Kwamamaza

Umunyemari wo muri Aziya yakozwe ku mutima no guhitamo kw’Abanyarwanda

Yanditswe kuya 22-10-2016 saa 10:16' na Prudence Kwizera


Umunyemari ukomoka muri Arabia Saudite, Saadi Ibuni Zaidi, yongeye gushimangira ko gahunda zitandukanye Abanyarwanda bahisemo zigamije kubateza imbere no kugira ubuzima bwiza zamukoze ku mutima bityo yiyemeza kubatera inkunga uko ashoboye.

Zaidi yabigarutseho kuwa 19 Ukwakira 2016, ubwo yateraga inkunga abaturage bo mu gace ka Mugandamure, ko mu Murenge wa Busasamana, mu karere ka Nyanza, aho yashyigikiye gahunda ya Girinka Munyarwanda yoroza imiryango 85, atangira ubwisungane mu kwivuza abantu 2 500, n’amasuka yo guhinga 100 na biogas 20 zo gutekaho.

Ni ku nshuro ya gatatu akoze ibikorwa nk’ibi, kuko muri rusange amaze koroza inka imiryango 107, atangira abatishoboye 12 650 ubwisungane mu kwivuza, atanga n’amasuka yo guhinga 900.

Aganira n’abaturage yagize ati “Nzahora mbisubiramo, umutekano n’umudendezo uri muri iki gihugu bitanga amahirwe yo gukunda igihugu cyanyu tukakigana, gahunda mwihitiyemo zirimo ubwisungane mu kwivuza, uburezi kuri bose na Girinka narazikunze mfata n’umwanzuro wo kuzishyigikira”.

Ubwo mu mwaka ushize tariki ya 18 Nzeri, yatangiraga ibikorwa byo kuvurura Mugandamure yatangaje ko kuba Abayisilamu bo mu gihugu cye baremeye gutera inkunga Abanyarwanda byatewe n’imishinga myiza Abayisilamu bo mu Rwanda babagejejeho, basanga igamije kwiyubakira iterambere rirambye.

Yagize ati “Iwacu twatangajwe n’uko mu Rwanda bafite gahunda nziza cyane, aho umuntu atanga amadolari atanu akivuza umwaka wose, ikindi nuko bashaka ibikorwa bifatika, ntibadusaba amafaranga ahubwo bafite imishinga myiza, amazi, amatungo, inyubako n’ibindi,… twarabyishimiye cyane.”

Bamwe mu batuye i Mugandamure bahawe inka, n’abahawe ubwisungane mu kwivuza ndetse n’amasuka yo guhinga bemeza ko ibyo bakorerwa ari umugisha kuri bo kandi biteguye kubibyaza umusaruro bakava mu cyiciro cy’abaterwa inkunga.

Christine Mukanyandwi wo mu kagari ka Butansinda ati “Ndishimye cyane kuko ngiye kubona ifumbire ngahinga nkabona umusaruro kuko sinahingaga ngo neze neza, kandi ningira amahirwe ikabyara nzabona amata. Iyi nka nzayifata neza inkure mu bukene, mfite umwana azayitaho itubyarire umusaruro”.

Imamu wa Islam mu karere ka Nyanza, Sheih Kabiriti Asumani, ari na we wazanye uyu munyemari mu Rwanda, avuga ko biyemeje gutera inkunga abaturage batishoboye, kubakira urubyiruko rutishoboye rushaka gushinga ingo, kuri ubu hakaba hariyongereyeho no gutera inkunga abavuye ku rugerero.

Ati “Dufatanya n’ubuyobozi gutoranya abatishoboye bazafashwa, tugenda dukurikiza politike igihugu gifite kugira ngo twuzuzanye n’inzego”.

Umuyobozi w’Akarere ka Nyanza, Erasme Ntazinda, yasabye abahawe inka kuzifata neza zikabagirira akamaro kandi bakazibuka koroza bagenzi babo, yizeza ko ubuyobozi buzababa hafi.

Ntazinda ati “Iyo umuntu ahawe inka biba bimusaba guhorana amata, nta kuzimya igicaniro, byagiye bigaragara ko hari abantu babona inka muri gahunda ya Girinka bakazigurisha ugasanga umuntu asubiye muri bwa buzima bubi yahereyeho. Icyo tubasaba uyu munsi ni uko ubufasha abahawe bubafasha kwifasha kandi bakazaziturira bagenzi babo”.

Ibindi bikorwa uyu munyemari ari gukorera abatuye Mugandamure, harimo Umusigiti w’icyitegererezo uri kubakwa, amazi meza yageje ku baturage n’isoko rya Kijyambere riri gukorerwa inyigo.

Usibye mu karere ka Nyanza, ibikorwa byo gutera inkunga abaturage abikorera no mu mujyi wa Kigali ndetse no mu Karere ka Huye ahamaze kubakwa inzu zirenga 10, havugururwa izigera kuri 40.

Umunyemari Saadi Ibuni Zaidi avuga ko guhitamo kw'Abanyarwanda kwamukoze ku mutima
Umunyemari Saadi Ibuni Zaidi ari kumwe na Sheikh Assouman Kabiriti umufasha gusemura Icyarabu
Umunyemari Saadi Ibuni Zaidi ashyikiriza inka umuturage
zimwe mu nka zorojwe abatishoboye
Umuyobozi w'Akarere ka Nyanza,Erasme Ntazinda , ashyikiriza umuturage amakarita ya mituweli
Meya wa Nyanza, Erasme Ntazinda, ashyikiriza umuturage inka yo korora

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved