Kwamamaza

Igice cy’inyubako ya Pasteur Bizimungu cyafashwe n’inkongi(Video)

Yanditswe kuya 11-08-2016 saa 10:37' na Deus Ntakirutimana


Igice cy’inyubako iherereye ku Kacyiru munsi ya Ambasade y’Abaholandi ahazwi nka KBC cyarimo ububiko bw’ikigo mpuzamahanga IFDC cyafashwe n’inkongi, bikekwa ko yaba yatewe n’amashanyarazi y’aho bari mu bikorwa byo gusudira ibyuma.

Iyi nzu yafashwe n’inkongi ahagana saa tatu n’igice z’igitondo ikoreramo isomero rizwi nka Librarie Ikirezi, gusa ryo ntiryagezweho n’iyi nkongi kuko ishami rya polisi rishinzwe kuzimya umuriro ryahise rigoboka.

Pasteur Bizimungu wigeze kuyobora u Rwanda, ny’ir’inzu yafashwe n’iyo nkongi yatangarije IGIHE ko ahuye n’igihombo, ariko ko ashimira polisi uburyo yamugobotse.

Yagize ati “ Byadutunguye kuko ntabwo twakekaga ko impanuka nk’iyi yashoboraga kuba, twabyakiriye nabi kuko tutari tubyiteze, ariko polisi yashoboye kuza vuba vuba, ifatanya n’ubushobozi twari dufite. Hari imodoka zirenze eshatu za polisi kandi bamaze igihe kirenze isaha barimo kurwana n’uyu muriro. Badutabaye rero vuba vuba, ngira ngo biri buze gutungana.”

Umuvugizi wa Polisi mu mujyi wa Kigali,Supt. Hitayezu Emmanuel yavuze ko bakimara kumenyeshwa amakuru bihutiye gutabara, umuriro utaragera ku yindi ntera.

Supt. Hitayezu yavuze ko igikekwa kuba nyirabayazana w’iyo nkongi ari ibikorwa byo gusana iyo nzu byakorerwagamo birimo gusudira, nubwo igiye gutangira iperereza ngo imenye icyayiteye.

Ku bakora ibikorwa byo kubaka bagomba gukoresha ibyujuje ubuziranenge, hagakoreshwa n’abakozi bafite ubumenyi buhagije mu byo bakora.

Inyubako ifite icyapa KG5, Ave 13 yibasiwe n’iyo nkongi iherereye mu kahari ka Kamukina mu Murenge wa Kimihurura. Yari ifite ubwishingizi ndetse n’ikoranabuhanga ryo gutabaza igihe ribonye umwotsi.

Harakekwa ko ibyangirikiyemo bifite agaciro ka miliyoni ziri hagati ya 30 na 40 z’amafaranga y’u Rwanda, birimo mudasobwa zigendanwa n’ibindi bikoresho byo mu biro n’iby’isuku nk’uko byatangajwe n’ubuyobozi bwa IFDC.

Polisi yahagobotse itangira kuzimya umuriro utarangiza byinshi
Igice cyo hasi cy'iyi nyubako ni cyo cyafashwe n'inkongi
Pasteur Bizimungu, yerekeza ku nyubako ye yafashwe n'inkongi
John Veerkamp,Umuyobozi uhagarariye IFDC mu Rwanda
Bimwe mu bikoresho byari muri iyi nyubako byasohowe ubwo iyi nkongi yabaga
Pasteur Bizimungu ari kumwe na John Veerkamp,Umuyobozi uhagarariye IFDC mu Rwanda
Imodoka zifashishwa mu kuzimya inkongi
Ahakorera Librairie Ikirezi

Amafoto:Luqman Mahoro


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 1 Ukwakira 2016
Copyright © 2009 -2014 - IGIHE Ltd - All Rights Reserved