Umunyamakuru Shyaka Kanuma yasabiwe kuburana afunzwe kuko ‘yafashwe atorotse’ (Yavuguruwe)

Yanditswe na Philbert Girinema
Kuya 11 Mutarama 2017 saa 11:45
Yasuwe :
0 0

Ubushinjacyaha bwasabiye umunyamakuru Shyaka Kanuma gufungwa by’agateganyo mu gihe cy’ukwezi kugira ngo akurikiranwe atabasha gusibanganya ibimetso, hanaveho impungenge z’uko ashobora gucika ubutabera, kuko n’ubwo yatabwaga muri yombi bivugwa ko yari ahunze.

Kanuma w’imyaka 47 yatawe muri yombi mu ijoro ryo kuwa 31 Ukuboza 2016, akurikiranyweho ibyaha bibiri birimo gukora no gukoresha impapuro mpimbano no kutishyura umusoro.

Kuri uyu wa Gatatu tariki 11 Mutarama 2017, nibwo yagejejwe imbere y’Urukiko Rwisumbuye rwa Gasabo yambaye ishati irimo amabara y’umweru n’umukara, ipantalo y’umukara n’inkweto za siporo z’umukara.

Ubushinjacyaha bwavuze ko Kanuma yanditse sheki akagenda ashyiraho amafaranga menshi atandukanye n’ayo asanzwe ahemba abakozi, akazishyira mu idosiye yahataniraga isoko muri Komisiyo y’Igihugu yo Gusezerera no Gusubiza mu buzima busanzwe ingabo zavuye ku rugerero, (RDRC), agira ngo ahuze n’ibyo iyo komisiyo yasabaga.

Ni isoko kandi yaje gutsindira, bikavugwa ko ryari rifite miliyoni 44 z’amafaranga y’u Rwanda, byose ngo abikora abakozi batabizi.

Mu nyandikomvugo bakoreshejwe n’Ubugenzacyaha, abatangabuhamya barimo Bamurange Annet wari umucungamutungo w’ikigo Focus Media Ltd cya Shyaka Kanuma, yavuze ko higanywe umukono we, bikorwa na Kanuma ngo washakaga amasoko mu buryo bw’ibanga.

Theophille Harushyamagara wari umunyamakuru ngo yasanze Kanuma yaramutanzeho sheki iriho ibinyoma, kuko yahembwaga 200 000 Frw, ariko kuri sheki asanga handitseho ko ahembwa 500 000 Frw. Undi witwa Mugisha Stevenson nawe ngo yemeje ko Kanuma yatanze sheki yanditseho ko amuhemba 500 000 Frw kandi yarakiraga 300 000 Frw.

Nyuma abakozi ngo baje kumenya ko Kanuma yasabishije isoko imishahara itari yo, bigera kuri komisiyo nayo ihita yitabaza ubushinjacyaha.

Ku cyaha cyo kutishyura umusoro, Ubushinjacyaha bwavuze ko Kanuma yemera ko hari 65 256 589 Frw atishyuye, ariko agasobanura ko byatewe n’intege nke ziri mu mwuga w’itangazamakuru.

Nyuma Ikigo cy’Igihugu Gishinzwe Imisoro n’Amahoro, RRA, cyandikiye ishami rya Polisi rishinzwe ubugenzacyaha, CID, gisaba ko bakurikirana Kanuma ‘wari utangiye kwikuraho imitungo imwe n’imwe’, havuka impungenge ko atazishyura iyo misoro.

Ubushinjacyaha bwamusabiye gufungwa igihe cy’ukwezi kugira ngo akurikiranwe nta mpungenge ko yazabangamira ubutabera, cyangwa ngo abe yatoroka nk’uko ubwo yafatwaga yari agiye kubikora.

Ubushinjacyaha bwavuze ko Kanuma yafatiwe i Kayonza acitse nyuma yo kwirindiriza ijoro, aho yari yabanje gusaba umushoferi ngo bagende bwije, bamaze kureba umupira. Kanuma we yasobanuye ko yari agiye i Nyagatare, akabanza kureba umupira wahuzaga Liverpool na Manchester City, ngo arebe ko Chelsea afana ikomeza kuzanikira zombi.

Kanuma ati ‘muce inkoni izamba’

Kanuma wari mu rukiko atari kumwe n’umwunganizi, yavuze ko ibirego byose hari ikintu abiziho, ariko asanzwe ari umunyarwanda wiyubashye, wabashije gushora imari mu itangazamakuru ritoroshye ku bikorera, ati “ahubwo twari dukwiye kugirwa intwari z’igihugu.”

Yavuze ko kutishyura imisoro byabaye, ariko byatewe n’uko isosiyete ye Focus Media Ltd yahombye, akaba ari gushaka uko ayifungisha, agasaba ko arekurwa ngo ajye kubisoza ntakomeze kubarirwa umusoro. Ati “Ikigo cyanjye sinari ncyanze, cyari kintunze n’umuryango wanjye ariko iby’Isi niko bimera.”

Yemereye urukiko ko hari sheki yasinye akohereza kopi zazo muri RDRC iz’umwimerere zikaguma mu biro bye, abitewe n’uko mu itangazo ry’isoko hari hateganyijwemo ibintu agomba kubahiriza, atekereza uko yahuza n’imihembere iyo komisiyo yashakaga.

Ahakana ko ntawe yasinyiye ahubwo babyikoreye ndetse akabizeza ko nibabona iryo soko ayo basinyiye azayabaha, ariko ryarabonetse ayo mafaranga ngo asanga ibindi bibazo, ntibaba bakiyabonyeho. Yashimangiye ko adakwiye gukurikiranwaho impapuro mpimbano ku buryo icyo ‘yazarinda apfa atacyemeye’, asaba ko hitabazwa umuhanga akabisuzuma.

Kanuma kandi yasabye ko yarekurwa akajya kwita ku bana be babiri barimo ufite imyaka ibiri n’undi w’itandatu, ndetse ngo ntihakwiye kuba impungenge z’uko yatoroka kuko mbere yafashwe atari afunze uretse kuba yaritabaga CID gusa, kandi ngo abafunze nibo batoroka. Ati "ubu noneho ndi kuburanishwa nta hantu nzajya."

Perezida w’Urukiko yamubajije niba yumva iyo adakoresha sheki ziriho imishahara inyuranye n’ukuri yari guhabwa isoko, yemera ko atari kurihabwa kuko atari kuba yujuje ibisabwa. Ati “Habayemo gushukana, ndabisabira imbabazi.”

Biteganyijwe ko umwanzuro ku ifungwa n’ifungurwa ry’agateganyo kuri Shyaka Kanuma uzamenyekana kuwa Mbere w’Icyumweru gitaha, tariki 16 Mutarama 2017.

Shyaka Kanuma amaze igihe kinini mu itangazamakuru ryandika mu Rwanda
Ingoro y'Urukiko Rwisumbuye rwa Gasabo

Inkuru bifitanye isano: Shyaka Kanuma, nyir’ikinyamakuru Rwanda Focus yatawe muri yombi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244