Umuvunyi Wungirije yagereranyije utanga ruswa n’umurozi

Yanditswe na Kanamugire Emmanuel
Kuya 26 Ukwakira 2016 saa 02:37
Yasuwe :
0 0

Umuvunyi Wungirije, Kanzayire Bernadette yatangaje ko umuntu wese utanga ruswa ari umurozi, kuko ivana umuntu mu murongo mwiza ikamujyana mu mubi ndetse igakenesha n’uyakwa.

Kanzayire yabibwiye abaturage bo mu Murenge wa Nyamiyaga mu karere ka Kamonyi, muri gahunda Urwego rw’Umuvunyi rurimo yo gukangurira abaturage gukumira no kurwanya akarengane na ruswa.

Kanzayire yagarutse ku bibi bya ruswa n’uko imunga ubukungu bw’igihugu, akangurira abaturage kuyirinda.

Yagize ati "Umurozi si wa wundi utanga uburozi ngo barye bapfe gusa, cyangwa batega ibintu, nkuko bamwe bajya babitubwira ngo mu mategeko mwabishyizemo.....Ahubwo n ’umuntu utanga ruswa ni umurozi niko mbibona."

Kanzayire yagaragaje uburyo umubyeyi ubwo burozi ashobora no kubuha umwana we.

Ati "Ariko ushobora no kuvuga ngo umwana wanjye amaze kwiga ukagenda ukabwira nka visi Meya, uti uri uw’iwacu umenyere kuri ruriya rutonde rw’abanditse ko basabye akazi harimo umukobwa wanjye cyangwa umuhungu wanjye. Kuki ubimubwira se? Ko ari ipiganwa waretse uwo mwana ko yize bishoboka ko azatsinda kandi ko bazareba aba mbere. "

Yongeyeho ati "Niba abana b’abaturanyi bawe bose bagiye muri iryo piganwa, uwawe ugashaka ko aza guca ku bandi kubera ikimenyane , iyo ni ruswa, nabikora uraba wamuroze, ejo nanone azongera abikore gutyo...."

Yasobanuye ko umuntu ugura serivisi yemerewe guhabwa ku buntu aba atiza umurindi ruswa.

Ati "Niba ari nk ’icyemezo cy’amavuko baca amafaranga 500, ariko umuntu yamara kukiguha ukamuha ibahasha (ishimwe), uramushima kubera iki? Ko leta yamwizeye ikamuha wa murimo, namwe mwamutoye, yamushyiriyeho umushahara we, kuki ugomba kujya kumushima? Ni uburyo bwa ruswa."

Yavuze kandi ko umuntu utanga ruswa ashobora kugenda akanagurisha inka mu zo atunze cyangwa kugira ngo abone amafaranga yo guha umuyobozi.

Yongeyeho ko muri ako karere havuzwe ikibazo cya ruswa mu mitangire ya girinka, aho abazihabwa basabwaga ikiziriko yavuze ko ari ruswa, kuko iyo gahunda itagena ikiguzi, ahubwo ihabwa umuturage ku buntu ngo yiteze imbere.

Iyi gahunda y’umuvunyi yakozwe mu turere twa Ngororero na Gisagara, nyuma izakomeza muri Musanze.

Umuvunyi Mukuru Wungirije asanga umuntu utanga ruswa ari nk'umurozi
Umuvunyi Wungirije yavuze ko mu Karere ka Kamonyi havuzwe ikibazo cya ruswa mu mitangire ya girinka, aho abazihabwa basabwaga ikiziriko
Abaturage bakanguriwe gucika ku muco wokugura serivisi bagenewe ku buntu
Abaturage bahawe umwanya wo kubaza ibibazo bishingiye ku karengane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza