Kwamamaza

Umurundi Mfumukeko yahaye ikaze Bazivamo,u Rwanda rusabwa gushaka umusimbura muri EALA

Yanditswe kuya 16-09-2016 saa 16:55' na IGIHE


Umunyamabanga Mukuru w’Umuryango wa Afurika y’Iburasirazuba, Amb. Libérat Mfumukeko, yahaye ikaze Umunyamabanga wa EAC ushinzwe Imari n’Ubutegetsi, Christophe Bazivamo watangiye imirimo ye nyuma yo kuzirahirira.

Bazivamo yari asanzwe ari Umudepite uhagarariye u Rwanda mu Nteko y’Umuryango wa Afurika y’Uburasirazuba, EALA, kuwa 8 Nzeri mu nama y’Abakuru b’Ibihugu ba EAC nibwo yarahiriye izi nshingano.

Amb. Mfumukeko yashimiye Bazivamo ku mwanya yahawe anamwifuriza imirimo myiza.

Ku ikubitiro, Bazivamo yasabwe gukurikirana ibijyanye n’amasezerano y’Ubucuruzi hagati y’Ibihugu bya EAC n’Umuryango w’Ubumwe bw’u Burayi (EPA), ndetse no kurangiza amavugururwa y’inzego zigize EAC azafasha mu kugena icyerekezo cyawo bijyana n’impinduka [ayo mavugurura] azatanga.

Mu kwakira Bazivamo hari kandi abandi banyamabanga nka Dr. Enos Bukuku ushinzwe igenamigambi n’ibikorwa remezo, Charles Njoroge ushinzwe ibijyanye na politiki n’Umujyanama,Dr. Anthony Kafumbe.

Mbere y’uko agirwa Umunyamabanga muri EAC, Bazivamo yari asanzwe ari Umudepite mu Nteko y’Umuryango wa Afurika y’Uburasirazuba. Ibi bisobanuye ko umwanya we nta muntu uwusigayemo ariyo mpamvu Umuyobozi w’iyi Nteko yasabye ko u Rwanda gushaka umusimbura.

Perezida w’Inteko Ishinga Amategeko y’Umuryango wa Afurika y’Uburasirazuba (EALA), Daniel Fred Kidega, yatangaje ko yamaze kwandikira Perezida w’Inteko Ishinga Amategeko y’u Rwanda amusaba ko hashakwa usimbura Bazivamo nkuko biteganywa n’ingingo ya 51 mu gika cya gatatu cy’amategeko ashyiraho EAC kimwe n’igenga amatora muri EALA.

Biteganyijwe ko Inteko Ishinga Amategeko y’u Rwanda izatora usimbura Bazivamo akazajya mu mwanya we kugera muri Kamena 2017 ubwo manda y’abagize Inteko Ishinga Amategeko ya EALA izaba isozwa.

Nyuma yo kugirwa Umunyamabanga muri EAC, Bazivamo yahise asezera muri EALA binyuze mu ibaruwa yandikiwe Daniel Fred Kidega.

Bazivamo yatorewe kujya muri EALA mu 2011 asimbuye Damien Habumuremyi wari umaze kugirwa Minisitiri w’Uburezi nyuma aza kuba Minisitiri w’Intebe umwanya yagumyeho kugeza asimbuwe na Anastase Murekezi.

Muri EALA, Bazivamo yari Umuyobozi wa Komisiyo Ishinzwe Ubuhinzi, Ubukerarugendo n’Umutungo kamere.

Mu Rwanda yayoboye Minisiteri zitandukanye zirimo iy’Ubutaka, ibidukikije, amashyamba amazi na mine; Minisiteri y’Ubutegetsi bw’Igihugu ndetse n’iy’Umutekano w’imbere mu gihugu.

Umunyamabanga wa EAC, Amb. Libérat Mfumukeko yakira Christophe Bazivamo ku biro bya EAC i Arusha muri Tanzania
Libérat Mfumukeko (hagati) nyuma yo kwakira Christophe Bazivamo (wa kabiri uturutse ibumoso); Charles Njoroge (ku ruhande ibumoso), Dr. Enos Bukuku na Dr. Anthony Kafumbe

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 29 Nzeri 2016
Copyright © 2009 -2014 - IGIHE Ltd - All Rights Reserved