00:00:00 IGIHE NETWORK KN KINYARWANDA EN ENGLISH FR FRANCAIS

Umuyobozi wa "Gendarmerie" ya Centrafrique yasuye u Rwanda

Yanditswe na IGIHE
Kuya 3 Ugushyingo 2021 saa 08:51
Yasuwe :
0 0

Mu gitondo cyo kuri uyu wa Gatatu, nibwo Landry Ulrich Depot, Umuyobozi Mukuru wa Gendarmerie ya Centrafrique n’intumwa ayoboye bageze ku Cyicaro Gikuru cya Polisi y’u Rwanda ku Kacyiru mu Karere ka Gasabo.

Aba bashyitsi bakiriwe n’Umuyobozi Mukuru wa Polisi y’u Rwanda, IGP Dan Munyuza ari kumwe n’Umuyobozi Wungirije Ushinzwe Abakozi n’Imiyoborere, DIGP/AP Jeanne Chantal Ujeneza.

Ni uruzinduko ruzamara iminsi itandatu, rugamije gushimangira ubufatanye buri hagati y’inzego z’ibihugu byombi, Polisi y’u Rwanda na Gendarmerie ya Centrafrique.

Ubwo yakiraga aba bashyitsi, IGP Dan Munyuza yavuze ko uru ruzinduko rugamije gushimangira ubufatanye hagati ya Polisi y’u Rwanda na Gendarmerie ya Centrafrique.

IGP Munyuza yagize ati ”Uru ruzinduko ni umwanya mwiza wo gushimangira ubufatanye hagati ya Polisi y’u Rwanda na Gendarmerie ya Centrafrique ni ingenzi kuba Polisi y’u Rwanda ifatanya na Gendarmerie ya Centrafrique, kandi dukeneye guhugura ba Ofisiye tubaha n’ubumenyi bubafasha guhangana n’ibyaha birimo ubwigomeke, iterabwoba, icuruzwa ry’ibiyobyabwenge, ibyaha bimunga ubukungu ndetse n’ibindi.

IGP Munyuza yakomeje avuga ko muri Politike y’Igihugu, Polisi y’u Rwanda isabwa gusangira ubumenyi n’ubunararibonye n’abavandimwe bo muri Afurika no hanze yayo, ndetse no gukorana n’ibihugu by’inshuti muri Afurika mu kubungabuga amahoro n’umutekano.

Depot yavuze ko uru ruzinduko rw’akazi ari ingirakamaro kuko ari umwanya mwiza wo kuganira no kungurana ubunararibonye mu by’umutekano.

Yagize ati ”[Hari] itsinda riturutse muri Centrafrique naje nyoboye muri iki gihugu cyiza, byerekana kuzuzanya na Leta y’u Rwanda ndetse ni iby’icyubahiro kumenya ko hakenewe ubufatanye bw’inzego zacu zombi. Turashaka gukoresha uyu mwanya mu kubona amahugurwa ku bakozi ba Gendarmerie kandi bizaba biri mu murongo w’ubufatanye hagati y’ibihugu byombi.”

Muri uru ruzinduko, aba bashyitsi bazasura ibigo by’amashuri muri Polisi y’u Rwanda n’amashami atandukanye muri Polisi y’u Rwanda.

Kuva mu 2014, u Rwanda rwatangiye kohereza abapolisi mu butumwa bw’muryango w’Abibumbye bugamije kubungabunga amahoro muri Centrafrique, kuri ubu harabarirwa abapolisi barenga 400 bari muri iki gihugu.

Landry Ulrich Depot, Umuyobozi Mukuru wa Gendarmerie ya Centrafrique ari mu ruzinduko rw'iminsi itandatu mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .