Kwamamaza

Umunyakenya yatumwe gucungura abakora uburaya mu Rwanda

Yanditswe kuya 16-10-2016 saa 17:03' na Philbert Hagengimana


Fredrick Otieno Onoka n’umugore we Triza bakomoka muri Kenya, batuye mu Rwanda, aho bari mu butumwa bwo gucungura abakora uburaya, babafasha kubuvamo no kubahindurira ubuzima bakaba abizerwa mu muryango.

Fredrick Otieno Onoka n’umugore we bamaze imyaka ine n’igice mu Rwanda, bigisha abagore bicuruza (bakora uburaya) ngo babuvemo, babafasha kwiyubaka ndetse bita no kubana babo.

Uyu mugabo ufite intego yo kurwanya akarengane abagore bahura nako ashyira mu bikorwa umuhamagaro w’Imana, akorana n’umuryango w’urubyiruko witwa YWAM Rwanda, aho yagerageje guhura na benshi muri abo bagore, abashishikariza kuva mu mwuga w’uburaya, bagashaka ubuzima bwiza nkuko The East African ibitangaza.

Onoka yagize ati “Ubwo nasuraga u Rwanda ku nshuro ya mbere mu 2005, nagiye mu nzu y’urubyiniro izwi cyane muri Kigali nshaka kumenya ibihakorerwa, aho nari nizeye kuhahurira n’abagore. Ubwo nari ndi aho, nahuye n’umwe muri bo witwa Fenny mfata icyemezo cyo kwigira nk’umukiliya we mu buryo busanzwe.”

Akomeza agira ati “Namuguriye icyo kunywa maze ambwira byinshi ku buzima bwe. Yari afite imyaka 22 anafite umwana w’umuhungu w’imyaka itanu. Yabashije kwiga amashuri abanza gusa kandi nta kandi kazi yagiraga.”

Uko iminsi yashiraga, Onoka n’umugore we bagiranye umubano wihariye na Fenny, none ubu ni umwe mu nkingi za mwamba mu itsinda ry’abagore bagera kuri 60 batuye mu Kagari ka Busanza, mu Murenge wa Kanombe Akarere ka Kicukiro, 95% muri bo bahoze bakora uburaya, ariko babuvuyemo bajya mu buzima bwiza.

Mukaruriza Valentine Kabibi, umwe muri abo bagore, avuga ko nyuma y’uko Jenoside yakorewe Abatutsi mu Rwanda ihitanye abana be babiri n’umugabo we, yishoye mu biyobyabwenge ngo arebe ko byamuvura ibikomere yari afite ku mutima.

Ibyo ariko ngo byarushijeho kuba bibi ubwo yabanaga n’umugabo imyaka umunani akaza kumuta amuteye Virusi itera SIDA ndetse anamusahuye umutungo wose, byatumye yongera kwishora mu bisindisha no mu buraya mu rwego rwo kwiyibagiza ibyamubayeho.

Kabibi avuga ko mu buraya bwe yaburiraga abakiliya be kubanza kwambara agakingirizo. Ati “Nagombaga kubanza gusaba umukiliya wanjye kwambara agakingirizo, kuko sinashakaga kugira uwo nanduza.”

Ubuzima bwa kabibi bwabaye bubi, ku buryo yari asigaranye ibiro 45 maze inshuti ze zimushiraho, icyizere cy’ejo hazaza kirashira ku buryo yagerageje kwiyahura inshuro eshatu.

Onoka na bagenzi be baje guhura na Kabibi, baramwigisha, baba inshuti, bamufasha guhindura ubuzima none ubu ni we wigisha bagenzi be kuboha ibiseke.

Mu gucungura abo bagore bakoraga umwuga w’uburaya, Onoka afatanya n’abafatanyabikorwa, maze bakabigisha kuboha , ubudozi no kwihangira imirimo mu buryo butandukanye. Anita kandi ku bana bavukiye muri ubwo buraya, aho kugeza ubu bafasha abana 65 babarihira ishuri no kubabonera ifunguro.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved