Kwamamaza

Umuyobozi wabujije abaturage gutanga amakuru yakanguye inzego zibishinzwe

Yanditswe kuya 14-11-2016 saa 21:00' na Ntakirutimana Deus


Umunyamabanga Nshingwabikorwa w’Urwego rw’Abanyamakuru bigenzura(RMC), Emmanuel Mugisha yagiriye inama abayobozi kubahiriza inshingano zabo bagatanga amakuru kuko ari inshingano zabo, bakirinda kubifata nk’aho ari impuhwe bagiriye uyashaka.

Mugisha yabihereye ku muyobozi umwe w’akarere ko mu Rwanda uherutse gukoresha inama abaturage akabwira ko nta muturage wemerewe gutanga amakuru.

Ni urugero yahaye abayobozi b’akarere ka Gasabo bagizwe n’Abanyamabanga Nshingwabikorwa b’Imirenge n’abayobozi b’amashami, ku wa Mbere tariki ya 14 Ugushyingo 2016, ubwo umuryango w’abanyamakuru baharanira amahoro, Pax Press, wabasobanuriraga ibijyanye n’itegeko ryo kubona no gutanga amakuru.

Yagize ati “Hari umuyobozi umwe uherutse kubwira abaturage ati ‘mu karere kanjye nta muntu wemerewe gutanga amakuru, uretse njyewe na gitifu’. Umuturage yahise amubaza ati ‘ese itegeko ryagiyeho ridukangurira kuba twatanga amakuru tubyibwirije urarivugaho iki?’”

Yavuze ko uwo muyobozi yakoze amakosa kuko iyo abaturage babonye amakuru bituma bumva neza inzira z’ibyemezo bibafatirwa, bakabigiramo uruhare, bikanafasha mu gukorera mu mucyo.

Ati “Hari igihe abantu bumva ko gutanga amakuru ari impuhwe bagiriye abantu, kubona amakuru ni uburenganzira bw’ibanze bw’umuntu n’Itegeko Nshinga rirabyemeza.”

Mugisha yabwiye abo bayobozi ko iryo tegeko rigena ko umuyobozi agomba guha abanyamakuru n’abaturage amakuru bashaka, akomoza no kubihano bigenewe uwanze gutanga amakuru, cyangwa se uyabeshye nkana.

Akomoza ku bijyanye no guha abaturage amakuru, Umuhuzabikorwa wa Pax Press, Twizeyimana Albert Boudouin yahaye urugero abo bayobozi ahereye ku kibazo yabajije umwe muri bo.

Yamubajije ati “ Nyakubahwa Gitifu, umuturage aguhamagaye akakubaza umubare w’amafaranga y’ubudehe yaje mu murenge n’asigaye kuri konti wamusubiza gute?”

Uwo muyobozi yavuze ko atayamuhera kuri telefoni, ahubwo yamutumaho akabanza kumenya uwo ari we.

Twizeyimana yamubwiye ko ashobora kubaza uwo muturage akamenya niba atuye muri uwo murenge, yarangiza akamuha amakuru kuko no kuyatangira kuri telefoni ari imwe mu nzira zemewe nk’uko bigenwa n’iryo tegeko.

Perezida wa Pax Press, Murenzi Janvier, yasabye abo bayobozi gukomeza gukorana neza n’itangazamakuru nk’umuyoboro uhuza abaturage n’abayobozi, cyane bamenyesha abo baturage gahunda za leta n’uko bazishyira mu bikorwa.

Abo bayobozi bibukijwe ko imikorere y’umunyamakuru itagenda neza adafatanyije n’umuyobozi, kuko umuyobozi ari umufatanyabikorwa ukomeye w’umunyamakuru, kuko bose bakorera umuntu umwe, ari yo mpamvu uwo muryango wahisemo gukorana byinshi n’abayobozi kugira ngo ugeze ku baturage ibyo bakeneye.

Itegeko ryo gutanga amakuru ryashyizweho mu 2013, rifite inkomoko ku Itegeko Nshinga.

Umunyamabanga Nshingwabikorwa w’Urwego rw’Abanyamakuru bigenzura(RMC), Emmanuel Mugisha
Abayobozi b'Imirenge n'amashami mu Karere ka Gasabo basobanurirwa itegeko ryo gutanga amakuru
Abayobozi ba Pax Press basobanura itegeko ryo kubona no gutanga amakuru

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved