Umurambo wa Senateri Kagoyire utegerejwe i Kigali mu Cyumweru gitaha

Yanditswe na Habimana James
Kuya 13 Nyakanga 2019 saa 02:09
Yasuwe :
0 0

Mu ijoro ryo ku wa Kabiri tariki 16 Nyakanga 2019, umurambo wa Senateri Bishagara Kagoyire Thérèse nibwo uzagezwa mu Rwanda uvanwe muri Leta Zunze Ubumwe za Amerika.

Senateri Bishagara yitabye Imana ku wa Mbere mu bitaro bya John Hopkins biri muri Baltimore mu Mujyi wa Maryland muri Leta Zunze Ubumwe za Amerika aho yivurizaga.

Urupfu rwe rwatangajwe na Perezida wa Sena, Bernard Makuza, mu itangazo yasohoye mu izina ry’Inteko Ishinga Amategeko by’umwihariko Umutwe wa Sena.

Mu kiganiro yagiranye na IGIHE, Senateri Makuza yavuze ko umurambo wa Senateri Bishagara Kagoyire Thérèse uzagera mu Rwanda mu ijoro ryo ku wa Kabiri.

Ati “Umurambo uzahagera ku wa Kabiri, kugeza ubu hari ibitari byavuganwaho ariko biza kuvugwaho uyu munsi, gushyingurwa ni ku wa Gatanu niba nta gihindutse ariko ku wa Mbere dushobora kubaha gahunda yanditse.”

Yavuze ko gahunda yo kumushyingura ifite ibice bibiri, hari igice kiba ari icy’umuryango n’abavandimwe nk’uko bisanzwe mu muco nyarwanda ariko hari n’imihango ibera muri Sena yo kugira ngo asezerweho mu mirimo yari ashinzwe mu buryo bwemewe.

Yagize ati “Birumvikana bagenzi be baba bahari n’abo mu mutwe w’abadepite ariko batari bose, haba kandi hari n’inzego zimwe zitandukanye tuba dukorana, inzego aba yarakozemo zindi ariko n’abo mu muryango birumvikana baba bahari ariko nabo baba baragenwe.”

Senateri Kagoyire azashyingurwa mu irimbi rya Rusororo riherereye mu Karere ka Gasabo.

Senateri Makuza yabwiye IGIHE ko Sena y’u Rwanda ibuze umuntu wakundaga umurimo, ufite ubwitonzi n’ubushishozi ndetse akaba yari n’umubyeyi wabaye mu mirimo itandukanye y’igihugu.

Yagize ati “Twamwemeraga bijyanye n’ubuhanga bwamurangaga cyane ubwitonzi n’ubushishozi. Twakundaga kumwita Mama Tereza, bifite icyo bisobanuye. Yari afite umutima w’umubyeyi, umutima wuzuye urukundo ku buryo n’urupfu rubaye yari amaze iminsi arwaye ariko ntitwabonaga ko byagera aho yatabaruka cyane ko yari yagiye kwivuza hanze, na hano yari yivuje ariko ashaka no kujya kugerageza ahandi.”

Senateri Makuza yihanganishije umuryango wa nyakwigendera, avuga ko ubuze umugore n’umubyeyi; asaba abasigaye muri rusange kumufatiraho urugero rwo kumenya kwitangira akazi no kwicisha bugufi.

Senateri Kagoyire yari yarahimbwe 'Mama Tereza' na bagenzi be kubera urukundo rwamurangaga no gukunda gusenga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza