Umunya-Israel Haim Taib mu mushinga wo kubaka ibitaro by’abana mu Rwanda

Yanditswe na Mukaneza M.Ange
Kuya 14 Kanama 2018 saa 01:26
Yasuwe :
0 0

Haim Taib, ni rwiyemezamirimo w’umunya-Israel washinze ndetse akaba ariwe uyobora ikigo Mitreli Group na Save a Child’s Heart Africa, Umuryango uvura ndetse ukita ku bana bafite indwara zitandukanye z’umutima muri Afurika.

Taib umaze imyaka isaga 30 akorera ku mugabane wa Afurika, yaje mu Rwanda azanye n’itsinda ry’abaganga bazasuzuma abana 70 bavukanye indwara z’umutima, biteganyijwe ko ku bufatanye na Minisiteri y’ubuzima 20 muri bo bazajyanwa muri Israel kubagwa.

Uyu mugabo ushyira imbaraga n’umutima we mu kwita ku bana bakomoka mu miryango itishoboye amaze igihe akorana n’abaganga b’indwara z’umutima mu Rwanda na Minisitiri w’ubuzima, Diane Gashumba.

Abinyujije mu Muryango Save a Child’s Heart washinzwe n’abanya-Israel ndetse akaba awuhagarariye muri Afurika, Taib avuga ko yifuza kuzakorana n’ivuriro ryo mu Rwanda, ahazatangwa amahugurwa, ubushobozi n’ibikoresho bigezweho hagamijwe kwita ku bana b’Abanyarwanda bafite ibibazo by’umutima, ndetse n’abo mu bihugu byo mu karere.

Mu kiganiro na Taarifa, Taib yavuze ko nyuma y’igihe yamaze akorera ku mugabane wa Afurika, yaje kwitegereza uburyo abana babayeho nabi kandi aribo mizero y’ejo heza, mu 1991 atangira gutekereza ku cyo yakora ngo abahe ubufasha.

Ati “ Twaje gusanga 50% by’abana bafite munsi y’imyaka itanu muri Afurika bahitanwa n’indwara baba baravukanye. Ninjiye mu muryango witwa Save a Child’s Heart, mu ntangiriro nafashe abana 140 bo muri Angola njya kubavuza. Kubera ko tutabashije kubona ubufasha ubwo aribwo bwose bwa guverinoma ya Angola, nafashe umwanzuro wo gutangira gukorana no gufasha abana bo mu bihugu byose bya Afurika, ibijyane n’ubushabitsi bikaza nyuma.”

Yakomeje avuga ko kandi yaje gusobanukirwa neza ko mu bucuruzi bwose akora, abaturage bo mu bihugu akoreramo bakwiye kugira cyo bahabwa ku nyungu aba yabonye. Uyu muryango ntukorera muri Afurika gusa kuko bafasha abana bo mu bindi bihugu byaba ibyo muri Aziya, birimo n’ibidafitanye umubano wihariye na Israel.

Taib uhamya ko akunda abana cyane, yibanze kuri Afurika kuko nta mavuriro afite ubushobozi bwo kwita ku bavukanye ibibazo by’umutima, mu gihe mu gihugu cye ari hamwe mu bamaze gutera imbere mu buvuzi. Bamwe mu bo yagiye kuvuza harimo umwana w’umukobwa w’imyaka 13 wari ufite umwenge mu mutima watumaga umwuka utinjira neza, nyuma yo gukira ubu ari kwiga kaminuza.

Yishimira kandi kuba Guverinoma y’u Rwanda yaremeye gufatanya nawe, aho yazanye n’abaganga bazasuzuma ndetse bakavura abana bafite ibibazo by’umutima, abarwaye cyane bakajyanwa muri Israel.

Ati “ Tuzahitamo abana bari hagati ya 50 na 20 tubajyane muri Israel, iyi izaba ari intambwe ya mbere. Nyuma hazaterwa izindi ntambwe twizeye ko zizadufasha gukemura iki kibazo burundu. Icya kabiri hazabaho guhererekanya abaganga hagati y’u Rwanda na Israel. Intambwe ya nyuma izaba kubaka ibitaro by’abana mu Rwanda, igitekerezo n’uko ibi bitaro bizaba igicumbi cy’akarere. Bizoroshya ubuvuzi kandi mu buryo burambye.”

Muri uyu mushinga, Taib avuga ko bazafatanya n’abagiraneza basanzwe batera inkunga ibikorwa byabo, muri bo hakaba harimo na Papa Francis washimye umusanzu akomeje gutanga mu kwita ku bana b’Abanyafurika ndetse akamusaba kutazigera adohoka.

Yatangiye gushora imari mu bwubatsi n’ubworozi

Uretse ibikorwa byo kwita ku bana bafite ibibazo by’umutima, Taib aherutse no kugirana amasezerano n’Ikigo cy’Igihugu gishinzwe Iterambere, RDB, agamije gutangiza umushinga wo kubaka inzu ziciriritse icyiciro cya mbere kikazaba kigizwe n’inzu ibihumbi 10 za Minisiteri y’Ubuzima.

Yagize ati “ Ni amahitamo ya Guverinoma y’u Rwanda. Zizaba ari iz’abakozi bakora mu birebana n’ubuzima bakeneye aho kuba. Nyuma tuzajya mu buhinzi n’ubworozi, igitekerezo ni ugutangiza umushinga w’ubworozi bw’inkoko uzabasha guhaza isoko ry’amagi mu Rwanda no guhanga imirimo mishya, uru rwego rugatera imbere tugamije kugabanya ibitumizwa mu mahanga. Turateganya kuzajya tubona amagi ibihumbi 700 ku munsi, kandi ubu bushobozi kuko tubikora mu bihugu bitandukanye muri Afurika. Muri Angola dufite inkoko zitera amagi ibihumbi 650.”

Taib uhamya ko kugeza ubu ataramenya umubare w’amafaranga azashora mu Rwanda aho avuga ko ibi bikorwa byose bizabera igihe kimwe, kandi yishimira uburyo mu Rwanda inzego zubatse n’imbaraga guverinoma ishyira mu kurushaho guteza imbere imibereho y’abaturage.

Ati “ Nkorera mu bihugu umunani muri Afurika. Buri mwaka dushakisha igihugu dushobora gutangiza ibikorwa byacu. Twasuye u Rwanda ndetse tureba uko ishoramari rikorwa n’amahirwe ahari, ibisabwa n’ubushobozi bwa guverinoma.”

Umunyarwanda wa mbere yahuye nawe ni Perezida Paul Kagame ubwo yari yasuye Israel, aho yahamije ko mu byo yamushimiye ari uburyo akunda kumva ibitekerezo by’umuntu, ndetse n’uburyo iteka atekereza ndetse agakora ibifitiye inyungu Abanyarwanda. Ibintu ahamya ko biri mu bituma abashoramari bakunda u Rwanda.

Taib umaze imyaka isaga 30 akorera ku mugabane wa Afurika arashaka kubaka ibitaro by'abana mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza