Umusoro ku bukode bw’ubutaka n’inzu ushobora kongerwa

Yanditswe na IGIHE
Kuya 1 Ukuboza 2017 saa 09:48
Yasuwe :
0 0

Guverinoma y’u Rwanda irimo kuvugurura itegeko rizatuma abanyarwanda binjiza amafaranga make babasha gutunga inzu zigezweho, kuko riteganya ko bazakurirwaho imisoro kuri izo nzu zihendutse.

Kuwa Gatatu w’iki Cyumweru nibwo Minisitiri w’Imari n’Igenamigambi, Amb. Gatete Claver, yagejeje ku badepite ishingiro ry’umushinga w’itegeko rihindura iryo mu 2011 rigena inkomoko y’imari n’umutungo by’inzego z’ibanze kandi rikanagena imikoreshereze yabyo.

Minisitiri Gatete yasobanuye ko inyigo zerekanye ko igipimo cy’umusoro ku mutungo utimukanwa mu Rwanda gihagaze kuri 0.1% kikaba ari gito ugereranyije no mu bindi bihugu byo mu karere.

Nkuko The New Times yabyanditse, muri uyu mushinga, umusoro ku nyubako uzongerwa uvanwe kuri 0.1% ugere kuri 1% by’agaciro k’inzu yo guturamo no kuri 0.1% kugera kuri 0.5% by’agaciro k’inzu y’ubucuruzi.

Icyakora inyubako z’inganda, umusoro uzaguma kuri 0.1% ndetse n’iz’ibigo bito n’ibiciriritse byose bigamije guteza imbere gahunda ya Made in Rwanda.

Ubukode bw’ubutaka buzava hagati ya 0% kugera ku mafaranga 500 kuri metero kare. Iteka rya Minisitiri rizateganya uko ibizagenderwaho n’igipimo cy’umusoro akarere runaka kazajya kishyuza ku buso runaka.

Hateganyijwe n’umusoro w’inyongera ugamije guca intege abadakoresha ubutaka uko bikwiye n’ibibanza bitubakwa. Kugira ngo ubutaka bukoreshwe uko bikwiye, uyu musoro usanzwe uziyongeraho 50% kuri buri metro kare imwe y’ubutaka budakoreshwa burengeje igipimo cyemewe cy’ikibanza cyo kubakamo inzu yo guturamo cyangwa iy’ubucuruzi.

Uyu musoro uziyongera ugere ku 100% by’usanzwe ku kibanza kitubakwa. Uyu mushinga uteganya ko hazakurwaho umusoro ku mutungo utimukanwa nk’ubutaka cyangwa inyubako zitangirwamo serivisi z’ubuvuzi, ibikorwa by’ubushakashats n’insengero.

Abadepite bagaragaje impungenge ariko bemeza ishingiro ry’umushinga mushya w’itegeko.

Bamwe mu badepite barimo Mukayuhi Rwaka Constance, bagaragaje ko uyu mushinga w’itegeko wari ukenewe ku mpamvu zo kongera umusoro winjira mu isanduku ya Leta.

Ku rundi ruhande Depite Theobald Mporanyi yagize ati “Iyi misoro ni myinshi. Minisitiri yavuze ko bakoze ubushakashatsi ariko gukora ubushakashatsi no gukusanya amakuru ni ibintu bitandukanye.”

Minisitiri Gatete yavuze ko ubushakashatsi bwimbitse n’ibyabuvuyemo bizagaragarizwa abagize Inteko Ishinga Amategeko.

Minisitiri Gatete yavuze ko umushinga w’itegeko uzafasha abanyarwanda bafite amikoro make kubona inzu zigezweho binyuze mu gukurirwaho umusoro wo kubaka inzu zihendutse, aho umuntu ufite inzu yo guturamo ifite agaciro kari munsi ya miliyoni 30 z’amafaranga y’u Rwanda atazajya asabwa kwishyura umusoro wayo.

Abafite agaciro karenze miliyoni 30 z’amafaranga y’u Rwanda muri gahunda y’inzu zihendutse, bazajya bishyura umusoro ku gaciro karenze izi miliyoni. Bisobanuye ko ufite inzu ya miliyoni 40 z’amafaranga y’u Rwanda azajya asorera izo miliyoni 10 ziyongeraho gusa.

Guverinoma ikaba ishaka korohereza abubaka inzu zo guturamo no guteza imbere gahunda yo kubaka mu buryo buzigama ubutaka.

Minisitiri Gatete akaba yarasobanuye ko ibi ari ugushyira mu bikorwa umwanzuro w’umwiherero w’abayobozi wa 12, ugendanye no kuvugurura ibiciro by’ubukode bw’ubutaka hagamijwe imikoreshereze myiza yabwo.

Minisitiri w’Imari n’Igenamigambi, Amb. Gatete Claver

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza