Kwamamaza

Umuvundo mu gufata amakarita ya mitiweli wavugutiwe umuti urambye

Yanditswe kuya 15-08-2016 saa 11:03' na Tombola Felicie


Mu minsi ishize humvikanye ibibazo by’abaturage babyukaga ijoro hirya no hino mu gihugu bagana ku bigo nderabuzima kuvugurura amakarita yabo ya mitiweli ariko ubwinshi bwabo bugatuma bataha badahawe serivisi cyangwa ugasanga barabariza ibibazo bafite ahatariho.

Ubusanzwe umuturage iyo yamaraga kwishyura amafaranga y’ubwisungane mu kwivuza bigendeye ku cyiciro cy’ubudehe abarizwamo yahitaga agana ku kigo nderabuzima bakongera agaciro ikarita ye ya mitiweli nyuma y’ukwezi agatangira kuyivurizaho.

Bitewe n’uko ibyiciro by’ubudehe byasohotse bitinze ibyo ngo byaje kubonekamo akajagari abaturage bakazindukira ku bigo nderabuzima nyamara ibibazo bafite by’uko batibonye cyangwa bashyizwe mu cyiciro kitari icyabo atari ho byakagombye kubarizwa.

Nyuma y’uko itangazo rya Minisiteri y’Ubutegetsi bw’Igihugu risohotse rivuga ko abaturage bose bafite amakarita ya mitiweli kandi barishyuye basabwe kuyageza ku buyobozi bw’Akagari barimo, kandi ko ari ho bazajya bayafatira nyuma yo kongererwa igihe. RSSB nk’Ikigo gishinzwe gucunga mitiweli yakoze ubugenzuzi ku bigo nderabuzima ngo harebwe niba byubahirizwa.

Mu bigo nderabuzima RSSB yasuye yasanze umubyigano no kubyuka mu gicuku byarabaye nk’umugani kuko abayobozi b’utugali aribo bajya gusinyisha amakarita y’abaturage babo, maze ba nyirayo bakajya kuyafata ku tugali.

Ku Kigo Nderabuzima cya Muhima ahakorera ishami rya mitiweli hari hariyo gusa abagore batatu bavuga ko impamvu batarindiriye kujya ku Kagali ari uko batwite inda nkuru.

Mukahigiro Janvière, umukozi wa RSSB ukuriye agashami ka mitiweli ku Muhima yatangaje ko ibibazo byaharangwaga mbere y’uko iri tangazo risohoka byabaga byaturutse ku byiciro by’ubudehe.

Ati “Wasangaga hari abantu baraye ijoro kandi wenda bashaka ko bahindurirwa icyiciro cy’ubudehe barimo.Kuri ubu kuko byose bikorerwa ku Kagali akaba aribo bazana amakarita tukayongerera igihe tumaze kuyagenzura nabo bakayasubizayo abaturage akaba ariho bajya kuyafata ;cyane, ubu nta kibazo gihari cy’umubyigano.”

Ku kigo Nderabuzima cyo Kwa Nyiranuma mu murenge wa Nyarugenge, mu kagali ka Biryogo, ubwo abayobozi b’iki kigo bahageraga basanze abakozi bo mu Kagali bazanye amakarita y’abaturage kuyongeresha igihe no gufata amakarita amashya.

Mpambara Abdul Kharim wari wazanye amakarita ku Kigo Nderabuzima yatangaje ko ubu ibikorwa aribwo birimo kwihuta ndetse n’abafite ibibazo mu byiciro by’ubudehe bigacyemurirwa ku kagali hatagombye kubaho gusiragira.

Ati “Nta muturage ukiza hano, haza ubuyobozi kandi kuko nta mubyigano n’umuvundo byose bikorwa vuba, amakarita yabo hari ubwo barara bayabonye cyangwa bakayafata umunsi ukurikiyeho batagombye gutakaza umwanya.”

Ku ruhande rwa RSSB, Nzahumunyurwa Pierre Claver,ushinzwe ubukangurambaga muri mitiweli,avuga ko ibyiciro bishya by’ubudehe byatumye ibibazo bivugwamo ubu birimo gukosoka.

Ati “Ibyiciro by’ubudehe byatinze kumenyekana kubera impamvu zitandukanye. Hari abaturage batugana bafite ibibazo ku byiciro by’ubudehe, bamwe basanga batarabaruwe, abandi barabaruweho abantu benshi, abandi barajuriye n’ibindi. Ubu amakarita ava ku kagali byose byasobanutse, ku bigo nderabuzima hakubahirizwa gusa ibijyanye no kongera igihe.”

RSSB ivuga ko kuba abayobozi b’utugali n’imidugudu bazajya bakira amakarita ya mitiweli y’abaturage bakayuzuza bakurikije ibyiciro by’ubudehe biri mu nshingano zabo nk’abantu bakorera abaturage.

Mukahigiro Janvière uyobora ishami rya mitiweli ku kigo nderabuzima cya Muhima
Abayobozi b'utugali nibo bakurikirana ibijyanye na mitiweli z'abaturage
Hakozwe urutonde ku buryo buri Kagali abayobozi bako bazi igihe bazanira amakarita
Abafite ibibazo bikomeye nibo bijyanira mitiweli
Aha ni ku kigo nderabuzima cyo kwa Nyiranuma mu Biryogo

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 26 September 2016
Copyright © 2009 -2014 - IGIHE Ltd - All Rights Reserved