashe umwanzuro wo kwegera abantu ababwira ibyamubayeho, abo bantu bamugira inama yo kujya kuri Ambasade y’u Rwanda muri Uganda abasaba ubufasha.

Ambasade y’u Rwanda muri Uganda yabimenyesheje Polisi y’u Rwanda n’inzego z’ubuyobozi bwa Uganda, bashyiraho gahunda yo kugarura uwo mwana mu Rwanda.

Tariki ya 15 Mata 15, yagaruwe mu Rwanda amahoro ashyikirizwa umubyeyi we umubyara, utuye mu karere ka Kamonyi, wari umaze amezi ane atamubona.

CSP Twahirwa yagize ati “Iperereza rirakomeje kugira ngo ababigizemo uruhare bose bafatwe bashyikirizwe ubutabera kandi n’abandi bana 8 nabo bajyananywe n’uwatashye bacyurwe kandi bashyikirizwe imiryango yabo. Abagize uruhare muri ibi byaha byo gucuruza abantu bakunze kwigaragaza nk’abantu beza, bafite umutima mwiza ariko mu by’ukuri bafite ibyo bagamije bibi cyane”.

Yakomeje agira ati“Polisi izakora ibishoboka byose kugira ngo ababigizemo uruhare bazashyikirizwe ubutabera, bakurikiranweho ibyaha bakozwe. Tuzakomeza gukorana n’imiryango mpuzamahanga haba mu karere cyangwa ku rwego rw’isi kugira ngo u Rwanda rutaba inzira y’ibyo byaha byo gucuruza abantu”.

Yibukuje abaturarwanda gutangira amakuru yafasha iperereza ku gihe n’andi makuru yafasha kurwanya ibyo byaha byo gucuruza abantu”.

Muri iki gihe, Polisi y’igihugu ifatanije na Interpol, iri muri gahunda yo guha amahugurwa abapolisi ku bijyanye no gucuruza abantu muri gahunda yiswe mu rurimi rw’icyongereza “Smuggling Training and Operations Program (Stop)” igamije gutunganya imicungire y’imipaka mu kurwanya icyaha cyo gucuruza abantu n’ibindi byaha byambuka imipaka.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE