Umuryango Agriterra ufasha abahinzi n’aborozi watangije ku mugaragaro ibikorwa byawo mu Rwanda

Yanditswe na Sekamana Mathias
Kuya 19 Kamena 2019 saa 09:45
Yasuwe :
0 0

Umuryango utegamiye kuri leta ufasha amakoperative cyane cyane ay’ubuhinzi n’ubworozi witwa ‘Agriterra’, watangije ku mugaragaro ibikorwa byawo mu Rwanda.

Muri Gashyantare uyu mwaka nibwo Agriterra yanditswe n’Urwego rw’Igihugu rw’Imiyoborere (RGB), nk’umwe mu miryango mpuzamahanga yigenga yemewe mu Rwanda.

Agriterra yatangijwe mu 1997 mu Buholandi ari naho ufite icyicaro gikuru. Kuri ubu ukaba ukorera mu Rwanda mu turere 10, ukorera n’ahandi ku Isi mu bihugu byo muri Amerika y’Amajyepfo, Aziya na Afurika.

Watangijwe ku bufatanye bw’imiryango y’abahinzi n’aborozibo mu Buholandi, ufite intego yo guteza imbere amakoperative y’ubuhinzi n’ubworozi, nk’imwe mu nkingi z’iterambere rirambye mu bihugu byinshi byo ku Isi cyane cyane ibiri mu nzira y’amajyambere.

Agriterra yafunguwe ku mugaragaro kuri uyu wa Kabiri taliki 18 Kamena 2019 mu Rwanda, ifasha amakoperative atandukanye y’ubuhinzi n’ubworozi mu bijyanye no kubaha amahugurwa, ubujyanama n’ingendoshuri zibafasha kunoza neza imikorere yabo irimo imiyoborere n’imicungire y’amakoperative muri rusange n’imicungire y’umutungo wayo by’umwihariko.

Ifasha kandi mu bijyanye no guhuza amakoperative n’ibigo by’imari, guhanga imishinga ibyara inyungu, ubujyanama ku buhinzi bw’umwuga ndetse n’ubundi bumenyi bwihariye bishingiye ku byo koperative runaka ifitemo intege nke cyangwa byayifasha kugera ku ntego zayo.

Kuri ubu ufasha amakoperative y’ubuhinzi bw’ibigori, ibirayi, ikawa, umuceri, ubuhinzi bw’imboga n’imbuto, ibisheke ndetse n’amakoperative y’aborozi b’inka zitanga umukamo.

Jasper Spikker uhagarariye uyu muryango mu Rwanda, yavuze ko bishimira gukorana n’amakoperative yaho kuko basanze n’ubundi biri muri gahunda za Leta y’u Rwanda zo guteza imbere ubuhinzi n’ubworozi binyuze mu makoperative.

Ati “Nka Agriterra, twishimiye cyane gukorera mu Rwanda, igihugu twasanze gisanzwe gifite gahunda yo guteza imbere gukorera hamwe mu makoperative cyane cyane ay’ubuhinzi.Turabizeza ubufatanye buganisha ku iterambere ry’iki gihugu.”

Umuyobozi wungirije wa Agriterra ku Isi, Cess Van Rij, yavuze ko zimwe mu ntego bafite ku Rwanda, ari ukuzamura umusaruro w’ibikomoka ku buhinzi ku buryo u Rwanda ruzihaza mu biribwa rugasagurira n’amasoko yo hanze, kandi bigakorerwa mu makoperative.

Ati “Imibare igaragaza ko 70% by’abanyarwanda batunzwe n’ubuhinzi. Nyamara imibare iri hejuru gutya, ntabwo igendanye n’umusaruro abantu babona. Urugero nko mu Buholandi 2% gusa nibo bakora ubuhinzi kandi bugahaza abanyagihugu tugasagurira n’amasoko mpuzamahanga.”

Abari mu makoperative akorana na Agriterra na bo bayishimira kuba yarabafashije gukora akazi kabo kinyamwuga, byatumye bazamura inyungu bakura mu buhinzi n’ubworozi bagahindura n’imibereho.

Umuyobozi wa koperative IAKIB yorora inka za kijyambere zitanga umukamo, ikanatunganya umusaruro w’amata mu Karere ka Gicumbi, Hakizimana Pierre Célestin, yavuze ko umusaruro wabo wikubye inshuro eshatu kuva aho itangiriye gukorana na Agriterra.

Ati “Umusaruro wacu warazamutse cyane nyuma yo gukorana na Agriterra. Baduhaye amahugurwa ku buryo mu nka zanjye nakamaga litiro umunani ku munsi buri imwe, ubu nyikama litiro 30 ku munsi. Ikindi badufashije ni ukongera abanyamuryango ba koperative tukava kuri 704 tukagera ku 4004 mu mezi ane, ibi byongereye umusaruro mbumbe wa koperative yacu muri rusange n’umusaruro wa buri umwe.”

Umuyobozi wa Koperative IABM ikorera mu karere ka Muhanga, Jean Baptiste Twagirimana, avuga ko ingendoshuri bakoze mu bihugu bya Uganda na Zambia, byabafashije kugera ku bumenyi bwo kwituburira imbuto y’ibigori ya Hybrid yatumizwaga mu mahanga, bikagabanya ikiguzi cyayo.

Ati “Agriterra yadufashije gukora ingendoshuri mu bihugu bya Uganda, aho twigiye uko bafunga amafu y’akawunga mu ngano zitandukanye, bituma twongerera umusaruro agaciro kuko natwe ubu twamaze kugira uruganda rwacu rukora kawunga.Twize kandi uko batubura imbuto y’ibigori ubwo twari muri Zambia, ku buryo ubu byadufashije gukuba hafi gatatu umusaruro wa buri muntu ku mwaka.”

Umuyobozi wungirije w’ikigo gishinzwe kuzamura umusaruro w’ ibyoherezwa mu mahanga NAEB, Urujeni Sandrine, yashimye ibikorwa by’umuryango Agriterra, cyane cyane mu kumvisha abantu akamaro ko gukorera hamwe mu makoperative no kubafasha kubyaza byinshi mu mirimo yabo y’ubuhinzi n’ubworozi.

Ati “Nka leta y’u Rwanda, turashimira cyane umuryango Agriterra kuba warahisemo u Rwanda nka hamwe muho bagomba gukorera.Turabashimira kudufasha kumvisha abantu umumaro wo gukorera hamwe kuko byabafashije kubyaza umusaruro mwinshi imirimo yabo kandi ku mbaraga zingana cyangwa ziri hasi y’izo bari basanzwe bakoresha buri muntu ku giti cye.”

Ambasaderi w’u Buholandi mu Rwanda, Frederique de Man, yashimiye umuryango Agriterra nk’umwe mu bafatanyabikorwa b’imena mu guteza imbere u Rwanda, ko uje ushimangira icyerekezo cy’imikoranire ya Leta y’u Rwanda n’u Buholandi ikava ku rwego rwo guterwa inkunga ikajya ku rwego rw’umufatanyabikorwa mu iterambere.

Urujeni Sandrine, Ambasaderi w'u Buholandi mu Rwanda Frederique De Man na Cess Van Rij wungirije umuyobozi wa Agriterra ku Isi bafungura uyu muryango ku mugaragaro mu Rwanda
Umuyobozi wungirije wa Agriterra ku Isi yose Cess Van Rij yashimye imikoranire ya Agriterra na leta y'u Rwanda
Umuyobozi wungirije wa NAEB, Urujeni Sandrine, yashimye imikorere ya Agriterra
Jasper Spikker uhagarariye uyu muryango mu Rwanda, yavuze ko bishimira gukorana n’amakoperative yo mu Rwanda
Ntaganda Peter ushinzwe ubujyanama muri Agriterra
Ambasaderi w’u Buholandi mu Rwanda, Frederique de Man, yashimiye umuryango Agriterra nk’umwe mu bafatanyabikorwa b’imena mu guteza imbere u Rwanda
Abayobozi batandukanye mu Rwanda, abo muri Agriterra hamwe na Ambasaderi w'u Buholandi mu Rwanda bafata ifoto y'urwibutso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza