Umurenge wa Shyara wahawe igihembo cy’indashyikirwa mu mitangire ya serivisi z’irangamimerere

Yanditswe na Hakizimana Jean Paul
Kuya 11 Kanama 2019 saa 11:27
Yasuwe :
0 0

Umurenge wa Shyara uherereye mu Karere ka Bugesera wahize indi yose mu Rwanda mu kugira abaturage banditswe neza mu irangamimerere muri serivisi zirimo kwandikisha abana bavutse, kwandukuza abapfuye no kwandika imiryango yasezeranye mu bitabo.

U Rwanda rugizwe n’imirenge 416 ari nayo yari ihataniye igihembo cya miliyoni 1 Frw cyatashye mu Bugesera.

Umurenge wa Shyara wahembewe mu gikorwa cyabaye ku wa Gatandatu ubwo hasozwaga icyumweru cyahariwe irangamimerere cyabaye ku wa 5-10 Kanama 2019. Ni umuhango wabereye muri Shyara mu Bugesera.

Umukozi wa Minisiteri y’Ubuzima ushinzwe Irangamimerere, Ngoboka Godfrey, yavuze ko mu byo bagendeyeho batoranya umurenge wa mbere harimo kureba niba amakuru ari muri mudasobwa ahura neza n’ayo mu bitabo by’irangamimerere.

Yagize ati “Dufite imirenge 416 ariko kugira ngo dushobore kureba neza umurenge watsinze twabanje guhitamo imirenge 100 tugendeye ku kuntu bandika abana bavutse, abantu basezeranye no kwandukura abapfuye, tukareba niba imibare iri mu bitabo by’irangamimerere ihuye n’iri muri mudasobwa, aho rero niho twasanze Shyara ihiga indi mirenge.”

Umwe mu baturage batanze ubuhamya witwa Uzamuhoza Ancilla uturuka mu Kagari ka Rutare mu Murenge wa Shyara yavuze ko yari amaze imyaka myinshi urugo rwe rurangwamo amakimbirane ariko ubuyobozi bukamufasha kuyahosha.

Ati “Nabanye n’umugabo wanjye imyaka 15 tutarasezerana inzego z’ibanze ziratwegera ziratuganiriza twiyemeza gusezerana amakimbirane no gucana inyuma turabireka. Ubu tubanye neza n’umugabo wanjye, abana bacu baranditswe mu gitabo cy’irangamimerere kandi bariga neza nta kibazo.”

Umurenge wa Shyira wageze ku ntsinzi ubikesha imikoranire myiza hagati y’abaturage n’abayobozi.

Umunyamabanga Nshingwabikorwa w’Umurenge wa Shyara, Kazungu Innocent, yavuze ko “Tugira utugari dutanu, buri kose kaba gafite umunsi wako aho abaturage bakirwa n’umukozi ushinzwe irangamimerere. Dukorana kandi n’abakozi bo kwa muganga ku buryo dufatirana ababyeyi bakiri kwa muganga tukandika abana babo bavutse batarataha.”

Guverineri w’Intara y’Iburasirazuba, Mufulukye Fred, yashimiye ubuyobozi n’abaturage bo muri Shyara ku bw’imikoranire myiza yatumye baba aba mbere mu gihugu.

Yakomeje agira ati “Iyo twamenye abana bavutse bituma tumenya umubare w’ibyumba by’amashuri tuzakenera mu mwaka utaha ndetse n’indi ikurikira, iyo tutabandikishije rero bituma igenamigambi ripfa. Ikindi iyo tuzi abana bavutse tumenya inkingi bazakenera muri ya myaka yose bivuze ngo irangamimerere rituma tugira igenamigambi mu burezi, mu buzima no mu zindi serivisi.”

Guverineri Mufulukye yasabye abaturage gukomeza kongera imbaraga mu kubaruza abantu bapfuye, bandikisha abana bavuka kandi bakanasezerana imbere y’amategeko.

Imibare y’Ikigo cy’Igihugu cy’Ibarurishamibare (NISR) igaragaza ko mu 2018/ 2019, abana bavutse banditswe ari 298,859 bahwanye na 92% by’abana bandikiwe kwa muganga muri icyo gihe, mu gihe abavukira kwa muganga bangana na 95% mu Rwanda hose.

Mu Karere ka Bugesera mu 2018 kanditse abana 12 751 mu gitabo cy’irangamimerere kuri 13847 bavutse [bihwanye n’ijanisha rya 92.8%], abaturage 951 bari batuye muri aka karere bandukujwe mu gitabo cy’irangamimerere nyuma yo kwitaba Imana.

Mu cyumweru cy’irangamimerere mu Karere ka Bugesera handitswemo abana 1293 hanabarurwa imiryango 103 yasezeranye.

Guverineri Mufulukye Fred yasabye ubuyobozi n'abaturage gukomerezaho ntibasubire inyuma
Guverineri w’Intara y’Iburasirazuba, Mufulukye Fred, yashimiye ubuyobozi n’abaturage bo muri Shyara ku bw’imikoranire myiza
Umukozi wa Minisiteri y’Ubuzima ushinzwe Irangamimerere, Ngoboka Godfrey, yavuze ko mu byo bagendeyeho batoranya umurenge wa mbere harimo kureba niba amakuru ari muri mudasobwa ahura neza n’ayo mu bitabo by’irangamimerere
Umunyamabanga uhoraho muri Minisiteri y'Uburezi, Mulindwa Samuel, ashyikiriza sheke ya miliyoni 1 Frw abayobozi b'umurenge wa Shyara
Umuyobozi w'Akarere ka Bugesera, Mutabazi Richard, yavuze ko abana 1293 banditswe mu bitabo by'irangamimerere
Uwuzamuhoza Ancilla yavuze ko yari amaze imyaka 15 abana n'umugabo we mu buryo butemewe n'amategeko ariko ko ubuyobozi bwabegereye bukabashishikariza gusezerana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza