Umunyamabanga Nshingwabikorwa w’Akarere ka Gicumbi yeguye

Yanditswe na Philbert Girinema
Kuya 25 Ugushyingo 2016 saa 08:50
Yasuwe :
0 0

Umunyamabanga Nshingwabikorwa w’Akarere ka Gicumbi, Fidele Byiringiro yeguye ku mirimo ku mpamvu ze bwite.

Umuyobozi w’Akarere ka Gicumbi, Mudaheranwa Juvénal, yatangarije IGIHE ko Byiringiro yanditse asaba guhagarika akazi ku mpamvu ze bwite.

Ati “Ntabwo nabyita kwegura, kubera ko ari uguhagarika akazi ku mpamvu ze bwite. Ni impamvu zo gukomeza amasomo ndumva nta banga ririmo.”

Umuyobozi w’Akarere ka Gicumbi yakomeje avuga ko Byiringiro agiye gukomeza amasomo y’icyiciro cya gatatu cya kaminuza.

Icyakora n’ubwo Umuyobozi w’Akarere abivuga atyo, amakuru agera kuri IGIHE avuga ko Byiringiro yari amaze igihe anengwa imikorere cyane cyane mu mitangire y’amasoko, aho Ubuyobozi bw’ako karere bwinubiraga uburyo adatangwa mu mucyo.

Raporo y’Umugenzuzi w’Imari ya Leta mu mwaka wa 2014/2015 yagaragaje ko Akarere ka Gicumbi kakiriye umuhanda utararangira, ari na yo mpamvu nyuma yo gusesengura iyo raporo, Komisiyo y’Abadepite ishinzwe gukurikirana ikoreshwa ry’imari n’umutungo wa Leta, yasabye Ubushinjacyaha ko bwakora iperereza kuri iryo soko ryo kubaka uwo
muhanda.

Byiringiro wari Umuyobozi Mukuru ushinzwe ingengo y’imari muri ako Karere, yahagaritse akazi mu gihe bamwe mu bo bakoranaga bamushinja kwivanga mu kazi, aho kuva Mvuyekure Alexandre yava ku buyobozi bw’ako karere, uwo wari Umunyamabanga Nshingwabikorwa yasaga nk’aho ari we muyobozi w’Akarere.

Ibyo kandi byiyongeraho kuba yarakunze kugarukwaho ubwo Ikipe ya Gicumbi yari igiye gusenyuka, bikavugwaga ko ari we wabaye intandaro yo kubura amafaranga bigatuma yegurirwa abaturage burundu ngo bajye bayiteranyiriza amafaranga yayibeshaho.

Icyakora Byiringiro nk’Umunyamabanga Nshingwabikorwa w’Akarere, asize Gicumbi ku mwanya wa Kabiri n’amanota 80.3% mu kwesa imihigo, aho gakurikira Gasabo ya mbere n’amanota 81,6%.

Ibiro by'Akarere ka Gicumbi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza