Umushinjacyaha Mukuru wa MICT yagaragaje ibiri gukorwa mu gukoma mu nkokora Theodor Meron

Yanditswe na Akayezu Jean de Dieu
Kuya 27 Kamena 2018 saa 08:21
Yasuwe :
1 0

Umushinjacyaha Mukuru w’Urwego rwasigariye Urukiko Mpuzamahanga Mpanabyaha rwashyiriweho u Rwanda (MICT), Dr Serge Brammertz yanenze uburyo Umucamanza Theodor Meron uyoboye uru rwego arekuramo abahamijwe ibyaha bya Jenoside, ashimangira ko bakomeje gusaba ko amabwiriza akurikizwa yagaragazwa neza.

Ibi yabigarutseho mu kiganiro n’itangazamakuru kuri uyu wa Gatatu tariki 27 Kamena 2018, ubwo Dr Brammertz yari kumwe n’Umushinjacyaha Mukuru w’u Rwanda, Mutangana Jean Bosco.

Umucamanza Meron uri kurangiza manda ye muri MICT, ashinjwa ko yakomeje umugambi wo kurekura abahamijwe ibyaha bya Jenoside kandi bakarekurwa igihano kitarangiye, nyuma yo kugabanyiriza ibihano abandi batandukanye.

Hashize imyaka ibiri afashe icyemezo cyo kurekura Nahimana Ferdinand na Padiri Rukundo Emmanuel bari bafungiye muri Mali, ndetse ubu ari mu rugendo rwo kurekura Col. Aloys Simba, Dominique Ntawukuriryayo na Hassan Ngeze, agendeye ko barengeje bibiri bya gatatu by’igifungo bakatiwe gusa.

Brammertz yavuze ko kurekura uwahamijwe icyaha utararangiza igihano bikwiye gukurikiza amabwiriza runaka, ari nayo mpamvu asanga ibikorwa na Meron bidakwiye kubera uburemere bw’icyaha cya Jenoside.

Brammertz yagize ati “Iyo urebye ku rwego mpuzamahanga usanga kurekura umunyabyaha mbere yo kurangiza ibihano hari ibintu runaka bigenderwaho uko byagenda kose. Erega hano turavuga ku cyaha cya Jenoside, icyaha gifatwa nk’igihatse ibindi, aho utafata icyemezo cyo kurekura umuntu wakoze icyaha cyagize ingaruka ku gihugu cyose n’ikiremwa muntu muri rusange.”

“Ari nayo mpamvu iyo bimeze gutyo ntekereza ko haba hakenewe gukorera mu mucyo. Kuri njye rero, icy’ibanze mbere yo kurekura n’umwe, ni uko waba udahakana cyangwa ngo ube upfobya icyaha wakoze.”

Umushinjacyaha Mukuru Brammertz yavuze ko amabwiriza agenderwaho mu kurekura abamaze bibiri bya gatatu muri gereza yagaragazwa neza, kuko kuba atari ho biri mu bitiza umurindi ibyemezo bya Meron.

Yakomeje agira ati “Kugeza ubu nta tegeko rihari risaba Perezida w’urukiko cyangwa undi uwo ariwe wese kugira undi abaza mbere yo gufata icyemezo cyo kurekura umunyabyaha igihe igifungo yakatiwe kitararangira.”

“Niyo mpamvu ibiro byanjye bimaze imyaka ibiri bifashe iya mbere bigasaba ko itegeko ryahinduka, kugira ngo hajyeho umubare runaka w’ibigomba gukurikizwa harimo no kubanza kumva abarebwa n’icyo cyemezo bose.”

Komisiyo y’Igihugu yo kurwanya Jenoside ivuga ko amabwiriza y’uko mbere yo kurekura abakoze Jenoside uru rwego rwagombaga kubanza kubiganiraho n’u Rwanda yahozeho, ariko ko Umucamanza Meron yayahinduye.

Brammertz yavuze ko kuyasubizaho ari yo nzira igikomeje ariko kugeza ubu nta tegeko na rimwe rirahinduka.

Umushinjacyaha Mukuru w’u Rwanda, Mutangana Jean Bosco nawe yavuze ko mbere yo kurekura abahamijwe ibyaha bya Jenoside hakwiye kubanza gusuzumwa ingaruka bifite cyane cyane ku Bumwe n’Ubwiyunge bw’Abanyarwanda.

Yakomeje agira ati “Aba ni abanyarwanda bakatiwe n’inkiko mpuzamahanga, bafunzwe na Loni kubera ko yabaciriye imanza, ariko ntabwo batakaje ubwenegihugu bw’u Rwanda, baracyari Abanyarwanda, kandi ingaruka za Jenoside turacyazibona kugeza uyu munsi imyaka 24 ishize.”

“Niyo mpamvu usanga kurekura abantu igihano kitarangiye ari ikintu igihugu na Loni bakwiriye kuganiraho, ibyemezo byafatwa bikajya bifatwa byumvikanyweho.”

Uyu munyamerika Theodor Meron w’imyaka 88 yagizwe Perezida wa MICT bwa mbere ku wa 1 Werurwe 2012 aza guhabwa manda ya kabiri ku wa 1 Werurwe 2016. Iyi manda igomba kurangira ku wa 30 Kamena uyu mwaka, ategereze ko yongera kwemezwa nk’umucamanza muri uru rwego.

Umushinjacyaha Mukuru w'u Rwanda, Jean Bosco Mutangana na mugenzi we wa MICT, Serge Brammertz
Umushinjacyaha Mukuru w’Urwego rushinzwe gusoza imirimo yasizwe n’Urukiko Mpuzamahanga Mpanabyaha rwashyiriweho u Rwanda n'urwa Yougoslavie (MICT), Dr Serge Brammertz
Abahagarariye ibitangazamakuru bitandukanye bari bitabiriye iki kiganiro
Umushinjacyaha Mukuru, Jean Bosco Mutangana
Aba bayobozi bahuriza ku kuba hakwiye kugira ibigenderwaho bikomeye mu kurekura abahamijwe ibyaha bya Jenoside

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza