Umupfakazi wa Jenoside wararaga yitwikiriye umutaka yasaniwe inzu binyuze mu muganda

Yanditswe na Ishimwe Israel
Kuya 31 Ukwakira 2016 saa 09:58
Yasuwe : XX
0

Umupfakazi wa Jenoside yakorewe Abatutsi, Uzanyinzoga Odette utuye mu Murenge wa Gisenyi mu Karere ka Rubavu yasaniwe inzu n’abaturage hamwe n’ingabo, ku bufatanye na Banki y’Ubucuruzi ya KCB mu gikorwa cy’umuganda rusange wabaye ku wa Gatandatu, tariki ya 29 Ukwakira 2016.

Uyu mukecuru w’imyaka 62 utuye mu Kagari ka Mbugangari, mu Mudugudu w’Amajyambere yemeza ko yararaga yitwikiriye umutaka ndetse ijoro rikamubera rirerire kubera inzu ishaje yari atuyemo.

Uzanyinzoga Odette uba mu nzu yubakiwe mu 2000 n’Ikigega cya Leta kigenewe gutera inkunga abacitse ku icumu batishoboye (FARG), yatangaje ko yari abayeho mu buzima bugoye ariko ko agiye gutangira gusinzira nta nkomyi.

Yagize ati “Iyi nzu twayimukiyemo mu 2000 nabwo ituzuye, iyi myaka yaragiye irasaza cyane ku buryo nasasaga simenye ko nashashe, kubera ibiti byavungukaga, naryama nkarara nishimagura kubera ibisimba biri kundya, yavaga impande zose no mu byumba byose,ubwo kugira ngo nsinzire byari ugushyira umutaka ku gitanda hejuru nkabona kugoheka.”

Uyu mukecuru akomeza ashimira abagiraneza bamusaniye inzu abizeza kuzayifata neza ku buryo izamufasha.

Umucungamutungo wa Banki ya KCB, ishami rya Rubavu, Musafiri Vedaste, ari nayo yateye inkunga iki gikorwa avuga ko ubufasha baha abatishoboye babayeho nabi buhoraho, buri mu rwego rwo kubahindurira imibereho hifashishijwe inyungu baba bungutse mu mikoranire myiza n’abaturage ari nabo bakiriya bayo.

Aragira ati “Natwe ntabwo twakwishimira ko abaturage bakomeza kubaho nabi, mu ruhare tugira mu mibereho myiza y’aho dukorera twamusaniye inzu yavaga hose, yari yarasadutse yenda kumugwaho. Ibikorwa byo gusana iyi nzu bifite agaciro ka miliyoni ebyiri kandi tuzakomeza kumukurikirana icyo tumusaba ni ukuyifata neza.”

Umunyamabanga Nshingwabikorwa w’Umurenge wa Gisenyi, Mugisha Honoré yatangaje ko ku bufatanye n’abafatanyabikorwa bamaze gukora ibikorwa byinshi bihindura imibereho y’abarokotse Jenoside mu Kagari ka Mbugangari birimo kubasanira inzu, kububakira ubwiherero ndetse n’ibindi bibafasha kubaho neza.

Yagize ati “Uyu mukecuru yari abayeho nabi byari bibabaje uburyo twasanze arara yitwikiriye umutaka, turashimira KCB yamusaniye inzu tunashishikariza abafatanyabikorwa gukomeza kudufasha kuko hari abarokotse Jenoside bakibayeho mu nzu zimeze nabi.”

Uyu muyobozi yemeza ko muri aka Kagari hakiri inzu 13 mu zo FARG yubakiye abapfakazi ba Jenoside zishaje, ariko akizeza ko bafatanyije n’abafatanyabikorwa uyu mwaka uzarangira iki kibazo cyakemutse.

Ingabo z'igihugu, RDF, zafatanyije n'abaturage mu gusanira inzu umupfakazi wa Jenoside
Umukecuru Uzanyinzoga Odette yashimiye abamusaniye inzu, bakamukiza kunyagirwa
Umunyamabanga Nshingwabikorwa w’Umurenge wa Gisenyi, Mugisha Honoré
Umucungamutungo wa Banki ya KCB, ishami rya Rubavu, Musafiri Vedaste, ashimangira ko bazarushaho kwagura imikoranire n'abakiliya

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE