Umuvunyi Mukuru yakebuye abifashisha ruswa y’igitsina ngo bazamurwe mu ntera

Yanditswe na Hakizimana Jean Paul
Kuya 6 Ukuboza 2018 saa 10:05
Yasuwe :
0 0

Umuvunyi Mukuru Anastase Murekezi yakebuye abakoresha ruswa y’igitsina kugira ngo babone akazi cyangwa ngo bazamurwe mu ntera, asaba abaturage kubirwanya bivuye inyuma.

Yabitangaje kuri uyu wa Gatatu mu Karere ka Rwamagana ubwo yitabiraga umunsi wahariwe abagore mu kurwanya ruswa. Ni umunsi uba mu cyumweru cyo kurwanya ruswa cyatangiye tariki 4 Ukuboza, kikazarangira ku wa 9 Ukuboza 2018 hizihizwa umunsi mpuzamahanga wahariwe kurwanya ruswa.

Murekezi yavuze ko ruswa ishingiye ku gitsina ikunda kugaragara ku bagore n’abakobwa bashaka akazi, cyangwa ugasanga bayifashisha bari mu kazi igihe bakeneye kukarambaho.

Ati “Ababa bari mu kazi nabo ikunda kubagaragaraho iyo bari mu kazi bakifuza kuzamurwa mu ntera kandi batabikwiye cyangwa ugasanga bafite ubwoba bwo kwirukanwa mu kazi kubera umusaruro muke wabo, barangiza bakitanga mu cyaha cyo gusambana.”

“Iyo ni ruswa dukwiye kwamagana, kuko irabanza ikabagera mu bwonko ikababuza icyizere muri bo, ikabahindura abagaragu b’ababasambanya. Tugomba kuyirwanya twivuye inyuma.”

Yasabye abagore kutareberera abagabo babo mu kurya ruswa kuko akenshi nabo ubwabo bibagiraho ingaruka.

Ati “Nk’iyo ureba umugabo wawe akugurira ibitenge buri munsi, yubaka amazu, agura inka kandi ubizi neza ko nta mafaranga mufite yo gukora ibyo bikorwa byose wumva nta ngaruka bizagira? Ingaruka niziza se wumva zizagusiga? Ibyiza rero ni uko twabyamagana hakiri kare.”

Depite Uwineza Beline yavuze ko ruswa ituma iterambere ry’umuturage risubira inyuma, asaba abaturage kuyigendera kure no gutanga amakuru ku bayobozi bajya bayibaka bagakurikiranwa.

Umuhire Irène uhagarariye abagore mu murenge wa Musha yabwiye IGIHE ko nk’abagore bagiye kongera imbaraga mu guhashya ibikorwa byose bifite aho bihurira na ruswa.

Ati “Ntabwo tugiye kureberera aho dutuye, ahubwo hahandi tubona yagaragaraga tugiye kuhakorera ubukangurambaga kuburyo hagaragara impinduka.”

Ruswa mu icuruzwa ry’abantu

Umuvunyi Mukuru yanagaragaje ko abana b’abakobwa bajya gucuruzwa hanze y’igihugu, bituruka ku bayobozi baba bariye ruswa.

Ati “Kugira ngo umuntu yinjire mu gihugu afate abana b’abakobwa ajye kubagurisha hanze y’igihugu ni uko hari uwo aba yahaye ruswa kugira ngo amuhe inzira iri butume abasohora. Ibyo byose rero biterwa na ruswa, mureke tuyirinde.”

Yanagaragaje ko ruswa imunga umutungo w’Igihugu ugasigara mu bantu bake barya ruswa.

Mu Rwanda itegeko rihana umuntu wariye ruswa rivuga ko ahanishwa imyaka guhera kuri itanu kugeza kuri cumi n’ibiri, kandi icyaha cya ruswa cyashyizwe mu byaha bidasaza hagamijwe gukarishya ibihano ku bakira n’abatanga ruswa.

Hakozwe urugendo mu mujyi wa Rwamagana rugamije kwamagana ruswa
Umuvunyi Mukuru Anastase Murekezi yasabye abaturage kwirinda ruswa aho iva ikagera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza