Umushinjacyaha mukuru yagaragaje imbogamizi ziri mu gufata abashinjwa ibyaha bya Jenoside

Yanditswe na Akayezu Jean de Dieu
Kuya 28 Kamena 2018 saa 08:47
Yasuwe :
0 0

Umushinjacyaha Mukuru w’u Rwanda, Mutangana Jean Bosco, yatangaje ko hakiri imbogamizi zikomeye mu gukurikirana abashinjwa ibyaha bya Jenoside yakorewe Abatutsi bihishe mu mahanga.

Umushinjacyaha Mukuru w’u Rwanda yagiranye ikiganiro n’itangazamakuru, ku wa 27 Kamena 2018, ari kumwe n’Umushinjacyaha Mukuru w’Urwego rwasigariye Urukiko Mpuzamahanga Mpanabyaha rwashyiriweho u Rwanda (MICT), Dr Serge Brammertz.

Abajijwe ku ikurikiranwa ry’abagishakishwa bashinjwa uruhare muri Jenoside, Umushinjacyaha Mukuru, Jean Bosco Mutangana yagize ati “Icyo nakubwira ni uko twubatse ubushobozi mu by’ukuri mu myaka igera nko ku icumi hashyirwaho ishami rishinzwe gukurikirana abakoze Jenoside yakorewe Abatutsi bahungiye hanze, hari byinshi bimaze gukorwa ngira ngo ntabwo hajya hashira umwaka cyangwa ibiri utarumva umuntu wafashwe cyangwa se imanza ziri kubera muri ibyo bihugu”

Ariko Mutangana yakomeje avuga ko hari ikibazo gikomeye cyo gufata abantu bihisha mu bihugu byo muri Afurika, by’umwihariko ibituranye n’u Rwanda barimo ababa barahinduye amazina, abavuga ko bapfuye ndetse n’abahindura ibikumwe byabo.

Yagize ati “Aba bantu bihisha cyane cyane muri ibi bihugu duturanye byo muri Afurika usanga ariho hari ikibazo, umuntu aragenda akihisha mu ishyamba, umuntu ashobora gushyiraho itangazo ko yapfuye. Ariko ikigaragaraga ni iki, akenshi tubona amakuru iyo umuntu yagiye ariko iyo umuntu agiye mu ishyamba bakihisha ahantu hamwe mu ishyamba mu giturage ntahave biragoye kugira ngo uzamubone.”

Umushinjacyaha Mukuru yavuze ko hari imikoranire hagati y’Ubushinjacyaha bw’u Rwanda na MICT mu gukurikirana abanyabyaha bahunze igihugu nubwo bikigoye mu gufata abihishahisha.

Umushinjacyaha Mukuru wa MICT, Dr Serge Brammertz, yavuze ko abantu bakurikiranyweho ibyaha bya Jenoside basize bakoze mu Rwanda hari icyizere ko bazafatwa.

Yagize ati “Turi kubikurikirana dukora iperereza ryimbitse ariko biracyagoranye kuko bisaba igihe kinini ariko hari icyizere cy’uko bazafatwa ariko nanone bamaze igihe kinini bihishe niyo mpamvu ntavuga ngo bazafatwa ryari.”

Mu bakurikiranyweho ibyaha bya Jenoside kuri ubu batazwi aho bihishe barimo umunyemari Kabuga Felicien na Mpiranya Protais wari ukuriye ingabo zarindaga Perezida Juvénal Habyarimana n’abandi.

Umushinjacyaha Mukuru w’u Rwanda, Mutangana Jean Bosco

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza