Umuyobozi w’Umujyi wa Paris yunamiye abazize Jenoside bashyinguye mu rwibutso rwa Kigali

Yanditswe na Evariste Nsengimana
Kuya 3 Kamena 2019 saa 10:06
Yasuwe :
0 0

Umuyobozi w’Umujyi wa Paris, Anne Hidalgo, n’itsinda rimuherekeje, basuye Urwibutso rwa Jenoside rwa Kigali ruri ku Gisozi, bunamira inzirakarengane zisaga ibihumbi 250 zihashyinguye.

Uyu muyobozi hamwe n’itsinda ry’abayobora imijyi ikoresha Igifaransa bateraniye mu nama y’Inteko yayo ya 89, basuye uru rwibutso kuri uyu wa 3 Kamena 2019.

Uyu muyobozi n’itsinda ayoboye, bashyize indabo ku mva zishyinguwemo imibiri y’abazize Jenoside yakorewe Abatutsi, basura ibice bigize uru rwibutso bisobanura amateka y’u Rwanda ya mbere, mu gihe na nyuma ya Jenoside yakorewe Abatutsi.

Hidalgo yashimye imirimo ikorerwa ku rwibutso rwa Jenoside yakorewe Abatutsi rwa Kigali ruri ku Gisozi, igamije kubungabunga amateka rubitse.

Ati “Ndashima imirimo ikorerwa hano ku rwibutso ni ingenzi, igaragaza ukuri gusesuye ku ishyirwa mu bikorwa rya Jenoside. Jenoside zose zirategurwa zigashyirwa mu bikorwa zibasira igice kimwe cy’abaturage bazira ubwoko bwabo ari na byo byabaye ku batutsi hano mu Rwanda.”

Yavuze ko kugaragaza amateka n’ukuri kwayo aribwo buryo nyabwo bwo kwishakamo imbaraga zo kwiyubaka no kudacika intege nk’uko bigaragara ku Rwanda.

Uyu muyobozi wari uri kumwe n’abayobora umuryango Mémorial de la Shoah, ukora ibikorwa byo kubungabunga amateka ya Jenoside yakorewe Abayahudi, yavuze ko amasezerano wagiranye na Komisiyo y’igihugu yo kurwanya Jenoside ari ingirakamaro mu gukuraho icyakongera kuganisha kuri Jenoside.

Ati “Nashimishijwe byimazeyo n’uburyo u Rwanda rwongeye kwegura umutwe, rukubaka amahoro bigizwemo uruhare n’urubyiruko mu buryo bugaragara.”

Nubwo uyu muyobozi yavuze ko ‘Kugaraza ukuri ku mateka aribwo buryo nyabwo bwo kwiyubaka, igihugu cye [u Bufaransa] cyakunze gushyirwa mu majwi ku ruhare cyagize muri Jenoside yakorewe Abatutsi ariko ntikiruhe agaciro.

U Rwanda ntirwahwemye kugaragaza uko u Bufaransa bwafashije leta yateguye ikanashyira mu bikorwa Jenoside, ndetse rukomoza no ku bayobozi b’u Bufaransa babigizemo uruhare.

Gusa Perezida w’u Bufaransa, Emmanuel Macron, aheruka gushyiraho komisiyo igizwe n’abahanga mu mateka n’abashakashatsi, izasesengura inyandiko icyo gihugu kibitse zigaragaza ibikorwa byacyo mu Rwanda hagati ya 1990-1994, ngo hashyirwe ahabona ukuri ku ruhare rwacyo muri Jenoside yakorewe abatutsi.

Ubwo barimo gusobanurirwa amateka ya Jenoside yakorewe Abatutsi
Ubwo barebaga filime mbarankuru ikubiyemo amateka ya Jenoside yakorewe abatutsi n'aho u Rwanda rugeze rwiyubaka
Umuyobozi w’Umujyi wa Paris, Anne Hidalgo, ashyira indabo ku rwibutso
Umuyobozi w'umujyi wa Kigali, Rwakazina Marie Chantal ashyira indabo ku Rwibutso

Amafoto: Niyonzima Moses


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza