00:00:00 IGIHE NETWORK KN KINYARWANDA EN ENGLISH FR FRANCAIS

Umwaka urashize abana batanu b’Abanyarwanda ‘bashimuswe n’Abarundi’ batararekurwa

Yanditswe na Prudence Kwizera
Kuya 8 Kanama 2021 saa 11:03
Yasuwe :
0 0

Umwaka ugiye gushira abana batanu bo mu Murenge wa Mukindo mu Karere ka Gisagara bivugwa ko bashimuswe n’Abarundi ubwo bari bagiye kwahira ubwatsi mu Gishanga cy’Akanyaru, bakabajyana mu Ntara ya Ngozi. Ababyeyi babo bakomeje gusaba Leta y’u Rwanda kuvugana n’iy’u Burundi kugira ngo bagarurwe.

Guverineri w’Intara y’Amajyepfo, Kayitesi Alice, yongeye kuvuga ko ikibazo cy’abo bana kiri kuganirwaho n’inzego zitandukanye mu bihugu byombi kugira ngo barekurwe.

Yabivuze ku wa Gatanu, tariki ya 6 Kanama 2021, ubwo yahuriraga na Guverineri w’Intara ya Kayanza mu Burundi, Col Cishahayo Remy, ku Mupaka wa Nshili mu Murenge wa Ruheru mu Karere ka Nyaruguru.

Bahuye mu rwego rwo kugirana ibiganiro bigamije guteza imbere imibanire y’intara zombi no gushyikiriza u Rwanda abana barindwi bafatiwe mu Ntara ya Kayanza bambutse mu buryo butemewe n’amategeko ndetse n’inka y’umuturage yarenze urubibi igafatwa.

N’ubwo abo bana barindwi ari bo bazanywe, hari ababyeyi bari baje kureba ko abana babo nabo bazanywa kuko bafatiwe mu Burundi, ariko basanze ntabo bazanye.

Usibye abo, hari n’abandi bana batanu bo mu Murenge wa Mukindo mu Karere ka Gisagara bagiye kwahira ubwatsi bw’amatungo mu Gishanga cy’Akanyaru gihana imbibi n’u Burundi tariki ya 15 Kanama 2020, basanga Abarundi bari bihishe mu migano ihari bahita babashimuta.

Abana bajyanywe ni Tuyishimire Jean de Dieu w’imyaka 15; Sibomana Innocent w’imyaka 16; Ntahidakiriza Innocent w’imyaka 18; Noheli Jean Claude w’imyaka 18 na Sibomana Frédéric w’imyaka 22.

Hari amakuru avuga ko abo bana bari bambutse bageze ku butaka bw’u Burundi, ariko ababyeyi babo barabihakana bakavuga ko bafashwe bari kwahira mu Rwanda.

Itangazamakuru ryabajije Guverineri Kayitesi niba mu biganiro yagiranye na mugenzi we bavuze ku kibazo cy’abo bana batanu by’umwihariko.

Yasubije agira ati “Abo bana nabo ntabwo bari bagaruka ariko nabyo turimo kubiganiraho n’ubuyobozi bw’intara ya [Ngozi] yabatwaye, hari ibyo bari bagikurikiranwaho mu buryo bw’amategeko.”

Yongeyeho ati “Ndetse na hano ntabwo ari aba barindwi bonyine nk’uko mwabibonye, hari ababyeyi bakomeje kugaragaza ko nabo bari bizeye ko abana babo bazaza, ariko turakomeza kubiganiraho n’ubuyobozi bw’Intara ya Kayanza ndetse n’izindi ntara duturanye kugira ngo hakurikizwe amategeko abigenga harebwe niba nta cyaha bakurikiranyweho nabo babe basubizwa imiryango yabo.”

Guverineri Kayitesi yavuze ko kugeza ubu amakuru ahari ari uko abana batanu bafatiwe mu Karere ka Gisagara bari gukurikiranwa n’inzego za Polisi y’u Burundi.

Guverineri w’Intara ya Kayanza mu Burundi, Col Cishahayo Remy, yahise abwira mugenzi we w’Intara y’Amajyepfo mu Rwanda, Kayitesi Alice, ko azamufasha gukora ubuvugizi kugira ngo abo bana bafatiwe mu Karere ka Gisagara barekurwe, amusaba kumwoherereza imyirondoro yabo.

Kugeza ubu ababyeyi b’abo bana bahanze amaso ubuyobozi ku mpande zombi kugira ngo barebe ko hari ikizava mu biganiro biri gukorwa, abana babo babe barekurwa.

Uwimbabazi Yacinthe ati “Twebwe icyo twifuza ni uko ubuyobozi bwadufasha kubagarura, ibihugu byombi byakwicara hasi bikabiganiraho rwose bigakorera Imana bikatugarurira abana kuko ni cyo twifuza.”

Umubyeyi witwa Nyirazeza Marie Grace avuga ko umwana we witwa Tuyishimire Jean de Dieu w’imyaka 15 yamwandikiye ibaruwa abinyujije muri Croix Rouge amumenyesha ko ababajwe n’uko agiye gucikiriza amashuri.

Muri iyo baruwa bigaragara ko yanditswe tariki ya 23 Nzeri 2020, iriho n’ifoto y’uwo mwana Tuyishimire Jean de Dieu.

Hari aho yagize ati “Nanjye ndaho, icyo nababazaga, ndabaza ko amashuri yatangiye. Uyu mwaka ndawutarutse ntabwo nize kubera ubwatsi, nta kundi nyine murihangana nanjye ndacyariho.”

Akomeza agira ati “Ni icyo nababazaga y’uko mukiriho, nimuhumure ndaho ntacyo nabaye imipaka niyugururwa nzahita ntaha.”

Ubusanzwe kuvogera imipaka no kwambukira ahatemewe birabujijwe. Gusa ababyeyi batwariwe abana bavuga ko ubuhamya bahawe n’abahinzi bahinga mu Gishanga cy’Akanyaru, bababwiye ko abana babo bashimuswe bari ku butaka bw’u Rwanda.

Guverineri w’Intara y’Amajyepfo, Kayitesi Alice ari kumwe na Guverineri w’Intara ya Kayanza mu Burundi, Col Cishahayo Remy

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .