Umupaka w’u Rwanda na RDC ku isonga muri Afurika mu kwambukwa na benshi ku munsi

Yanditswe na IGIHE
Kuya 15 Gicurasi 2018 saa 11:16
Yasuwe :
0 0

Abantu barenga 90,000 buri munsi bambuka umupaka w’u Rwanda na Repubulika Iharanira Demokarasi ya Congo (RDC), akaba ari wo wa mbere wambukwa n’abantu benshi ku munsi muri Afurika, n’uwa kabiri ku Isi nyuma y’uwa Amerika na Mexique.

Umunyamabanga Mukuru w’Urwego rw’Igihugu rushinzwe umutekano n’iperereza (NISS), Maj. Gen Joseph Nzabamwita, yatangarije iyo mibare abitabiriye inama y’iminsi ibiri ku bibazo by’umutekano muri Afurika, iri kubera mu Ishuri ry’abasirikare bakuru mu Karere ka Musanze.

Iyi nama yitabiriwe n’abasirikare bakuru bo mu bihugu birimo; Tanzania, Ghana, u Rwanda na Czech Republic, biga muri iri shuri mu gihe cy’umwaka umwe.

Mu kiganiro kibandaga ku bimukira baturuka mu bihugu mu buryo butemewe n’amategeko nk’ikibazo kuri Afurika n’ahandi, harebwa uko kuri uyu mugabane bihagaze, Gen Nzabamwita yatangaje ko abantu bambukiranya umupaka atari ikibazo kuko baba bashaka imibereho.

Yagize ati “Gufunga imipaka ntabwo bikemura ikibazo cy’abimukira ahubwo bituma kiba kibi cyane.”

Gen Nzabamwita yavuze ko nubwo hari ikibazo cy’abarwanyi ba FDLR bakorera muri RDC, u Rwanda rwiyemeje gufungura imipaka yarwo ku bantu basanzwe.

Yagize ati “Ni ikibazo gusa cy’amahirwe, imirimo ...aba bantu [abambukiranya umupaka] icyo baba bashaka ni ugucuruza gusa. Ntabwo ari ikibazo na gake.”

Nk’uko KT Press yabyanditse, Gen Nzabamwita yavuze ko umubare w’abambukiranya umupaka ku munsi hagati y’u Rwanda na RDC ari wo munini muri Afurika, akaba ari uwa kabiri nyuma y’abambukiranya uwa Leta Zunze Ubumwe za Amerika na Mexique.

Yongeyeho ko gufunga imipaka ari byo byatuma abantu bashaka uko bambuka mu buryo butemewe bagateza ibibazo.

Muri iki kiganiro cyarimo na Minisitiri w’Ubutabera akaba n’Intumwa Nkuru ya Leta, Johnston Busingye, yavuze ko u Burayi na Amerika bafunga imipaka, bakwiye kwibuka ko akebo kajya iwa mugarura, kandi amateka abyerekana neza ko nabo baza muri Afurika ntawabakumiriye.

Yagize ati “Vasco da Gama, Capt. Lugard cyangwa abandi bamisiyoneri bigeze baka viza zo kuza hano. Kuki aba bana bato batafatwa gutyo, mu by’ukuri gikwiye kuba igihe cyo kubyishyura.”

Yakomeje agira ati “Mumbwire igihugu cyabashije gutera imbere aho ari ho hose, ndabereka uko cyabigezeho kubera abimukira.”

Amb. Abdoulaye Diop yavuze ko ikibazo cy’abimukira cyashegeshe Afurika kuko usanga ari abaturage bayo bazi ubwenge bayihunga bakajya ahandi.

Abitabiriye inama bemeza ko amasezerano y’isoko rusange rya Afurika (AfCFTA) azakemura ikibazo cy’abimukira kuko azongera ubucuruzi hagati y’Abanyafurika, koroshya urujya n’uruza rw’abantu n’ibintu ku buryo bazabona amahirwe kuri uyu mugabane bajyaga gushaka i Burayi n’ahandi.

Iyi nama izasozwa ejo kuuri uyu wa Gatatu, biteganyijwe ko mu bandi bazatanga ibiganiro harimo Dr Donald Kaberuka wigeze kuyobora Banki Nyafurika Itsura Amajyambere (AfDB), abayobozi ku cyicaro cy’Umuryango w’Abibumbye no muri Komisiyo y’Umuryango wa Afurika yunze Ubumwe.

Umupaka w’u Rwanda na RDC mu Karere ka Rubavu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza